Thuthak tomkim ~ The Tedim Post (14 Aug)

News In Brief: Thuthak tomkim ~ The Tedim Post (14 Aug)

Chin State, Thantlang Khuapi ah Porcine Circovirus Type-2(PCV-2)akici Vok natna hangin April 20 ni pan tuni dong Vok luang 1360 val bang si ta ci hi.

UNHCR in Myanmar gam COVID-19 natna dalna, kibawlna dingin US dollar 2.3 million man zatui zaha te August 12, 2020 ni-in Nay Pyi Taw khuapi ah kumpi teng tung piakna nei uh hi, cih thu kiza hi.

Covid19 natna hangin mimal 15 val om khop lohding thukhun pen Aug16, 2020 ni-in ‘Ministry of Health and Sport’ in mimal 30 in khiam suk hi.

State Counsellor Daw Aung San Su Kyi leh Shan gam mualmi thautawi kipawlna ahi RCSS maikaipi pa August 12, 2020 ni-in Nay Pyi Taw ah kimuh khopna nei uh a, gamsung kilem nading leh khantoh nading vai kikum khawm thei uh hi, cih thu kiza hi.

Rohingya mimal 750,000 te Bangladesh ah Myanmar galkapte in hawl khia in Rohingya 600,000 kiim bang Myanmar gamah om lai ci hi. Rohingya atam zaw Myanmar gam mi in ki simlo a 2020 election ah zong mee piak khuan nei lo uh hi.

Japan leh South Korea gamte ah nasem ding a pai nuamte ki paisak theita hi, ci-in MOEAF Vice President ahi U Peter Nyunt Maung in gen hi. Hih a painuamte adingin COVID-19 natna neih leh neihloh kisit masak kul ding a, a kisit man mikhat teh 200,000 ta bei ding ci hi.

USA kumpipa Donald Trump in August 10, 2002 ni-in COVID-19 tawh kisai news conference a neih laitak White House kiimah thau ging ahihman in hall sungpan themvei kihemkhia a, tawlkhat khitteh zom kik hi, cih thu kiza hi.

New Zealand gamah COVID-19 omloh zawh ni 102 khitteh Auckland khuapi ah mi 4 tungah natna mukik uh hi, cih thu kiza hi.

UK ah Covid-19 lockdown hang in April – June kha 3 sungah kha masa kha 3 te sang in a sumbawlna uh 20.4% bang kia zaw ci hi. Sumbawlna kiatna hangin nasep neilo ki behlap a, April – June kikal kha 3 sungin nasep neilo Tein 220,000 bang ki behlap hi.

More: Kei le Tedim NLD candidate vai ~ Lian Tuang

August 13, 2020 ni Leitung bupah Covid-19 natna ngah Tein 200 val(20,668,102), asi Tein 7 val (750,429) leh adam kik Tein 100 val (12,862,282) phata hi. Source : 7day news, , Eleven Media, The Myanmar Times, VOA Burmese, ALJAZEERA, Taung Zalat Time Media. Thukai khawm : Lia Lu Lun, Lia Shang Shang.