Thuthak tomkim ~ The Tedim Post (10 Aug)

News In Brief: Thuthak tomkim ~ The Tedim Post (10 Aug)

Myanmar gambup Tan 10 laivuan sangnaupang 910,229 lakpan 291,798 in gualzo uh ahihman in percentage 32.06% ahi hi. 6D ngah sangnaupang 794, 5D ngah 1831, 4D ngah 2976, 3D ngah 5662, 2D ngah 12957, 1D ngah 37152 hi-in 6D ngah a tampen na mun Mandalay Division pan sangnaupang 145 in ngah uh hi.

Tan 10 gambup pass percentage ah Katha Gilbem pan a laivuante 100.00% ngah uh ahih manin Boarder minthang pente sangin zong Katha Bilbem pan a laivuante a hoih pen suak hi. Kumpi nuam a Gilbem limlim sang inn 11 pan laivuante a vek un 60.% passed uh hi.

Myanmar gamah ni 70 val Zato lup khit nungah Covid-19 natna lungno neilai mimal 4 om ci hi. Tuate in India gam pan May 29, 2020 ni-in hong ciah Case 208, 211, 214 leh 219 te ahi uh hi.

Thura U Shwe Man makaihna ahi Union Betterment Party in 2020 kiteelpi ah Township 261 pan mimal 927 in ka dem ding uh hi, ci-in August 8, 2020 in genna nei a, a makai pipen ahi aman bel dem sawmlo in Party zawhna dingin ka panpih zaw ding ci hi.

2019 kum Myanmar gamah mimal khatsim i sumlut US dollar 1390 pha ahih manin World Bank te i ciaptehna ah Low Income Country pan Lower Middle Income Country ah khantohna nei hihang, ci-in kumpi lam thunei U Maung Maung Win in gen hi.

Dr. Thet Thet Khaing makaihna ahi People’s Pioneer Party(PPP) in 2020 kiteelpi ah minal 230 val tawh State leh Division 11 ah ka dem ding uh hi, ci-in tangkona nei uh hi.

August 6, 2020 ni-in Brazil gam a om ahi Christ The Redeemer Statue tungah Lebanon gam Beirut khuapi a piang puahkhapna ah sihna/manna tuak te panpihna lahna in Lebanon gam lan(flag) meitawh kap in lunghimawhna lak khia uh ci hi.

Bangladesh gam seh 3 suah seh 1 tuiciin tung ahih manin mimal 160 val si in mipi million 1 val bang inn leh lo nusia in tai uh hi. Buhlei Acres 197684.31 val tui in tumcip hi, ci-in gen uh hi.

US Kumpi in Covid-19 hong lan a kipanin nasep neilote leh nasep khawlte tungah kal khat $ 600.00 ta a huhna pia ngekngek a, nasemte sangin nasep neilote nitha tung zaw, ci uh hi. Tu-in ahih leh Pu Trump in nasep nei lo thadah kibehlap lua, ci-in kal khat $ 400.00 ah khiamsuk hi.

Tik Tok Application tawh akibang Reels a ki ci App khat Facebook in USA gam leh gam 50 val ah August 5, 2020 ni-in zangsak ta ci hi.

Lebanon gam Beirut ah puahkhapna a pian khit a zingciang in Dubai pan tai 30 kiim a gamlatna a om United Arab Emirates (UAE) gam Ajman Market pen Wednesday nitak in meikatna piang a, meiphelh ten nai 3 val bang phelh khop mahmah uh ci hi. Hih meikatna ah sai 125 kiim bang kang tum a, a si leh aliam/abai bang mah omlo cih kiza hi.

More: Zogam makai kiteelna ~ Pu Go Sawm Khup

August 9, 2020 ni Leitung bupah Covid-19 natna ngah Tein 190 val(19,690,080), asi Tein 7 val (727,897) leh adam kik Tein 100 val (11,963,442) phata hi. Source : 7day news, , Eleven Media, Myanmar Times, DVB, Irrawaddy, Fox News. Thu Kaikhawm : Khai Khai, Lu Lun, Sian Kop.