Vompi Khat le Lawmta Nih
Khat vei, lawmta nih vasa beng dingin gamsung hong vak khawmuh hi. Gam thuk sim pian dong hong tunguh-a, ganhing lauhuai khat peuh in suam theih ding lam thei tuak uh ahih manin khat le khat kamciam kipia uh hi. Tua pen : Khat in alau huai thei thu khat pepeuh I tuah a leh kipanpih ding, kihon ding hi hang: cih thu ahi hi.
A sawt het lo-in vompi golpi khat hong tuak petpet uh hi. Vompi gal muh masa pa zong pau lo, phun lo-in sing kung tungah kah to vingveng hiau hi. A khat pa ahih leh vompi lah hong nai luata ahih manin singkung tung kah ding peuhmah hi thei nawn lo ahih manin lei ah bok sukin nak lo-in asi kineih hi. Vompi in vaneihin a bil, a lu teng a-va nap chuamchuam khitteh bangmah cih lo-in paikhiat san bilbel hi. Anungta 
nawn lo, a-sisa limlim vompi in bangmah acih selo dan na hih tuak hi.
Vompi gam lapi a tunkhit ciangin singkung tunga pa hong tuaksuk in, “lawm aw, vompi in hong neh zawzen veh ee, na bil gei-ah bang teng hong gen sim khiankhian a hia?” ci-in hong dong hi. Leilak a asi kineih pa zong hong thoto in “lawm aw, vompi in a citak lo, kamciam a pelh thei na lawmte um nawn kei in” hong ci veh aw. ci-in dawngkik hi.
Khat veivei eite in zong kamciam piak ding haksa salo napi hangin kamciam bangin gamtat ding pen baih het lo thei hi. Kamciam kimawk piak ding hi lo, kamciam I kipiak nak leh lah pelh loh ding thupi hi. Bangzahta in lawmlegual in I kineih phial hang hamsatna I tuah tatak teh hong kitaisan vingveng thei zel hi. Leitungah lawm hoih ding pen haksa mahmah hi. I lawmte zong hong sihpih ngam ding zahin upluat muanluat theih hikhin lo thei hi.
Bill Gates in “Na cih theih mahmah hunin mi tampitakin nang hong thei dinguh aa, na cihmawh mahmah hun in na lawm hoih penpente bekin nang hong thei dinguh hi” cih khat gen ngei hi. Na lawmnu/lawmpa a dingin nang e? lawm hoih khat na hi zo diam? Vaphual itna I cihcih I minam sungah a nungta lai hiam?
Khat Thang
Comment piaknop aomleh...