Upna si ~ David Tuang

Upna si ~ David Tuang

“Tua ahih manin hu a diik lo, hu a sang lo pumpi pen a si ahih mah bangin sepna tawh a kizom lo upna zong a si ahi hi.” (James 2:26)

Bangzah takin Pasian thu um ing na ci-a, ka hih zawh zahin, Pasian’ min leh gam adingin kipia khia ing, na ci phial zongin, na upna ii deihna bangin sepkhiatna tawh na nuntak kei leh na upna a si ahi hi. Jesu bang teekteek in i nungta zo kei dinga, ahi zongin Jesu nei taktak ing i cih leh Jesu zia dan khat beek tawh i nuntak/kalsuan ding bel kilawm mahmah ding hi.

Piangthak ing cici napi-a, piangthakte’ nuntak zia ding tawh kilawm ciang khat tawh i nuntak zawh loh pen zumhuai mahmah hi. Thu-um lo mite’ kam panin, “Zu na dawn uh leh, Tapidaw-te hong kisa kha ding,” cih khawng i za kiaukiau zel hi.

A taktak in ci le’ng Tapidaw sungah mite’n hi bang hong cih theih nading dinmun cianga om kitam lua cihna hi-a, ana mahmah thu leh a zumhuai mahmah thu ahi hi. Jesu nei-in a piangthak khinte pen, mawhna pan suakta in nuntakna thak sungah a nungtate ihih manin, siatna peel a hoihna delh ding ahi hi.

I taksa pumpi hoih maw hoihlo, cih itheih theih nading leh a hoihlohnate iki puahphat theih nadingin, nisim in limlang mai i tun’ det mah bangin, i upna ii deihna tawh kituak in nungta maw nungta lo cih itheih theih nadingin, nisim in kha limlang tawh ki-et det ding ahi hi. Eima gamtatna ciat lungngai kikin ka upna pen, “UPNA SI” ahi kha tam maw, cih ei-le-ei kidong in kisit pha kik ni! “Gamtatna in a zui lo, upna guak pen a si hi.” (James 2:17). Khazih sungah, David Tuang