Khuado & Zomi Tapidaw te kizopna ~ Mang Cin Pau

Khuado & Zomi Tapidaw te kizopna ~ Mang Cin Pau | Ngeina Omzia Laisiangtho tawh Etkakna

Bulphuh Laisiangtho :: Tua ahih manin, mi khat in Khazih sungah mi thak (Piansak thak) hi. A lui nate beimang in na khempeuh a thak a suakzo hi (2 Kor. 5:17). (KJV). Thukham nuai ah omlo in hehpihna nuai ah om na hih manun mawhna in note hong uk nawnkei ding hi… i bawlbawl peuhmah kei ding hi (Rom 6:14-15). (KJV). Thumaan na thei ding uh a, thumaan in note hong suaktasak ding hi (Jn.8:32). Tua ahih manin Tapa in hong suahtaksak leh a suaktate taktak na hi ding uhhi (Jn.8:36). (KJV).

Thupatna

Zomi khempeuh phial in thupi i sak KHUADO thu Laisiangtho tawh etkak in i sut ding hi. Ahi zongin Zomite sungah Tapidaw ahilo zong om ihih manin hih thu kikupna ah Laisiangtho a umte leh a nungta Pasian a umte bek i bulphuh dinga, Zomi khempeuh huam in i sutkei ding hi. Biakna dangte in amaute upna tawh kizui in a muhdan om ding ahih manin Zomite sunga a piangthak tapidawte leh Khuado kizopna bek i sut ding hi.

Keima updan leh ka ngaihsutna kong sunkhiatna hi a, a deihlo leh a thukimlo zong om ding hi. Ngeina sangin Pasian deihna leh Pasian kammal zuih ding thupi ka sakzawkna, a piangthak Zomi khat pen ngeina tawh buailo a mi thak leh a siangtho nuntakna tawh nuntak ding, a luite nusia a, a thak tawh kalsuan ding, Dawi vaite leh dawi tawh kipawl pawite a kipan ngeinate nusia a, Pasian mi banga nuntak ding deihna hi.

1. MIHING THU

Pasian lim leh mel sun

Leitung mipilte leh biakna tuamtuamte ngaihsutna ah mihing pen ganhing pan piang hi, na themneng pan piangkhia in damdam in khangtho hi (evolution), ama thu a omsa hi, cihte om hi.

Piansakna (creation) cih pen vantungte, leitung leh a sunga om na khempeuh Pasian in bangmah zanglo a a piansakna hi a, hihte pen Pasian kammal leh thupiakna tawh piangkhia hi. Ahi zongin mihing Adam pen Pasian in a piansaksa leivui leh ama hu gawmkhawm in bawl hi (make), Adoniram Judson in Kawl Laisiangtho sungah hih kammalte a kibang in zang a (zefqif;), kilamdanna omlo in, Zokam bang hoihzaw hi.

Mihing pen Pasian in ama lim leh mel sun in hong bawl hi (Pian.1:27-28). Adam pen leitung ah mi masa pen leh pasal masa pen hi a, ama sung pan Pasian in numei bawlkik hi. Mihing pen eite utthu tawh leitung a kipiang hilo in Pasian hong bawl banga kisuakkhia hi. I kipatna Pasian hi.

Mawhna neilo

Pasian in mihing a bawlcil in mawhna tawh bawlkhawm ngeilo a, Adam in Pasian pianngei leh cituamna ngah hi. Adam pen mihing ahih hangin Pasian lim leh mel sun dinga kibawl ahih manin mawhna neilo hi. Adam hun in mawhna kithei nailo hi. Adam in Pasian kiang pan pianpih dikna ngah hi. Mawhna cih pen Pasian thupiak palsatna leh eima ut banga gamtatna hi a, Pasian in mudah hi. Mawhna a bawl hangin Adam in Pasian lim leh mel sutna mansuah tuanlo hi.

Siangtho

Pasian pen a siangtho Pasian hi. Siangtho cih pen mawhna neilo leh mawh theilo cihna hi. Pasian pen khial theilo banah khial ngeilo hi. Mawhna a neilo Pasian in amah tawh kisun dingin Adam bawl hi. Pasian pen siangtho ahih manin ama sianthona zong Adam tungah kilawh hi. Mihing pen ganhingte tawh kibang theilo in, lungsim, kha leh pumpi tawh Pasian in hong bawl hi. Pasian in a it pen mihingte hi.

Mawhna leh mawhcipna

Hih ding pen hilo a, hihloh ding pen hihkhakna in mawhna hi. Pasian thupiak palsatna pen mawhna hi. Diktat lohna khempeuh mawhna hi (1Jn.5:17). Satan in mawhna pankhia hi. Vantungmi Lucifer in Pasian dem dinga hong kipatteh Pasian in deihlo ahih manin lei ah khiasuk a Satan hong piang hi (Is.14:13-14).

Eden huan ah Satan nasep kipan a, Adam leh Eve khemzo ahih manin leitung ah mawhna hong lut a, mi khempeuh Pasian muhna ah mawhcip in, sepna leh hoihna tawh hotkhiatna ngah ding hi thei nawnlo hi (Rom 3:10-12). Mawhna thaman sihna hi (Rom 6:23). Sihna pen Pasian tawh kikhenna hi. Naungekte nangawn nute sung pan a mawhcipsa in hong suakkhia hi (Late 51:5; Jer.31:30). Hoihna leh hanciamna tawh hotkhiatna ngahna ding lampi beita hi.

