Pasian’ Thupha ~ Lian Za Tuang

Pasian’ Thupha ~ Lian Za Tuang

Leitungah nopsakna khansauna thupha i ngah theih nadingin, thupha’ nakpi in Pasian ahih lam i theih khitah Ama’ thupha pen i pianna i nu le pa tungtawn bek pan hong luangkhia sak bek hi, cih thu tomno kong gelhkhia hi.

Tu laitaka i nu i pate pen pi hong kicih sak ta-a amau zong a beng khawng hong ngong ta, a zang hong kul ta,a vun hong ton-in kikol ta, a mai suahte hong pitek mel mahmah ta uh hi. Tua ahih manin khual-a om khempeuh in, i nu i pa a dam lai hiam, i ci zel dinga nu le pa tawh khuatual a, omkhawm tengkhawmte’n i nu le pa lungleng khuangai, gilkial dangtak le silsam tensam in om uh hiam, cihte i lungngai den ding hi.

Nidang dawi le kau biakna sungah i pu i pate’n a tate’ zi ding a mo dinguh a zon u teh u le nau mah tawh kizop suak ding a lunggulhna un, tanau lak mah na zong uha, a tapa in ngai le ngai kei le laak sakin, pawlkhat bangin a muh zong mu ngeilo liang hih tuak hi. Mo a zon u teh zong a tapa aading zi neih hun ta cih sa’ngin innma lo-ma lel lua i hih teh cih peuh tawh nasem dingin na kizong uha, thanuam mi a hiam cih pen a kizon ma un, nasia takin na ki-encik lai uh hi.

Nidang hunin numei pen nasem ding bekin kingaihsun kha-a, pilna sinna zongah zolai tan 4 a zawh nak leh numei aadingin pha zo kici ngiau hi. Innsung limlim pan kineubawl, kisila bawl paha, tuni ciang dongin eimi numeite’n namdang numeite zahin mazang zolo, ma phulah den zaw uha, tua mah pen i theih loh kalin a tu a tate’n mi i bat zawh loh i phak zawhlohna na hi gige hi. (Pa pil neite sa’ngin nu pil neite mi suak zaw a, pa tawh tagahte sa’ngin nu tawh tagahte mi suak zaw hi).

Tua manin numei khat in, pasal hong neih teh sila mun lian mah hi paha, a pasal nangawn tawh kiholim, kithuahkhawm cih om sak lo uh hi. Holimkhop hun ding a om sunsun lupna tung hi-a, tua nangawn lupna tung kihuauhuau lo ding cih thukham na nei sawnsawn uh hi. A kiho mun pian, a kithuah mun piante bang khuasungah “vatawt nupa” “sazaw nupa” cih bangin kidai sak pah lai hi. Annekna muhah tutna lo tawh tucil-a, zasan kuang zong sawk ngam lo uh hi. Genthei takin tekte’ khut sungah hong khangkhia hi. Sanggam aw, tua pen nang’ nu le kei’ nu hi zen hi.

Tuhun teh biakna (tapidaw) sungah kikhangkhia ta ahih manin pasalte’n zi it dan hong siam ta-a, nidang banga haksatna thuak i om lai hang, tampi tak kisuakta ta hi. Tua suahtakna sung pan a ngaihsut huai tampi hong om leuleu leh kilawm ka sa hi. Tua in bang hiam cih leh nidangin tekte thuaklah a om bangin tuhun teh mo thuaklah ki-om leuleu cih ahi hi. Mo thuaklah i nute bangzah genthei uh hiam!!!

A neu lai un, numeite sila banga a kimuhna innsung khuasung pan hong khangkhia-a, pasal a neih teh tekte’ khutnuai-ah sila bangmah in hong nung ta to hi. Tun mo nei-a, tua ci lai zen…aduh adeih, gen ngamlo, ngen ngamlo, ne ngamlo, dawn ngamlo, a tate hong lengla, pia ngamlo, bak ngamlo, hopih ngamlo, buipi leikei bangin a’ lamsa uh innsung nangawn-ah gal le sa laka om bangin kidawm takin nungta uh.

Sanggamte aw, i innsung bang dinmun-ah om hiam cih ngaihsun ciat ni. Innnuai a, i vok khawite bangin i pianna i nu i pate an a kham i piak bek tawh kem thei mahmah kisa kei ni. A thupi pen a lungsim zong ciat ni. Mi khempeuh a nuam thei, a dah thei, a heh thei, a nui thei dingin feeling tawh Pasian in hong bawl hi. I theih loh kalin i pianna i nu le pa in i’ zi bawl-in khitui a nul simsim kha hiam!, i tate hangin a dahdah kha hiam! A tate zukham, ngimna neilo nuntakna hangin a lungleng den kha hiam! Hi khempeuh pen, zi nei a om pasalte’ mawhpuak ahi hi. Pasal hoih in, zi hoih piang sak thei-a, zi hoih in, innsung nuam, vangam malep piang sak thei hi.

Leitungah sum le pai zongin lam tuamtuam tawh nopsakna ding thupha namkim hahkat tak i zon laitakin i pianna i nu le pa i lungkimsak hiam cih kingaihsun masa ni. Nu le pa kaantan in, cikmah hun in Pasian’ thupha nuntak nopsak khansauna thuphate ngah ngeilo ding hi hang. (Ephet 6:2-3). Muntuam gamtuam ah, Zomite hauhna nopsakna thupha lunggulhin i kikhenthang laitak, i thupha nak ahi i nu i pa i phawk kha hiam!

Amau tung na bawl bangin na tate’n hong bawl kik ding hi leh na sang ngam diam? A dahhuai takin pawlkhatte bangin a nu a pa inn pan a hawlkhia bang Zomi sungah ki-om ta zen hi. Thupha diktak i cihin sum le pai tampi neihna hi zenzen lo hi. Innhoih nono sungah lungkham sinkhamna tawh kidimin innkuan kima ankuang uumkhawm theilo mi tam mahmah hi. Pasian’ thupha in hauhna hong tun-a, lungkham sinkhamna tawh hong piakhawm lo hi (La.10:22). Ih thupha nak i nu i pa a dam lai hiam, thupha i dawh thei lai diam? Lian Za Tuang (1624 Westlake Dr. # 2403, Conway, AR 72034, USA)