Zomi Aksipi khatin Australia ah mualliam
Tuni 15/08/2020 Saturday ni pen Zomi leh Zogam a vei, a it, apuah azun Dr. James Suan Za Dong in a tenna Sydney ah mual hong liamsat ni, lei ah a kivui ni ahih manin zahtakna I pia hi. A tangthu a kigelhte leh ama laigelhte I simteh Zomi min amawk otpihpih leh sum ngahnading, panmun ngahnading in a zangh hihetlo ahih lam aman nuntakzia pan tampi kimu thei hi. Doctor mawkmawk hilo a Post graduated leh Eye Specialist ahi hi. Kawlgam aom Zomi sungah a masa pen pawl hiding in ka lamen hi.
Zomi min hong piankhiat dan pen Zolai, Manglai leh Hakha lai nangawn tawh ama ang-ip sung sawk in tangthu akan research abawl khat ahi hi. Zomi vai ama tangthu sutsangin a cikzaw a kicianzaw a sut, agelh ka zakha, ka simkha nai kei hi. Tua I zat Zolai Roman Alphabet tawh a kigelhma in Pu. Pau Cin Hau Laibawl Zotual lai tawh ZOMI kigelh khin ahih lam mipil tampite lak ah agen masa, a gelh masa amah hiding hi. 2017 kum Zomi Innkuan Australia ah President ka seplaitak makaite thukimna tawh Khua Do Pawi Brisbane ah zinmangpi dingin kisam a, tua hun pen maitang kimu a kiho masak ahi hi.
Ciah leh kuan dawnthei khathei ka hih manin hampha ka kisa hi. A Mangpau awsuah ahoih dan, mangpau asiam dan, manglai gelh asiam dan Zomi khangmasate lah ah top one pawl hiding in ka lam en hi. Bang hangin hici siamzawh na hiam cih ka dot leh Tedim ah a neulai Missionary te kiangah limtak sin ban ah amah zong ukngiat ahih na leh University a kahteh a siate un siamsalua ahih manun Manglai hun ah a pualam ah omsak ahih na thu hong gen hi.
Tua ban ah 2018 kum Refugee Council of Australia makaite vaihawmna tawh Sydney ah leitung mun tuamtuam pa’n Meeting hong kaikhawm uh a, kei zong ciah leh kuan vanleng ticket hong leisak ban-uah ka tunnading Hotel hong vaihawmsak uh ahih manun ka va kihel thei hi. Hih meeting manteh gamlata leh Zomite it ahih manin Dr. Dongnote inn ah Taxi sapliang in ka vabang hi. Ka ciahdingteh TAXI man sumtamlua hi ci-in BUS matdan hong hilh in BUS ngaknaciang a Mawtaw tawh hong khangiat hi. A khua uh Kaptel mei apiak vai a zi hanciampih ahih dan leh a zi in hanciampih kei leh ama kia in hihzoloding ahih lam zong hong gen a, namdang zi neih veve mi thupi khat neikha ahih lam hong phawksak hi.
Thu manpha tampi hong genlak ah mipi theihding thupi kasak pawlkhat in tua hunlai tak Zomi vai Hakha lai tawh agelh pen leh a kaihkhopte Sia. Khamno (Mualhoih) ahih sakna thu zong hong gen hi. Ke’n bel ZYA makaite hih sakzaw lecin manlang leh kician zawlo ding hiam ka ci hi. Hakha te mipil pawlkhat zong editing bawlsakding ahih na thu leh Hakha gam aom tualsuakte sungah mi a tamzaw in Zomi pomthei I minam min dik hizaw hong ci uh cih thu hong gen a, tha ngah mahmah hi.Tu-in bangciang kitunta hiam cih ka zakik naikei a ka lung himawh hi.
Tua ban ah Zo Zumpi I cihcih Kawlpi panin Hakha ah bang hanga kituahto cih leh a Hakha te mawhna na himasalo in Tedim gamsung aom mi makai pawlkhat in amau te’n na khua inn 30 kim bek hinapi in tua mun ah Zo Zum a tuahsawm uhteh a lawmte un hi nasatheilo uha, Tedim ah tuahni naci zaw le uh Kawlpi tawh lah kinai in amun leh a inn in pia a kingah mahmah ding hi, amau khua ah koihding a kisantheih lohteh Hakha ah tuahding amau na thukimpih uh ahih manun Hakha ah Zo Zumpi a kituah hi hong ci hi.
Tedim ah Zo Zumpi (Chin Affair Zumpi) omding, Chin State Capital Tedim ahih ding a deihlo pen Tedim gamsung aom ulian masa pawlkhatte mah na mawk a, a mipihte sangin mi dangte a itzaw I gamsungah I om manin I gam leh I minam a khantohding zah ki khangto theilo ahih na zong hong phawksak hi. Tulai tak hici bang dinmun a Zomite I omna pen nang leh kei khialhna ahih loh lam zong hong phawksak hi.
Ahi zongin Dr. Dongno lungkia hetlo hi. “I have a dream dreams” cih lai agelh mah bangin kei mimal kiangah hong genna ah zong nikhat niteh ei Zomite hun hong tungding hi, Pasian in hong lamto ding hi, Pasian nei hi hang, I omna peuhmah thuman in cihtak peuhleng cih hong gen a thangahhuai mahmah hi.
More: Chin/Zomi te leh Australia Citizenship vai Update
Gennop tampi tawh tuazah ciphot ni. A kha lungnuamin na tawldam henla a nusiat a zi leh a tate, a innkuanpih leh a lawm leh gual a kua mahpeuh Huhpa Kha Siangtho in hong hehnem hen. Ama vision om mah bangin Zomita ding zing nithak, aksi thak hong suakding hi. Rev. Do Khan Khai
Comment piaknop aomleh...