Mawhna thamante

Mawhna in Pasian hehsak ahih manin samsiatna a tuamtuam tungsak hi. Gulpi kineih Satan pen leivui a ne ding leh awmtal a pai dingin samsiat hi (Pian.3:15). Numei tungah nausuah gimna leh pasalte ukna nuai a om ding tawh samsiat hi (Pian.3:16). Pasalte pen gim leh tawl a nasep ding leh khua-ul kai a annek ding tawh samsiat hi. Tua banah hong kibawlna leh na kipatna lei ah na ciahkik ding hi (na si ding hi) cih tawh samsiat hi (Pian.3:17-19). Sihna pen mawhna thaman hi. Gentheihna zong mawhna thamante sungah khat hi.

Pasian in Satan tungah hih leitung ukna pia hi. Satan pen Pasian hilo napi vangliatna nei hi. Satan in Pasian phalna tawh kizui in vangliatna nei hi. Satan pen hih leitung pasian hi (2 Kor.4:4). Satan pen hih leitung kumpipa hi (Jn.12:31). Satan pen zuau bulomte pa leh a cil a kipan mithatpa hi (Jn.8:44). Satan pen huihlak a ukpa hi (Efe 2:2). Adam khanga kipan tuni dong pianpih dikna, sianthona leh Pasian hihna a ngah thei omlo in, i omzia khempeuh Satan ukna nuai ah om a, mi khempeuh mawhna sila suak hi.

2. NGEINA

I omzia khempeuh huam

Ngeina cih pen a lamdang hilo in mi khat nuntak zia khempeuh huam hi. Ngeina cih pen i silh leh ten, nek leh dawn, gamtat kampau zia, i ut leh i veite a kipan nisim tuahkhak thu khempeuh tawh kizom hi.

Mi khempeuh in ngeina nei a, a kibang om thei dinga, a kibanglo zong tampi om ding hi. Eima zat ngeina leh gamtat danciat hoih kisa hi. Ngeina pen biakna tawh kihuang mahmah a, biakna pawlkhat in gawmkhawm uhhi. Biakna (Religion) ka cihteh leitung a tapidaw a hilote genna hi a, amaute pen tapidawte tawh a kilawngkhat hilo hi.

Biakna pen mihingte patkhiat hi a, tapidaw upna pen biakna sungah kihel theilo hi. Tapidaw upna pen biakna hilo in, upna tawh sanna leh nuntakna hi in, sepna tungah kingalo hi. Tapidaw upna pen Zomite khanglui ngeinate tawh a kigawm theilo upna hi a, tapidaw upna pen Laisiangtho, Pasian kammal tunga kinga upna leh zuihna hi. Ngeina in tapidawte uk theilo hi.

Ngeina pen i omna gam, khua leh veng tawh kizui in kilamdang hi. I minam tawh kizui in zong kilamdang hi. I khuazui in zong kilamdang hi. I khankhiatna tawh kizui in ngeina kilamdang hi. Nisim i gamtat zia khempeuh ngeina sungah kihel hi.

Kipatna

Mihingte zat ngeina tuamtuamte in Pasian kiang pan hong pai hilo in mihingte tung pan piangkhia hi. Leitung pen Satan ukna gam ahih manin a mawhcipte sung pan a piangkhia ngeina tuamtuamte pen Dawi mangpa kiang pan hong pai hi, kici leh khialhna tawm mahmah ding hi. Ngeina pen Dawi leh mihingte tawh kipan hi.

Tu hun a i neih ngeina tuamtuamte sungah Khuado pen khat hi a, i pi leh pute tung pan kiluahsuk hi. Tapidawte in a kipatna leh a khiatna ngaihsunlo in kum sawtpi leh hun sawtpi kizui in, haksa taleh hih pawipi bawl ding hanciam hi.

Khuanote ah khuado pawi bawl ding haksalo in, kilawp thei mahmah hi. Khuado pen tu hun teh tawlngakna hun zong ahih manin Pasian thu tawh kituak maw, kituaklo cih donlo in kingaklah mahmah hi. Ahi zongin, khuapite leh gamdangte ah hun tampi bei, tha tampi bei leh sum tampi bei in kibawl hi. Hih zahtak a bawl ding a thupi mah hiam cih ngaihsut huaita hi.

A tuamtuam om
Ngeina pen a tuamtuam om hi. Ngeina sungah theih ding, zuih leh sep ding, kidop ding leh pelh ding om hi. Pawi tuamtuam zong om hi. Nek leh dawn, silh leh ten, duh leh deih, nisim gamtatna leh ukna tuamtuamte dongin huam hi. Vantung a ni, kha leh khuahun tuamtuam tawh kizui a gamtatna zong om hi. Mimal zuih ding, innkuan zuih ding, kipawlna zuih ding, beh leh phung zuih ding, zi leh pasal zuih ding, mote zuih ding, makte zuih ding, tate zuih ding, siampite mawhpuak cihdan in a tuamtuam zong om hi. Khuado pen ngeina sungah khat hi.

Ngeina sungah a hoih mahmah zong om dinga, a hoihlo zong om ding hi. Ngeina pen biakna tawh a kizopna tampi om hi. India gamah William Carey a tuncil lai in, misi a omteh mei tawh kihal a, nupa, zi leh pasal, khat zawzaw a sih ciangin, a hinglai pen zong meikuang sungah khulkhawm in sikhawmsak uhhi.

