2020 ciang kua teel ding? ~ Pau Khat Suan
Kapiak loh ding bel thei ing. Kapiak ding bel thei nailo, ami en in pia ning kici ciat.. kici ven maw… 2015 in ASSK in ami en kei unla, a party en un.. ci. Tuahun khuahun tawh kituak mahmah dan hi. A sisa nangawn telcing kha zawzen. ZCD in zong tua mah etteh.
Tun NLD & ASSK in hoh bang a gen mah hiam aw… gen a nei nai mah uh hiam? En kua etteh leuleu ding? CNLD ong kisan keei ahih ciang ZCD pen ZNLD a laih ding maw? i Zomi lungsim leh tualsung politics! “Ami en kei un, a party en un” cih mah lenkip lai ding maw? NLD husa ngak lai phot ding maw?
Kawlgam Zomi party thudotpi ZIUSA in hoh bang gengen ahiam aw? Gam khat sung a Kawl leh Zomi gamgi genloh Len nupa nangawn kemlah dekdek, butu hal bang a kuang vat mitvat politics tawh international border kantan a Zomi Parliament mah gengen lai ding ihiam aw… UN a Yaser Arafat tutphah gal-et maimai ding maw leh?
Innphual ngak Zomi upate’n bang ngaihsun? LKY in gamdang mite’ khuak kawm, tuate thu dong a kum 50 sung a Singapore buannawng lak pan van holhsak aive. Tulian laitak leitung a university hoih pen no. 11 leh 12 Singapore ah piangsak zo. En bel i tan 10 sang innpi nangawn gal-et kik man naikei vehang in maw…
Leitung a uk ngei British Kumpi i cih confederation tawh kibelpawl gam in constitution bupi neilo. Leitung a ahau pen USA Federal Constitution tawh kilam. Zomite’n i etteh, i mitsuat sim gige India zong Federal Constitution tawh kilam. Kawlte’n bel bangbang a kigen zong in Sen/China mah mitsuan a a etteh gige uh hizel.
Kawlgam suahtak lak ding, 1946-47 Panglong conference leh Panglong Agreement pen tuahun ( leh tudong kikhel lo ) hong uk kumpi UK ii confederation system mitsuan kawm a thukimna hi simpian gige. Thukimna suaikaih khit ciang AungSan in U Chan Htoon Constitution draft ding tawan pia, Confederation ahi nuam ahih leh Federal zong ahi lo, unitary lak ah a suuksia pen Socialist constitution azang Yugoslav Constitution 1946 etteh a draft bawl pah.
AS leh a lawmte si zenzen lo hileh Newin’ khang i cih 1962 pan a kum 26 i sim pen 1948 pan a sim kipan ding ahi zaw diam cih huai mai thei.
More: Myanmar ki-ukzia a nopmawhsak pen GAD department vai
Aih leh tun…. Kawlte’n bang mitsuan a, koilam manawh? Kawl ahi lo nationalities dangte’n bang mitsuan a, koi lam manawh? Zomi i sanggamte’n bang lungsim nei? Bang mitsuan a, koilam manawh? En ee?… i mitsuat leh i manawh, i neih leh i deih, i hanciamna leh i lam-etna … ciantak i theikim beek hia le? I nei beek hia le? Politics thu vaihawmna lampi tawn a ong makaih ding .. Bangci bang a, kua teel ding? Pau Khat Suan
Comment piaknop aomleh...