Tong Luansiam Lia Zozam – 13
Zozam te nupa zong a kiten zawh uh kha thum pha pan mah leh a nupa lupna tunguh a lupkhop uh a zan thumna hipan ahih manin a lup pah uh hangin zan thapai ihmu manlo in…… uh hi! Mawngbang kawi cim manlo taikhuaval nading gilkhang bu-al hong khuanga, zingsang annek khit phet leh a pasal omna lam zuana dingkhia ding uh ahih manin ak masa khuan khit ciang a zan zuntha uh a lum kik nawn kei uh hi.
Zingsang ann ding huan in manlah keei uh a, a ki et tuah khak uh ciangin Zozam bang a maizum pianpian ahih manin a kun suk pahpah hi. Kha thum kiteng khin himah leh a zan thumna hipan ahih manin mothak mah bangin a pasal mai ah ann zong a bak muaimuai ngam kei hi. A pasal in lah theisiamlua ahih manin a maizumloh theihtheih nadingin a theilo akineih hi. Ahi zongin Zozam adingin a nat ciuciau lai tawh, a omdante uh a ngaihsut ciangin a maizum a pha taktak nai kei hi.
Khua hong vak ciaiciai ta a, akpi tui lai a gawh uh zong thuk tungah a so liahliahta hi. Zingsang ann limtak ne dinga, tua ciang paltan tumna lamah pai ding ahih man un a nu leh pa zong hong tho baih uh a, khuavak siangta cih ciang veng leh pam zong hong tung latlat uh hi.
Pastor omna khua hilo ahih manin ankuang umpih ding leh thupha piakna nei dingin Pawlpi Upa khat sam uh a, lungdam kohna leh thupha piakna a neih khit uh ciangin Aksa tui sa vitvit hawp kawm in aksa gim nam veuveu kiim ah a tukhawm liliai uh hi. Gilvahtakin ne ciat uh a, a dingkhia masa ding bang utlo hiphial leh kilawm in ann nek nuam asa uh hi.
Ann kham ciang innka ah Jeep hong kidawh a, a van teng uh guang in a puak ding uh ak gual nih zong Jeep lukhutungah a hencip uh hi. Munphiah leh seeng, lawhpi leh lawhdai honkhat zong Jeep nungah guang in Zozam te nupa bel a hawlpa gei ah a tu uh hi. A zin ding dang zong mi honkhat om ahih manun a nung buk ah van teng tawh tuangkhawm uh a, khuamual ciang a kha ding naupangte bel a bawm theihna peuh vuah zawng singkah mah bangin a luai ngeingai uh hi.
Pitekte lungleng in innkatau ah kap kheuhkheuh uh a, nong ciah kik uh ciang ko na om nawnlo ding hi ung. I kimuhtawp hikha ding hi ciin a khasia mahmah uh hi. Zozam teeknu leh teekpa zong a monu uh tha ne manlo kisa in a gen ding banguh theilo in kamka heuhou kawm in Jeep gei ah a kilehleh pong uh hi.
Lungzuan khuangaih la peuh ciamnuih in sa uh a,
“Nang pai lecin kei zuanglo ding maw,
Kua ta’n heh luan hong nemzo ding maw lawm….”
khawng peuh ciin la a kipaih khem gawpgawp uh hi.
A pai taktak ding uh ciang Upa pa dingto in:
“Topa Pasian aw, tu in ka it mahmah uh Zozam te nupa khuasung panin nasepna lam ah zinkhia ding ahita uh hi. Lam tawntungah na tonpih inla, sep leh bawlna khempeuh ah mavanna leh gualzawhna na piaksak in. Cidam lungnuama ka kimuh kik mateng uh nangmah khut ah kong kikemsak uh hi……. Amen.”
“Lungdam ei, Upa pa…”
“Cidam in va pai un, hong phawk mahmah nung….”
“Ko zong hong phawk mahmah ding hi ung….”
“Nu aw, Pa aw… cidama i kimuh kik mateng mangpha….”
“No zong lungnuam takin pai un, hong lung himawh kei un, na dam ding hi ung… mangpha…”
“Paita ni ei, Mawtaw sungah na lutta vo….. na tuang khinta uh hiam?”
“A hawlpa aw, na khawlpak o, hua pam ah ka pino in hong delh vangvang ei, na ngaklai pak ni ei…”
“Kinawh hen o…. i paina ding gamla si…. tun Ni sanglua ta hi ei….. ”
“Na ngak pak mai ni….”
“Huiha…. pai baih sawm si uh cia….”
“Pai baih hinawnlo e…. Ni sangta hilo maw….”
“Hih laiah, lampi ah na nek ding uh aktui huansa tang nih hong puak ing…”
“Lungdam si e….”
“Cidam na pai un maw….”
“Hi ei, cidam in aw…”
BYE BYE…… paita nung ei……
Bye Bye….. paita vo, paita vo….
Bye Bye…………
Sun annek hun in Cikha khua tung uh a, khuasungah ZONU HOTEL ah niangtui leh moh ne in, inn pan a puak uh aktui te a nek khit uh ciangin, meltheih lawm leh gual a muh sunsun uh tawh khut kilen in masuan a manawh kik uh hi.
Khuamui zuul in Tuithang Gunlei kan uh a, khuazing sungah mawtaw mei mit zel, mial zel, vak zel cih bangin damdam in mai a nawt litlit sam uh hi.
Khua lamah omte zong lungleng khuangai bangin na om uh a, Mo hoih Zozam leh a pasal, a khua uh pan paltan tum khat neih sunsun a zinkhiat vat uh ciangin misi nung mah bangin a dai diakduak uh hi. A pai zan uh khuasung dai khipkhep a, zan nai kua a cin ciangin khuasung mei khempeuh mit diamdiam a, nungak hel tangvalte zong ciahbaih in kuamah zan sawt tuu a om kei uh hi.
Ahi zongin khuavak kuan ciangin khuataw lama nupi khat in khuamual lam pan meivak thum kinawhsa a khua lam manawha hong tai a galmuh a, a lungnuamlo ahih manin a pasal phong in a gal et uh hi. Meide te zong khuasung hong lut ciangin khua sunga Hausapa inn ah hong lut masa uh a, tua panin datmei mah de liailiai kawm in tu zingsanga Jeep tawh a dingkhia Zozam te inn ah a lut uh hi. A lung uh nuamlo deuhdeuh ahih manin amau zong delh ding a sawm laitak un biakinn dak hong ging a, zan khuamial nuai ah biakinn dak…. sih dak hong ging cih a zak uh ciang a za peuhpeuh tho zangzangin kua hiam ciin a dak khia ngei ngai uh hi.
….. Zozam te nupa tuanna Jeep khuazing sungah Tuithang Gunlei a pelh khit uh ciang mual tampi kaan manlo in a meivak kisia a, a hawlpa in lampi mucianlo ahih manin lamkhang naihlua kha hi…. a kitheihna ciangah kuamah a suakta omlo tazen hi!
Sun sanga phazaw gam nuam om a,
I upna tawh kigal muh thei hi
Ei ading tua gungal gam pha ah
I Pa’n om nang hong bawlkholhsak hi.
Nung ciangin a nopna
Tua gampha ah i kimu ding hi
Nung ciangin a nopna
Tua gampha ah i kimu ding hi.
Topa in mo hoih Tong Luansiam Lia Zozam leh a pasal Ama kiangah tawldam takin khawlsak ta hen!
Mangpha.
Hau Za Cin
Phuitong Liim
Comment piaknop aomleh...