Satan pen Pasian phalna tawh leitung a ukpa ahih manin mihingte ngeina pen Satan leh Dawi mangpa kiang pan hong piangkhia hi. Ngeina pen mawhna tawh hong tonkhawm pi leh pute tung pan a hong mengkhia hi. Zomite bek hilo leitung a ngeina khempeuh Dawi mangpa kiang pan hong pai hi a, tanglai pi leh pute hong tawn hi.

Leitung piancil a kipan Adam mawhna hangin mi khempeuh mawhcip a Pasian maipha ngahna ding kisia in (Rom 3:23; 6:23), mawhna hangin Pasian tawh a kikhente leh Pasian galte ihi hi. Mi masa pen Adam mawhna eite tungah i pianna nu leh pate tungtawn in hong kilawh a, pianpih mawhna a nei mihingte ihi hi. Leitung ah midik omlo hi (Rom 3:10-12).

A piangthak khat pen upna tawh Pasian ta ahih manin ngeina leh Pasian thu gawmkhawm lo a, Pasian thu tawh kituak a kalsuan ding mawhpuak nei hi. Ngeina kikhel thei ahih manin ngeina tungah upna leh gamtatna tuamtuam kilam theilo hi. I ngeina bek hilo i upna leh kalsuan ziate Laisiangtho tawh kisittel ding hi. Laisiangtho pen i kisittelna ding Limlang hi.

3. KHUADO OMZIA

Zomite ngeina khat: Khuado

Kammal nih: Khua leh Do kigawm pen KHUADO kici hi. Khua pen omna leh tenna mun genna hi. Do cih pen zin leh lengte do, anvak, zindo cihna leh, galte do, dawite leh kaute do, nawkkik, notkhia cihna hi.

Khuado cih pen dawi leh kaute do a, nawhkhiat hun; lei sunga a sisa pi leh pute kha samkik a zu leh sa piak/bah hun; zin leh leng zahtakte zindo hun hi. Zomite sungah Khuado pen Khuavel a cizong om hi (Vangteh). Vel cih pen tuga, heigate khongkhia a dona hi a, vel leh do a khiatna kibang hi. Khuado leh Khuavel a deihna kibang hi.

Tuhun teh nidanglai danin kizanglo in kumkhen pawi, anlak pawi peuh kici in Pasian lamah kiheisak a, pawlkhatte han/khan ah hawh thei hi. (GEC).

Khuado kipatna

Dawi biate, Dawi biakna leh Dawi a kihta mahmah tanglai pi leh pute tawn a hong piangkhia ngeina khat hi in, a kipat ni, hun leh kumte kitheilo hi. Tanglai pi leh pute patkhiat ahih manin tapidaw upna laigil tawh kituak maw, kituaklo cih limtak a ngaihsut ding hi. Khazih sunga omte in piansak thak ahih manin khanglui ngeinate tawh kizopna bangtan ciang nei cih theihhuai hi.

Ngeina i cih ciangin a hoih om dinga, a hoihlo zong om ding hi. I omna gam, khua leh veng tawh kizui in i tatzia kilamdang ding hi. I zat ngeina leh pawi in Pasian thu tawh kituak maw, kituak lo, Pasian min thangsak maw, daisak, ci leh sa tawh kidiahna maw, Pasian minphatna cih khinkhai ding kisam hi.

A DEIHNA

Anlak Pawi

Khuado pen anlak khitteh kibawl hi. Khangluite in mimza (100), tangza (100) ai uhhi. Pasian theilo ahih manin amau updan tawh kizui in aihna bawl a, dawi thoihna mah nei ding uhhi.

Ahi zongin Khuado a gelh tuamtuamte in Khuado pawi pen anlak pawi leh Pasian tungah lo sunga piang ante tungtawn a lungdam kohna hi, ci in gelhciat uhhi (GEC & TSL: 76).

Hih pen Pasian thu i hat cianga i phuahtawm leh i behlap hi a, tanglai pi leh pute in dawi tung bek ah lungdamna ko ding hi. Tua banah, tanglai pi leh pute in a nungta Pasian theilo hi. Anlak pawi cih pen maan thei dinga, Pasian tungah lungdam kohna cih pen maanlo ding hi.

Khuailak Pawi: Aisanna

Khuado hun in gam sungah khuaila uhhi. Khuaipheng tak maw, taklo cih en in, kumpha ding maw, kumsia ding; cidam ding maw, damlo ding; khuai a tah leh kumpha in cidam ding, ci a, a tah keileh kumsia ding, damloh tuamtuam zong kiphukha ding cih danin ngaihsun in, aisan uhhi. (TSL: 76).

Meidet Pawi: Aisanna nam khat

Khuado ni, a masa pen ni, in meilah zong masa leh la masa in, pawi sung khempeuh meilah kivak hi. Dawi leh kaute dona in zang in, meide kawm in kaute beng in, kau leh dawite do uh a, inn sung dawite zong hawlkhia in, khuasiam pasian zong hawlkhia in, meivak zihziah a, Meidet Pawi, zong kici hi (TSL: 76). Meilahte mun khat ah halkhawm in, meikhu in simlam a zuat leh simlam hoih ding, zolam a zuatleh zolam hoih ding, cih aisanna zong nei hi.

