Topa Aw, Kei’ Lam Hong Nga In Aw
Zankim pawl hi ngel leh kilawm. A pa tawh khual a zinna vuah tua zan a giahna uh hotel ah a lupna mun panin naupang thakhat-in khanglo vat hi. A lupna mun koilai hiam cih ngaihsun thei pak lo-in thakhat thu-in patau vat hi. A mangsia khat bang khat in phawng ahi ding hiam zong i theih loh. Aw liing dalhdalh pian khat-in khuamial lak ah, “Pa, na om hia?” ci-in a pa sam hi.
Tua inndei sung mun khat a lupna tung panin a pa in, “Om mah ing ei, hih lai ah om ing ei, ihmu kik o” ci-in hopih hi. Tawl khat sung a daih deda khit ciangin tua naupang in a pa kiang ah, “Pa, kei’ lam nong ngah hia?” ci-in dong leuleu hi.
“Hong nga mah ing ei, ka mai nang lam hong nga ing ei” ci-in a pa in khuamuan kik hi.
A tapa zong tua a pa’ kammal tawh lungnuam pah lian-in ihmu kik hi. A pa amah tawh om gige hi. A pa ama’ lam nga gige hi. A lungnuam pah hi.
Pasian’ tano eite zong vantunga a om i Pa in hong ompih gigea ei’ lam hong ngat gige lam hong phawksak mahmah hi.
“TOPA’ mitte, a thumaante tung tu-a, ama bilte in a kikona uh ngai gige hi” ci-in Laisaingtho in hong hilh hi (Phatna Late 34:15 ZIV).
Khatveivei, i nuntakna sung ah buaina haksatna tawh kipaiikan gawpin lungkhamna leh lunghihmawhna vangik bangin pua keiikaii-a i om ciangin Topa sunga i khamuanna zong kiam huaihuai thei mawk hi. Tua bang hun ciangin i Topa eite tawh hong omkhawm den ahihna i mangngilh loh ding thupi lua hi. Khuamial sung mah ah eite’lam hong nga den hi, cih phawk ni.
Khatveivei, i mailamhun ding khawng ngaihsun-in i lungkia huaihuai thei tham hi. Kihta mai hi hang.Tua hunte leh kumte i Topa in a muhsa leh a theihsa hi, cih phawk ni. Amah “Alpha leh Omega” ahi hi. Eite hong ompih den tawntung “Emmanuel”ahi hi (Matthew 1:23). I omomna, i tuntunna ah eite’ lam hong nga den hi.
“Amah ka muh ciangin ka puk hi. Tua ciangin aman a taklam khut ka tungah nga a: “Lau kei in, keimah, a Masa pen le a Nunung pen ka hi hi. Keimah a Nungta Pa ka hi hi,. Ka si zo a, en in, a tawngungin ka nungta den hi! Keimah in sihna leh gawtmun tawhtangte zong ka tawi hi” (Kilaakna/Mangmuhna 1:17,18 ZIV).
Nisim i nuntakna ah lungnopna leh khamuanna i cihte koi pan hong pai ding ahi hiam? I kimuanna lehi lam-etna (our confidence and our hope) koi ah? I Topa longal eite’ kimuannading leh lam-et ding om lo hi. Topa i neih manin, Amah eite’ lam hong nga den ahih sawnsawn manin i lungmuang hi,
Nidang lai pekpek-a Ama’ mite thupha a piakna “Aaronic Benediction” khatvei ngaihsun kik-in eite’ adingin la-in eite’ tung tekah bulh tek dih ni.
“TOPA in note thupha hong pia henla hong kem ta hen;
TOPA in note tungah a maitang hong tan henla hong hehpih ta hen;
Note lamah TOPA hong nga henla, lemna hong pia ta hen” (Misimna/Gamlak Vakna 6:24-26 ZIV).
Amen. Amen. Amen. Hi takpi ta hen, Topa aw. Hi takpi hi, Topa aw. Amen.
Rev. Zam Khat Kham
Comment piaknop aomleh...