Thuthak tomkim ~ The Tedim Post (17 Aug)

News In Brief: Thuthak tomkim ~ The Tedim Post (17 Aug)

Tedim Zatopi aa Case-341 leh Case-344 te pen August 14, 2020 zingsang lam nai 10:30 in cidam takin Zato tuak ta uh a,a inn ciat vuah Home Quarantine ni 14 sung ki encik lai ding uh hi. Tulaitak Tedim Zatopi ah cina pasal 3 omlai hi.

Tedim Township ah Covid-19 hang a innkuan sung sumlutna om ngiatlote ading ngaihsutna in World Food te tawh kipawl khawm a Cash For Work cih project kisem khia hi. Cash For Work cih project pen sumlut om theih nadingin nithate pia pah in akisemkhia project hi a, tulaitak in Tedim Township a khua 35 te ah kipan khia zota hi.

August 14, 2020 in Myanmar gambup galkap mangpipa Min Aung Hlaing leh 2020 kiteelpi ah a demding party 34 te Nay Pyi Taw ah kimuh khopna nei uh hi.

Myanmar gambup ah High School om 7,173 lak pan cidamna lam thukhun tawh kituak sanginnpi 4,156 te kihong sak kik khinta hi, ci-in August 11, 2020 ni-in kumpi lam thunei ten tangko uh hi.

August 13, 2020 ciang Myanmar gambup ah COVID-19 natna ngah mimal 361 lak pan 61% tung bangah natna symptom kidawklo hi, ci-in cidamna lam kipawlna in gen khia uh hi. Leitungbup huam in hileh natna symptom alak lo pen Research bawl kipawlnate genna ah 40% bang om hi, ci uh hi.

2020 kiteelpi ah Kawhmu township pan dem dingin form khia State Counsellor Daw Aung San Su Kyi pen mimal aituam in a dem sawm ahi U Htay Aung in Commission zumah Daw Aung San Su Kyi pen thukhun tawh kituak lo hi ci-in akhiatna vai tawh kisai District Commission in nial uh hi.

Thailand gam, Leikchun a mithat a aki ummawh Myanmar gammi Win leh Zaw pen Thai thukhenzum in sihdan apiakna pan August 13, 2020 ni-in khantawn thongkia dingin thuneiten khiapsuk sak uh hi.

More: Opinion: A lunglut huai Zogam MP Candicate te ~ Pu Go Sawm Khup

August 13, 2020 ni Leitung bupah Covid-19 natna ngah Tein 210 val(21,498,193), asi Tein 7 val (771,805) leh adam kik Tein 100 val (771,805) phata hi. Source : 7day news, , Eleven Media, The Myanmar Times, VOA Burmese, IRPD Tedim. Thukai khawm : Lia Lu Lun, Lia Shang Shang.