Siansuahna Pawi: Dawi leh kaute hawlkhiat hun

Khangluite in natna, gimna leh sihna a kipan tuahsiatna khat peuhpeuh a tuahteh dawi in hong pet hi, ci in siatna khempeuh dawi leh kaute ngawh uhhi. Amaute upna ah dawi leh kaute tawh a kitengkhawm danin ngaihsun ahih manin Khuado hun pen dawi leh kaute hawlkhiatna in zang uhhi. Hih pen Siansuahna Pawi zong kici hi. (TSL: 77).

Khuado tawh kipawlte

Sagawhna: Vokgo

Vok khawi in, go uhhi. Ni thum a dingin khenkhiapah hi. Vok pen kigulsak in, a khawite in a lang ngah hi. A lang kine pen Sakuang hawm ci hi. Sagil bawlkawm in zu ne uhhi. Zam, khuang leh daktalte kitum hi. Inn pan amau khamkhop ding taksih (tangsih) huanciat uhhi. A sisate phawkna in mual leh hante hahsiang uhhi.

Dai hawhna: A si leh a hingte kizopna beina

Khuado ni a kigo sate a min teh a sungkua tawmtek lakhia in, tua kum sunga site innkuanpihte va khol uhhi. Misite a dinga kikoih leh kipia cihna hi. Sunlam teh nupite in han ah vapai in misite kiangah zutak tawh va lui uhhi. Hih pen dai hawh kici hi. A sisate luguh peuh zutzut in zu, sa leh taksih peuh bakbak uh a, tua pen ‘Si an suah’ kici hi. A si leh a hingte kizopna beina leh kikhakna ahih manin lungleng thei mahmah hi.

Ankuang um hun: Gualnopna

Dai hawh nupite a tunkik masiah an kine theilo hi. Mi a kimteh papi taltak pen khat in zu kam khat tep in, zu phih in phuisam phot hi. Tua khitteh zu gualtep in, ankuang a banban in um uhhi. (Tu hun a annek cianga thu i nget tawh kihuang hi.) Sabak leh sangoite kibak in gualnuam mahmah uhhi. (TSL: 77).

4. TAPIDAW UPNA LAIGIL

Tapidaw upna laigil khempeuh kigelh zolo ding ahih manin a tom theithei in i sut ding hi. A thupi zawdeuh teng kaikhia in kigelh hi. Pasian in lai hong pia in, lai tawh nasem in, lai tawh ama deihna hong lak hi. Hih sunga kigelh Pasian kammalte limtak a simna in ngeina omzia leh tapidawte hamphatna hong lak ding hi.

Pasian

Tapidawte sungah a thupi pen Pasian thu hi. Pasian cih ciangin a thupi pen leh a vanglian pen hi a, mihingte tawh tehkak theih hilo hi. Biakna khempeuh in pasian nei a, ahi zongin a pianngeite kilamdang hi. Laisiangtho sunga kimu Pasian pen Kha; Khat; Thum; Na khempeuh hih thei; Mun khempeuh ah om; Na khempeuh thei; Kikhel ngeilo; Thumaan; Itna leh Hehpihna tawh kidim; Siangtho; Heh thei; Thumaan, Kipatna leh Tawpna neilo in om tawntung banah vangliatna tawh kidim Pasian hi. Hih Pasian tawh a kibang omlo hi (Pai.20:3-4).

Upna leh a gahte

Upna cih pen a nungta Pasian upna leh muanna; Pasian omna upna; Pasian itna leh hehpihna upna; Zeisu gupkhiatna, hotkhiatna leh tatkhiatna upna; Mawhnei hihna upna; Upna hangin hehpihna tawh dikkisakna ngahna thu bek upna; Laisiangtho bek Pasian kammal ahihna upna; Tapidawte tunga thunei pen mihing hilo in Pasian leh a kammal bek ahihna upna; Misiangthote a lakik dinga Zeisu hong paikikna ding upna; Pasian a umlo khempeuh Tokhom Kang mai ah Zeisu in thu a khenna ding upna; Zeisu a um khempeuh vantung gam tung ding hi cih upna hi.

Pasian maan thei

Mi khat in Zeisu a up manin Pasian maan thei hi. Amah leh amah zong kithei hi. Ama khalam dinmun zong kithei in, theihna maan ngah hi. Zeisu Khazih upna hangin Pasian maan kithei hi. Topa Zeisu leh Laisiangtho tungtawn in theihna maan kingah hi. Pasian in amah i theih ding leh up ding a deih manin Zeisu leh Laisiangtho tawh eite tungah hong kilaakkhia hi.

Mi thak

Mi khat in Zeisu a up teh milui hihna pan suakta in mi thak suak hi. Khazih sungah a omte in piansak thak hi in, a lui hihna beita hi (2Kor.5:17). Upna tawh Pasian mai ah mi thak kisuak hi. Mi lui hihna khempeuh singkhuam tungah Zeisu tawh kikhailum khinzo hi (Rom 6:6). Pasian in a lui in hong mu nawnlo in a thak in hong mu hi.

