Tong Luansiam Lia Zozam – 2 ~ Hau Za Cin

Tong Luansiam Lia Zozam – 2

Zingsang thobaih in a maiphiat a, a laikhak ngahte thuk kik ding a gelh samsam hi. A lunglut lua khollo ahih ciang a gelh ding baih asa mahmah lel hi.

“U Kambawi aw,
Nang tawh i kitheih hampha ing. Nong hawh zelzel ding uh lamen ing. Kei bel sawt zong a taam ding hikei ing. Khuado Pawi bei leh a ciahkik pah dingka hih manin nong it taktak ding uh zong ka um kei hi. Nong it taktak uh leh ka khua lam vuah nong hel ding hi inteh. Kong deihlohna hi kei, ka dinmun kong genna hi. Na kamsiam bek khawng a tang ka hi phial zong nong laikhak ka ngah hampha kisa ing. Na kamsiam angtang, – Lia Zozam”

A dang khat Khualbawi ading zong a gelhzom pah vet hi.

“U Khualbawi aw,
Na vangkhua vuah vabang kong lenga, lungginloh na tongdam naubang ka saan manin hampha kisa in angtang mahmah ing. Ahih hang kei pen nong theihcian zong hilo, khualzin lai ka hih manin nong it taktak ding bel ka um tuan kei hi. Ahi zongin nong meltheihna a laikhak bel hampha kisa ing. Tongdam luansiam u Khualbawi aw, na thelnah laileng tongluan zaicin sutna khaubang ka hualhual ciang kei bek hilo lia paal zatam te zong na tongdam saang cimlah ding ciin ka kinem hi. Kei lah kungtung vasa tuang bang lel ka hih manin huihkhi dam seem in na lengkhia pah ding hi ing. Taka mel muh tongdam kisan loh ciang nang zongna lailungah hong ngilhpah ta ni cia. Na tongdam saang, – Lia Zozam”

Sun thapai in buhman su in tangho den uh a, nitak lam ciang a huan litlit uh hi. Khuado Singpua te zong hong tung damdam uh a, innka ah sing kiciang viatvuat ta hi. Khuado Vok ding zong innkatau nuai ah ngiit nguknguk zel a, innkatau khuam khawngah kitaat in a ging gamgam zel hi. Zozam pu leh pi zong tukum Khuado Innpi ding ahih manun a innsung uh hahsiang, a vante uh seng in innkhing leh mom khau teng munphiah tawh vaat siangin a hekciai thalthal uh hi. Zozam leh a nu in bel tanu te nasep huh in buhsep, vaimim su, nga tol, si su cih bangin zingah thai ah a annek ding uh a buaipih uh hi.

Tu kum pen ann piang bilbel ahih manin khuado pawi nopci mahmaha, khuazang bup in a lawp ciat uh hi. Hausapa veng ah ngial hoh Khuado do innkhat bangin voktal nih tak a goh sawm uh hi.

Nitak ann hong thuk khit ciang un Zozam zong a kuang la in a meh thuk a, mei gei ah ne dingin a tu ciil tetu hi. Tua laitak kongkhak hong kikiu a, Lianbawi, Khualbawi leh Kambawi te mah zawlhel dingin hong lut uh a, Zozam annekna gei ah Ciingtutphah tungah tuin mei awi kawmin Vok ann peuh ana toktok phot uh hi.

(zop lai ding)

Hau Za Cin
Phuitong Liim