Thupha ngah ZOMI kua hiam?

Thupha ngah ZOMI kua hiam?

Lamka, India ah kumsim aa akizangh den khat ahi 2007 or 2008(Akum cian nawn keng), Tedim Chin Student Association (TCSA) Annual Conference lai in Kawlgam pan zin(guest) in Pu Vum Nang hong kihel hi. Hun kigaak pian ahihman in thugenna tomcik hong nei hi. A thugenna ah “Thupha ngah Zomi na cih uh kua hiam? Pasian zat minam Zomi te na cih uh kua hiam? Hong paipih uh, munuam ing” ci in hangsan tak leh khasiat huai tak in mipi mai ah hong gen hi. Thupi leh maan sa lua kahih manin tomcik kikum ni.

Thupha ngah ZOMI te!!!
Amasa in Zomi te i om om na gam ah i dinmun enphot ni. Thupha ngah minam taktak ihi hiam? USA, Australia leh gamkhangto te i tun theihna pen i theihsa hi a, gengen nawn kei ni. I nasep enkik ni. Mi’ nasem in i om aa, i nasep taangpi pen general works ahihi. Pilna leh Siamna taktak tawh, Ball Pen leh Computer bek zangh aa nasem i minam sung ah Percent bangzah apha tam??? Thupha ngah minam ihi taktak nai hiam? I minam sung ah i makai te enleng, full time a sem, nasep dang neilo aa Zomi te khantoh na ding bek angaihsun bangzah i nei aa? I mihau te eleh? Tutung tuikhanna vai ah etpak ding in mihau aa i theih khat ahi Pu En Kap in GZA tung ah Kawlgam sung teng 3 pia demdam keei sam hi. A baan eleh? I minam bup nisim nek leh tak zonna ah agentham ding thupha ngah Zomi i nei nai hiam? Minam dang te in, ‘Ko nei ung’ acih leh ‘Ko zongh nei ung’ aci ngam ding mihau i nei nai hiam? Hihthu te i om muang kawm in ngaihsun leng deih huai isa hi. Thupha ngah minam ikicih tei sam hang in i nuntakzia pen minam khangto te kibanzo naidek lo hi cih pen kilangh mahmah hi. Minam khangto te’n ngeina zah phial aa aneih uh ahi secular lam ah degree ( B.Sc, M.Sc, BBA, MBA) ngah te khawng peuh i thuthak (News) hilai tazen hi. Tua te thupilo aci hizen zen khang, i dinmun ka gennopna hi. Pilna deihtak sinlai ni, khantohna ding deihtak pi mah in hanciam lai ni ci in kong zawn pha pha nuam hi.

Pasian mizat Zomi te!!!
A masa in Cope Topa Zogam ah hong pailai in hamphatna leh nuntakna nuam zong aa hong pai hilo hi. Leitung nopsakna khempeuh nusia in, a noplo penpen leh ahaksa penpen munah luangkhaam in hong pai aa, ngahkik ding lametna khatzong neilo hi. Pasian thu azakha nailo leh a theikha nailo te kiang ah sihding nangawn lau lo in hong kuankhia hi tazen hi.

Khaileh Guai, Pasian zat minam ikicih theih na ding in Pasian a theikha nailo te kiang ah mi bangzah missionary i kuankhia ta ale? Tulaitak America gam ah Pastor leh Pasian nasem te akuan aciah kikhel ziahziah in, akidem ibang keei zezen hi. Ei minam sung mah, Pasian thu ineu tuung pan i sinsa teng mah ki hilh-kik-kik(Remind) denkeei zezen ding ihiam? Hih vai ah Sia Do Khup thupi sa in etteh taak kasa hi. Kawlgam Kanpelet (Spelling ka khialh leh hong maisak un) gam ah anasep nate i muthei hi. Pawlkhat te in, Cope Topa i Zogam ah Missionary in hong pai aa, tun ei Pasian nasem Missionary in America ah kikuan ta hi, Pasian zat minam hihang ci in thupha ngah ikisa lua thei hi. A taktak in cile hang aki lamdanna khat zongh om kikeuh lo hi. Eisung mah ah Pasian thugen i hilel aa, kampau kibang leh minam kibang teng i omna na ah ki nung delhdelh ihilel mawk hi.

Tua ahihman in khatvei TAKKHEH!!! ci in thasaan kik ni. Pilna deihtak sinlai ni. Hauhna leh khantohna ding lampi om khempeuh deihtak zong lai ni. Hihciang tawh nasia ikisak peuhmah leh midang ten hong khensa pen, hong khengto vava zaw kaan laitham ding hi.

“Pasian zat minam, thupha ngah minam” taktak ahi ding in ibiak Pasian in ZOMI mimal khempeuh i omna ciat ah, dawm hetlo in athupha tawh hong phungvuh tahen.

Itna leh deihsakna tawh,
Zoheisa, Lamka