Dikkisakna ngah

Mi khat in upna hangin Pasian hehpihna tawh dikkisakna ngah hi. Thukham nuai pan suakta in dikkisakna sila suak hi (Rom 6:18). Upn hangin thukham vangliatna pan suahtakna kingah hi. Thukham pen siangtho mahmah napi mawhneite in zui zolo ihih manin Zeisu sihna bek tawh Pasian hehna dam thei a, upna bek tawh dikkisakna hong pia hi. Upna hangin hehpihna tawh dikkisakna kingah hi (Efe.2:8). Upna tawh dikkisakna kingah hi (Rom 5:1). Mawhna ukna pan suakta in diktansakna sila kisuakta hi (Rom 6:18).

Mawh maisakna

Pasian pen itna tawh kidim Pasian bek hilo in a heh thei Pasian hi. Satan in Pasian hehsak hi. Adam leh Eve in Pasian hehsak hi. Mawhna in Pasian hehsak hi. Tapidawte in mawhna tuamtuam i bawlteh tua in Pasian hehsak ahih manin thuhilhna hong pai hi. Mawhna in Pasian tawh hong kikhensak in sihna hong thuaksak a, ahi zongin Pasian in hong maisak hi (1Jn.1:9). Zeisu sihna hangin Pasian in i mawhna khempeuh hong maisak hi. Mawh maina ngahte tui kiphum hi (Sawl. 2:38). Zeisu sisan sungah mawh maisakna leh tatkhiatna kingah hi (Efe.1:7).

Hotkhiatna

Mi khempeuh Adam sungah mawhcip a, mawhna thaman sihna thuakte ihih laitak in Zeisu in mawhneite tang dingin sihna hong thuaksak a, ama sihna in Pasian hehna damsak a, Zeisu a umte in hotkhiatna ngah hi (Rom 5:8). Upna tawh Pasian mai ah dikkisakna kingah hi. Sepna, hoihna leh hanciamna kihello in Pasian in upna tungtawn in dikna hong pia hi (Rom 5:1).

Zakna panin theihna piang; theihna panin upna piang; upna panin kikhelna leh hotkhiatna kingah a, upna pen Zeisu kiang pan hong pai hi (Heb.12:1-2). Upna leh up theihna in Pasian sep hi a, mihingte kipiak theih hilo hi. Khasiangtho in i lungsim ah na a sepna tungtawn in upna tawh piangthak leh hotkhiat i hihlam kithei thei hi. Upna hangin hehpihna tawh dikkisakna kingah a, sepna kihello hi. Hotkhiatna pen upna bek tawh kingah hi. Tu in hehpihna nuai ah i om hi (Rom 6:14). Tuni in hehpihna ni leh hun hi (Efe.2:8; 2 Kor.12:9). Tuni in hotkhiatna ni hi (2Kor.6:2).

Nuntak tawntungna

Zeisu Khazih upna tawh khalam thupha tampi kingah a, tua khempeuh kigelh zolo hi. Nuntak tawntungna pen upna gahte sung pan a thupi pen khat hi ding hi. Mihingte in sihna kihta a, nuntakna kideih hi. Ahi zongin nuntak tawntungna lampi theilo hi. Zeisu a umte in nuntak tawntungna ngah hi (Jn.3:16; 36). Zeisu in thawhkikna leh nuntakna hi (Jn.11:25). Upna hangin sihna pan nuntakna mun kitung hi (Rom 6:23). Upna tawh sihna pan hinna mun kigalkah hi (Jn.5:24).

Pasian hong piak hotkhiatna leh nuntakna pen tawmvei sung bek kimang leh i hoihlai teng kimang cihbang hilo in bei hun leh kiam hun a neilo itna tawh hong kem Pasian khut sungah om a, hotkhiatna pen kitankik theilo in, nuntakna zong kimansuah theilo hi. Pasian hong piak nuntakna pen a tawntung a kip ding nuntakna leh hotkhiatna hi. Mi khat a pianthak ciangin tawntung bitna Pasian sungah ngah hi. Gupna kitankik theilo hi.

Sianthona

Pasian pen siangtho ahih manin mawhna neilo banah mawhna bawl theilo hi. Pasian pen a gelna leh a sepna khempeuh zong siangtho hi. Pasian sianthona Adam tungah a kilawh hangin Adam in Satan khemna hangin sianthona mansuah hi. Mawhna hangin a siangtho kimlai mawhnei kisuak hi.

Mi khat in Zeisu Khazih upna tawh Pasian mai ah sianthona ngah hi. Pasian in upna hangin a siangtho in hong mu a, mawhnei in hong mu nawnlo hi. Upna tawh Pasian mai ah sianthona kingah hi. A piangthak khempeuh Pasian mai ah siangtho hi. I pianthak khitteh Pasian in nisim in sianthona mah tawh nuntak ding deih hi.

Sianthona cih pen mawhna pelh a Pasian tawh kinaitak a kalsuanna hi. Sianthona pen mawhna tawh kikhenkhiatna leh mawhna pelhna hi. Sianthona pen a kihhuaite taisan a, a hoih lampi zuihna hi. Sianthona pen Khazih sutna tawh nuntakna hi. Upna tawh sianthona ngahte in sih donga sianthona tawh kalsuan ding hi. Pasian deihna tawh kituak a kalsuanna in sianthona hi. Upna tawh sianthona ngahte pen mawh paihna ding om nawnlo hi (Rom 8:2). Zeisu sungah silsiang, sianthosak leh diksakna ngahte ihi hi (1Kor. 6:11). I mawhna khempeuh Topa in puakhia khinzo hi (1Jn.3:5).

