Singapore, Sentosa aom Tiger Sky Tower vandawn ah nai 4 sung awkcip

Singapore, Sentosa aom Tiger Sky Tower vandawn ah nai 4 sung awkcip

Singapore, Sentosa aom Tiger Sky Tower pen vandawn ah akahtoh laitak in awkcip in, kumsukkik theipak nawnlo ahih manin nai 4 sungbang vandawn ah awkcip cih Straits Times pan kiza hi.

Hih Tiger Sky Tower vandawn ah a awkcip laitak in asungah Passenger mi 39 tak atuan laitak ahihi. Aset siatna om “Mechanical Fault” om ahih manin, Saturday nitaklam 5:35pm hunpawl akipan vandawn ah awkcip hi.

Hih a awkcip te lakah gamdangmi Vietnam Tourists honkhatzong kihel uh ci a, naupang zong 4 kihel uhhi.

Tiger Sky Tower pen vandawn ah akahtoh laitak asanna na Pi 82 (Meter 25) atuntoh laitak in awkcip in kikhin theinawnlo, kumsuk zong kumsuk theinawnlo in awkcip mawk hi.

Vandawn ah a awkcip te lakah aset ahawl Operator khatzong kihel in, tuapa’n asung ah atuang te dawnding tuikhawng leh nektheih pawlkhat nakem bilbel in tuate piakawikawi cihi. Tuaban ah Mobile Toilet ci’n dailentheih nadingzong ombilbel ahih manin asungah atuang Passenger te nai 4 sungbang a awkcip uhhang in acimawhgawp, agilkialgawp omsamlo uhhi.

Video: 39 people stranded mid-air on Sentosa’s Tiger Sky Tower ride for 4 hours

Nitak 5:35pm hunpan in vandawn ah a awkcip pen nitak 9:44pm hunciang in anuai ah kumsukkik theipan uh cihi.

Banghang in asetsia, Mechanical Fault pianghiam cihpen kitheician nailo a, Tiger Sky Tower thunei te’n hoihtak kancian laiding uhhi. Akumsuk kiktheih akipan Tiger Sky Tower pen ki khakcipphot hi.

Hih Tiger Sky Tower pen tuipi maitang Sea Level panin Pi 430 (Meter 131) asangin akibawl hi a, Sentosa Website te genkhiatna ah hih Tiger Sky Tower pen asangpenpen “Tallest Observatory Tower” ci’n aciapteh uh ahihi.

Related: Singapore ah aki lamsan lei kicim in mi 1 si, adang mi 10 liamgawp

Hih Tiger Sky Tower pen 2004 kumin mipi zattheih dingin aki hongkhia hi a, akigawm in mi 72 bang atuangthei dingin akibawl ahihi. Vandawn ah akahtoh kawmkawm in Singapore gamsung khempeuh aki galmuh, gal et theiding in 360 Degree Panoramic View ci’n damdam in akipei dingin abawl uh ahihi. Sawltak #zomidaily