Afghanistan ah US leh a pawlte kisuam, US galkap nih sihlawh

Afghanistan ah US leh a pawlte kisuam, US galkap nih sihlawh

Nov. 4, 2016: Nung kha in Talibante a lutna Kunduz khuapi panin Km 5 kiim-a gamla Buz Kandahari khua-ah zan nitakin US leh Afghan galkap kipawlte Talibante not khia dingin a pai lai un Taliban ten na suam in, US galkap nih kaplum uh hi. US galkap ten amau leh Afghan galkapte huh dingin tung lam panin huhna ngen uh a, tua ten tung lam panin khua sung mite (nautang) omna mun kapin, nautang 30 val kaplum pong uh hi.

“Ka kipawlpihte uh Afghan galkap ten Afghan Operation kici a bawlna uh ‘group’s operations’ kici va kihuh a, Kunduz khuapi nawl-ah suamna kituak in, galkapte huh leh gum dingin tung lam panin huhna kingen mah hi,” ci-in NATO-led Resolute Support mission makai Brigadier General Charles Cleveland in ci hi.

Nautang ten sihna tuak hi cih ngawhna pen nakpi takin poi kisa a, hih ngawhna nasia takin (seriously) in kila a, lungsimvut mahmah hi ci-in gen beh hi. US ten a galkap uh sihna tuakte min pulak khia nuam nai lo uh hi.

Taliban ten thupulakna a bawlna uh-ah US galkapte Taliban galkap thum man dinga kuante lakah hong kihel uh ahih manin kikap a, kikaptuahna mun-a nautang omna mun tung lam panin pheng kap uh a, nautang mawhna nei lo tampi that uh hi ci-in gen uh hi. Nung kha in zong Talibante Kunduz khuapi ah va lut uh a, a lak zawh loh hangun Kunduz kiim lianpi uk uh hi. Nung kum October kha in zong US ten tung lam panin Kunduz khuapi-a Doctors Without Borders (MSF) hospital bukap uh a, mi 42 kaplum in, mi 37 kapliam uh hi. A site lakah MSF staff 14 leh damlo lupna ngak 24 kihel hi.

Afghanistan pen US leh a pawl ten 2001 in na sim uh a, kum 15 galdo in om ta uh hi. 2014 in gualzawhna kingah ta hi ci-in galdona taktak “combat operations” kici Talibante a dona uh khawlsan uh a, ahih hangin tu-in US in a galkap muan mahmah teng “Counterterrorism mission” kici kibawl ding leh Afghan galkapte training pia dingin galkap 8400 val NATO-led Resolute Support mission kici ah kihel dingin koih lai hi.

US in galdo kizo khin hi ci-in a pulak khit 2015 kum in ANDSF personnel kici Afghan galkap 6,637 a sih banah 12,471 in liamna tuak a, tu kum bekin zong sihna tuak galkap leh nautang gawm in 5,500 val ta a, Taliban ten gam lian zaw sem keek tektek in, kum dang sangin a zavom (opium) uh zong tam piangkhia zaw lai a, tu kum in 45% in tam piangzaw lai ding hi kici hi. -The Diplomat/The Hindu/Al Jazeera News And News Agencies Thang Khan Lian