Pasian tawh kilemna

Mawhna in Pasian tawh hong kikhensak in, sihna leh gentheihna hong thuaksak hi. Ahi zongin upna hangin Pasian tawh kilemna kingah hi (Rom 5:1-2). Zeisu hangin Pasian tawh kilemna kingah hi (Kol.1:21). Zeisu in Pasian leh mite kikal ah palai hong sem hi. Midangte in Pasian itna leh Pasian maan a theihna dinga nasem dingin Zeisu in nungzuite sawlkhia a (Jn.20:21), tuni in a piangthak khempeuh Khazih tanga nasemte ihi hi (2Kor.5:20). Zeisu in mihingte leh Pasian kilemna dingin nasem in sihlawh hi (Jn.19:30).

Suahtakna

Zeisu in Thumaan in hong suaktasak ding hi (Jn.8:32) a cihsa om bangin upna hangin khalam thupha tampi kisang a, tuate sungah a thupi mahmah khat in suahtakna hi. Mihingte hong hencip tampi a om manin suahtakna tuamtuam kingah hi. Pasian sung bek ah suahtakna maan om a, leitung in suahtakna maan hong pia theilo hi. Pasian piak suahtakna pen a tawntung a kimang ding suahtakna hi (Jn.8:36).

Upna tawh kingah suahtaknate in, Satan khutsung pan (Mt.28:20); Thukham ukna pan (Rom 7:6); Launa pan (Rom 6:14; 8:14-15; Gal.2:16-17); Mawhna sila pan (Jn.8:36); Mawhna leh sihna ukna pan (Rom 8:2); Sih ding launa pan (Heb.2:15); Launa pan suahtakna (Rom 8:15); Thukham samsiatna pan (Gal.3:13-14); Leitung vaite pan suahtakna banah (Gal.4:3-7); Pasian innkuanpih kisuak hi (Jn.1:12).

Mi khat a pianthak teh NGEINA khutnuai pan suahtakna ngah hi (Kol.2:20-22). Zomite ngeina sungah hoihlo i cih khempeuh ‘Si thei’, sihna in zui cihna hi. Ngeina in a deihlohte sungah inn talsik, hingsuan, kigi suan, innkawng hek leh a dang tampi nei a, hihte palsatna pen sihna tawh kizom na ci uhhi. Sihna hanga innsian kipiakna zong sihna in zui thei cih upna hi.

Ahi zongin, Pasian hehpihna tawh kinungta in, mihingte hoihna leh kamthu tawh kinungta lo hi. Zeisu hangin ngeina in hong len nawnlo in hehpihna nuai ah kinungta hi. Ngeina sangin Pasian kammal zuih ding hizaw hi. Ngeina pen mihingte tunga piangkhia, Dawi pan a piangkhia, nu leh pate tawh hong tonkhawm hi in, sihpih zah dong dinga ngaihsut ding hilo hi. A kikhel thei ngeina sangin a kikhel theilo Pasian kammal hilhna zuih ding hi.

5. ETKAKNA

Aisanna

Mailam thu ding theihnopna pen pilna khat ahih manin thupi hi. Mi khempeuh in mailam thupiang dingte theikhol nuam hi. Mi khempeuh mailam thu ding tawh buai in, mailam thu ding kitheinuam hi. Aisanna pen mailam thu dingte genkholhna leh theih kholhna hi. Ahi zongin leitung ah mailam thu ding ahi banga gen thei, ahi banga thei, ahi banga mukhol omlo hi.

Pasian in tuni in eite tungah Zeisu leh a kammal Laisiangtho tawh i masuan ding khempeuh hong lak hi. Pasian in Laisiangtho tawh eite tungah thu hong gen hi. I masuan ding Laisiangtho sungah Pasian in hong hilh hi. Laisiangtho pen sin ding, sim ding, nuntakpih ding leh hilhkik ding hi. Pasian in a kammal tawh eite hong hopih hi. Aisanna sangin Laisiangtho kicingzaw hi.

Dawi hawlkhiatna

Pasian in Satan zo hi. Pasian in amah a umte tungah Satan tungah zawhna hong pia hi. Ahi zongin Kha tawh a kidimlote Satan in nopneh hi. Dawi in Pasian zo ngeilo hi. Dawi pen kihtak ding hilo in, nial ding hi (Jeim 4:7). Pasian kammal tawh a kituamte Satan in kihta hi. Zeisu in nungzuite tungah dawite hawlkhiat theihna pia hi (Mk.16:17-18).

A kilawmdan bek hita

Khuado pen Dawi tawh kipankhia pawi khat ahih manin tu hun teh a kilawmdan bek in kibawl hi. Khangluite bawldan leh tuni a i bawldante kilamdangta ahih manin thupi lo cihna hi. Dawi kihtakna tawh a piangkhia pawi ahih manin tapidawte in puahphat sangin hepkhiat ding hizaw hi. Khuado a pankhiate in dawi a kihtak hangin tapidawte leh Pasian tate in dawi kikihtalo hi. Zeisu in zawhna hong piaksa hi.

