Topa’ hoihna pan Topa’ dikna ah Justification azom

Topa’ hoihna pan Topa’ dikna ah Justification azom

Topa’ hoihna pan Topa’ Dikna ah
Lai Siangtho sungah Topa hoih hi, midik migilote tungah nitang khuavak, guahtui le huih a kibangin pia hi na ci hi. Hih Topa’ hoihna bulphuh in lawpphawn thuhilh sya kitam mahmah hi. Tua bek hi loin, Lai Siangtho sungah Topa Siangtho hi zong na kici hi. God is holy. Topa siangtho ahih manin biakna khempeuh in sianthona thu hanciam ciat uh hi. Hih mun ah Christian te in Buddish te bang ih pha kei dek liang uh hi. Topa siang tho ahih manin a siangtho lo peuhmah in gupna ngah lo ding hi, cih bulphuh in lauphawn thuhilhsya kitam mahmah hi. Tua banah Topa in thukhen ding hi, “God is Judge” cih na cian gen zawkan lai hi. Hih thu tawh kisai pen kigina hilh nawn lo hi. Topa’ hoihna bekbek bulphuh in, damzo, hauzo, gup ngahzo a ci pawlte le Topa’ sianthona thukham sawm (the Law) bekbek a bulphuh biakna syate in a kisap lai khat uh pen Topa’ thukhenna thu ahi hi. Topa Siangtho ahih manin nitawp ni ciangin nakhempeuhte’ tungah thukhen pelmawh ding hi. Topa hoih ahih manin a mite tangdingin Jesuh Khrih tawh thu ong khen sak khin zo hi.

Tua ahih leh Topa in thukhen leh bangci khen ahi hiam? Thumaan thutak tawh khen hi. Tua ahih leh mawhnei nang le kei Pasian in bangci bangin ih thu ong khen sak thei nawn ding ahi hiam? Koi bangin migilo nang le kei midik ong tangsak thei ding ahi hiam? Pasian tungah kuamah in thu nei zo lo hi. Ahi zongin Pasian in thukhenna maan zang lopi in mimawhte dik uh ciai ci-in hong mawk bawl lo hi. Diktanna pen a mawkna in a kingah hi lo a, a lian mahmah manh piakna tawh a kilei ahi hi. Tua pen Jesuh Khrih bekin lei zo ahih manin eite in Jesuh Khrih ih up ih san kul hi. Hih thu tawh kisai in Lai Siangtho ih sim ciangin tangmi (representative) cih kammal kimu thei hi. Pasian in a tapa khat neih sun ahong piak dongin leitung mite tungah ahong itna ahong lah kul hi.

Pasian in thukhen nadingin a Tapa Jesuh Khrih zang hi. Mawhna le Dikna tawh kisai ah tangmi cih kammal zangin Lai Siangtho in thukhen hi. (1 Cor 15: 22; Rom. 5: 12-19). Mawhna thu ah tangmi Adam. Dikna thu ah tangmi Jesuh Khrih ahi hi. Thuhilhkikna 25: 1na ah thu kineihna a om ciangin thukhen zum in a thumaanzaw pa pen dik hi ci ding a, a khialzaw pa pen daan pia ding hi, na ci hi. A dik mi dik, a mawh mi mawh cih ding ahi hi. A maan bangin khen ding hi. Lai Siangtho sungah migilo pa diksak in, midik pa a mawh sak thukhenna pen Topa in deihlo hi, na ci hi (Paunak 17: 15). Tuamah bangin, mimawhte sumgolh tawh khahkhia a, midikte a mawhsakte in gimna ngah ta hen, na ci hi (Isaiah 5: 23).

Hih thu tawh kisai in Job in hih bangin gen hi. Thumaan tawh thu a khen Pasian mai ah kua suakta zo ding hiam? Na ci hi (Job. 9: 2). Mihing banga a ninte sung panin a siang a dik mi hong piang lo ding hi, ci hi (Job 14: -4; Rom 3: 10-12). Job nangawn tungah Pasian in hih bangin na gen hi. Kei a thutang loin nong seh a, nang thutang kisa-in kei hong mawh sak na hi hiam? Na ci hi (Job. 40: 8). Late laigelh pa in Pasian pen thutangin a khenpa hi a, migilote tungah a heh den pa hi na ci hi (Late 7: 11). David in, Topa aw, na thugenna ah nang na thutang a, thu na hong khenna ah pauna ding bangmah omlo hi na ci hi (Late 51: 4). Pasian in thumaan thutak tawh thu ong khen ding ahih manin mihing’ ta kuamah suak ta lo hi. Pasian in a hun ka sehsa ni ciangin thu a maanin ka khen ding hi, ci sawnsawn lailai hi (Late 75: 2). Tua ahih manin Laigelhsyapa in, “Na nasempa, thu hong sit kei in. Banghang hiam cih leh nangma mai-ah mihing a dikzo kuamah omlo hi” na ci hi (Late 143: 2).

Evan. Suang Dal