Leitung vaite nusia ding

A piangthak taktakte a dingin Khuado pen zuih huailo hi. Ahang in, Zeisu a neite Pasian sungah mi thak ahih manin mi lui nuntakna khempeuh paihkhiat ding hi. Zeisu tawh kisun a nuntak ding hi. Ngeina luite hemkhia a, Khazih lungsim ahi itna, hehpihna, lainatna, kiniamkhiatna, cihtakna, lungdamna thu tangkona cihte hanciam ding hi. Dawi kihtakna tawh nungtalo a, Pasian itna leh zahtakna ah khantoh ding hi. Nuailam ngalo a, tunglam nate bek delh ding hi (Kol.3:1). Paul in, Galati mihaite aw, note kua in hong haikhem hiam (Gal.3:1), a cih bangin, eite zong hong cihkhak ding dahhuai hi.

Tomlakna

Khuado pen pawi tawh a kibat hangin dawi kihtate in dawi a hawlkhiatna leh mailam thu ding aisanna hi. A piangthak khat in dawi kihtakna tawh nungta ding maw, dawi kihtakna tawh kibawl pawite bawlbawl lai ding maw, cih pen ngaihsut huai hi.

Khuado pen aisanna nam khat hi a, mailam thu ding Pasian in a kammal tawh hong lakkhin zo ahih manin dawi kihtate leh dawi biate zatsa ngeinate zangzang lai ding maw, cih pen ngaihsut huai hi. Mailam, maikum leh masuan ah cidam ding, hauh ding, nopsak ding, nat ding, tuahsiat ding leh sih ding cihte theihnopna tawh kibawl pawite Zeisu i up khitteh bawlhuai lai maw, bawl huailo cih ngaihsut huai hi. I khut sunga om Laisiangtho thupina phawkhuai hi.

Khuado hun in a sisate han ah kipai in, zu leh sa puak in, bak in zu tulh uhhi. Koreate in Chusok cihkhat nei a, a sisate han ah pai in thupha ngen uhhi. A sisate han ah paina in khiatna leh phattuamna pialo ahih manin Khuado hanga a sisate omna mun ah paina zong ngaihsut huai hi.

Tanglai in misite lei sungah kiphumlo in, lang leh tautung peuh ah koih uhhi. Tuni in dum sungah hankuang tawh hoihtak in kibawl hi. A sungah misi guh bek om a, kizopna om theilo in, dahna leh khitui luanna bek kingah a, phattuamna om nawnlo hi. Dai hawhna pen khitui luanna ding bek hi.

Dotna: Nidang a Khuado dan leh tuni a i zatdan kilamdanna bang?

Dawnna: Nidang in Dawi kihtakna tawh Khuado pawi kibawl in zu leh sa kine in, Dawi leh kaute kinotkhia in, misite nangawn an kibak banah aisanna tuamtuam leh gualnopna tuamtuam kibawl in, tulai khangthakte a dingin lamdang mahmah hi.

Ahi zongin tu hun teh Dawi bia tawmta ihih manin tapidaw kici Zeisu Khazih upna hang a hehpihna tawh Pasian mai ah dikkisakna ngahte in, a limlawm bek in bawl in, tapidawte pawipi khat kisuaksak a, khanglui lai danin kigamta nawnlo in, Pasian thu tawh kimuhkhopna in kizangta hi. Ahi zongin, Zomite sunga biakna tuamtuam neite in tapidawte zatdan in zanglo kha ding hi. Tua banah, tapidaw minpua napi zu leh sa tawh pawi a bawl zong omlai ding hi.

Dotna: Khuado bang cibang a kibawl hiam?

Dawnna: Khuado pawi zatdan kibanglo hi. Khuanote ah innkuan khat in amau neihsa vok leh bawngte go hi. Unau omkhopna in zong kizang hi. I lawmte tawh zong kinekhawm thei hi. Khuapite ah tu hun teh, beh tawh kizui, khua tawh kizui leh minam tawh kizui in eima hoihsak hunhun in kibawl hi.

Dotna: Khuado pawi bawlna hangin khialhna, supna leh siatna a om hiam?

Dawnna: Zu leh sa ne a kitawng kisia peuh i om leh tua pen supna leh khialhna lianpi hi. Khuado pawipi bawlna hangin siatna lua omlo hi. Ahi zongin Pasian hong deihsak pawipi ahih keileh tua pen Pasian muhna ah hoihlo ding hi. Tapidawte in i sepna khempeuh Pasian minthanna kilatna ding ahihna phawk tawntung ding hi. Pasian in hong sawl pawipi leh nasep ahih leh sep ding hoih a, hong sawl keileh seploh ding hoihzaw hi.

Dotna: Khuado teh zu dawn/nek ding a kilawm diam?
Dawnna: A piangthakte a dingin zu dawn ding kilawmlo hi.

Dotna: Khuado pawi zatna ah bang phattuamna om hiam?

Dawnna: Tanglai in zu leh sa nekna, dawi hawlkhiatna leh aisanna bangin kizang a, tuni in a piangthak tapidawte in biakna pawi khat suah in, Pasian minphatna in kizang in, u leh nau, beh leh phung, khua leh tui kimuhkhopna in zang hi. Ahi zongin, zu a dawnngiat zong omlai hi. Tua ahih manin Khuado pawi pen eima ngaihsutna tungah kinga hi. Khuado pen kituahkhopna dinga hun hoih khat hi.

Dotna: A piangthak Zomite in “Khuado” ci in pawipi kham den ding mah ahi diam?

Dawnna: Khuado pen eima khalam picinna tungah kinga a, i bawlloh hangin khialhna omlo hi. Khuado cih sangin kipawlna dangkhat minvawh ding hoihzaw hi. Khuado pen tuni in sialo napi a kipatna hoihlo hi.

Dotna: Khuado leh Christmas a kibang a zat ding hiam?

Dawnna: Laisiangtho sungah Christmas cihbang a omloh hangin mawhneite a honkhia dinga Zeisu hong suahna thupi mahmah ahih manin hih hun phawkna bawl ding kilawm hi. Ahi zongin, Khuado pen Dawi biakna sung pan hong piangkhia ahih manin Pasian a um taktakte in kidop huai hi.

Dotna: Rev. Thang Ngin in Khuado bang ci muh hiam?

Dawnna: Rev. Thang Ngin in Khuado deihlo hi. Ama khuapihte leh a khuavengte dongin Khuado zang ngeilo uhhi. Amah leh a mipihte in Khuado neilo hi. Amah in Khuado omzia thei ahih manin mite zuih dingin hanthawnlo hi.

Dotna: Hih ngeina, Khuado, kepcing huai maw, khawl huai?

Dawnna: Korea gam ah zong Chusok kici pawipi khat, Ancestor worship, nei a tua pen a sisa tanglai pi leh pute han ah pai a thupha dawhna hun hi. Pasian thu a hat mahmah gam khat ahih hangin tapidawte in khia zolo leh nusia zolo in, thupha ngen in kumsim in pai uhhi. Ahi zongin, Pasian thu a thei zawdeuhte in tu hunteh hih pawipi, a sisa pi leh pute tunga thupha ngetna, nial in, zang nawnlo in, midangte zong a zanglo dingin damdam in hilh uhhi. Korea ah gambup zumkhak hun a sau pen ahih manin mite lungdam thei mahmah uhhi.

Khuado pen ci leh sa pawi hi in Pasian thu tawh kizopna omlo hi. Pasian in zuih leh sep dinga hong sawlte bek sep ding hi in, hong sawllohte phuahtawm ding hilo hi. Ci leh sa deihna nusia a Pasian deihna zuih ding hi.

Dotna: Dawi patkhiat lampi leh Kha lampi koi zuihhuai zaw?

Dawnna: Zeisu Khazih upna hanga hehpihna tawh dikkisakna ngahte in Satan ukna, Dawi vangliatna, thukham ukna leh mawhna sila pan suakta banah Dawi mangpa ta pan Pasian ta suak in, Pasian muhna ah mi thak, piansak thak, ahi hi (2Kor.5:17). Piangthakte pen Pasian mite, Khamite, Vantung mite, Misiangthote, Dikkisakna ngahte, Pasian neihsa luahte leh Pasian innkuanpihte hi.

Dawi mangpa ukna leitang tungah i om laisiah nisim in i teel ding om den hi. A piangthak khat in Dawi mangpa nung zuih ding leh Khasiangtho makaihna zuih ding, Ci leh sa deihna zuih ding leh Pasian deihna zuih ding, Satan patkhiat lampi zuih ding leh Zeisu hong lahsa lampi zuih ding, Mihingte patkhiat ngeina zuih ding leh Pasian in a kammal sunga hong lahsa lampite zuih ding, teel thei hi.

Dotna: Zomite ngeina khempeuh sia maw, hoihlo maw?

Dawnna: Ngeina khempeuh hoihlo hi kici theilo in a hoih zong om dinga, tuate sanga thupi zaw Pasian kammal tawh kituak a nuntakna hoih zaw bek hilo in hoih pen hi. Ngeina tampi neihna pen khantoh loh man hi in, ngeina pen tawm semsem leh hoih semsem ding banah nuam semsem ding hi.

Dotna: A piangthak tapidawte in Khuado pawi bawl ding a kilawm hiam?

Dawnna: Ngeina leh Pasian thu thupi a sakzawkna tungah kinga hi. Pasian kammal tungah i dinna leh dinlohna lahkhiatna hi a, tetti panna thupi khat hi. Nisim in Zeisu tawh kisun a nuntak ding hi. Ngeina thupisak luatna pen khantoh lohna lim hi. Beh kipawlna zong ngeina lian khat leh itna bulphuh ahih sap hangin sa lungsim neihna lak hi.

Thukhupna

Upna maan i cih in Pasian maan theihna, ei leh ei kitheihna leh i khalam dinmun kitheihna hi. Thumaan (Zeisu) hangin suahtakna kingah hi. Zeisu Khazih upna hangin mi thak kisuak hi. Zeisu hangin thukham vangliatna leh ngeina ukna nuai pan suahtakna kingah hi. Zeisu in hong suaktasak hi. Upna tawh mi thak i suah leh a luite hepkhiat ding hi.

Upna hanga hehpihna tawh dikkisakna ngahte in vantung gammi hi in, leitung pen a khualzitna gam hi a, leitung vaite in uk nawnlo hi. Laisiangtho tawh ngeinate sittel a, Pasian deihna zuih ding leh Khasiangtho tawh kidim ding hi. Ngeina lamsang lo a Pasian leh a kammalte bek lapsang ding hi. Pasian minthanna dinga nuntak ding hi. Mang Cin Pau, PhD, D.Litt. (Ambassador Baptist Church, Yangon)

THU LAKNA

• 1. Dr. H. Gin En Cin – KHUADO
• 2. Thang Siam Lian – Zomite Ngeina leh Innpite Tangthu