Malaysia Khuado Pawi Committee 2013 pan Sapna

Malaysia Khuado Pawi Committee 2013 pan Sapna

Zomi te’n kumsim a ih bawldet a hi Khuado pawi pen kumsim October khasung in kibawlden zaw hi. Tukum zong Malaysia khuapi Kuala Lumpur ah October 15, 2013 (10am – 5pm) hunsung in nasiatak in ki bawlding hi. Lutman cihdan zong omtuanlo in hongpai khempeuh in kongkhakpi kantan in tutna a nuamtheithei munte ah tatdan hekdan a nuamthei penpending in Khuado Committee te’n hong vaihawmsak ding uhhi. Tutna pen 1000 ciang bek omding a, a hizong in a panglangkhat ciat ah mi 1000 val bang a tut theih dingin tutna om dimdemding hi. Munhoih nadeih le hongpai baih sawm in!

Khuado Pawi bawlnading panpihna hongpia khua makai leh Pawlpi makai te ading inzong amailam ah tutna kigel ahih manin atuding khatciat nongkiseh nading un zahtakna lianpi tawh hong zasakpah ung.

2013 kum khuado pen ZAM in hong makaih in tua nuaiah Khuado Committee teng in hong vaihawm hi. Tua a hihman in khua 84 leh Pawlpi 22 (tuciangciang) in a kisam sum tawh panpihna hongnei a hihman in Malaysia gam ah Zomi khempeuh ii bawl khuado ci leng hong bukimzawding hi. Khua kipawlna khempeuh in hongpia cih nungsang pen Zomi khempeuh ii bawl cileng kicingzawlai hi.

Tukum pen Zomi pawi lian ihbawlciang in ihbawlna mun a hi, Chinwoo Stadium ah kibawlding hi. Khuado ni ah koicidan teng omding hiam cih tawmkhat hong maleep nuam ungh.

Zolia & Zotaang Malaysia 2013 :: Hih pen Malaysia gamah a kibawl masa pen hi a, Zolia 12 le Zotaang 17 ki heltheiding hi. Hihpen Zolia & Zotaang a hih zenzen hang in leitung tawh liangko kikim in a kibawlding a hihman in na upmawhsang in nasiazaw ding hi. Banghang in nasiazaw ding hiam cih pen tuani teh na mit mahmah tawh na muhteh telpanding hiteh.

Zolia & Zotaang hong teelsakding pen a nuai ateng hiding hi. Mi mawkmawk hideksuailo in mi minthang taktak vive in hongmakaihsakding hi. Hihteng ii teeltaktak pen a khatna a ngah huaitaktak Zolia & Zotaang taktak te kiteelkhiading ahih manin muanhuai mahmah uhhi.

Ms Bella Rahim
Award Winning Actress, Fashion Show & Plus Size Model

Mr Evan Siau
Mr International Malaysia 2012, TV Personal, Model

Ms Janet Lee
Vocal Performer/Classically Trained Soprano, Theatre Actress

Mr Chua Chung Aun
(Photogenic Mark hong piaksakpa)
Professional Photographer & Graphic Designer

Khuado Thugending

Ms Joanne
Community Development, UNHCR, Malaysia
(Ms Joanne pen Korea zinpak ahih manin hongki heltheilo dinghi)

Rev. Dr. Cin Sian Pau
Senior Pastor, Seventh Day Adventist, Kuala Lumpur

Rev. Fr. Robert Kam Hau
Parish Priest, Khampat Myo, Kalay Diocese, Myanmar

Pu Hang Khan Lian
President, Zomi Innkuan Singapore

Mr John Chin
Chairperson, Migrant Ministry, Assumption Church

Lasakna :: Malaysia gamah Zomi tumging tumsiam minthang Khual Tawng, Mamang, Gin, Khai Sian te’n hongmakaihding uhhi. Zolia & Zotaang tawh hun tampi beiding ahih manin lasak pen dawng 10 khawngbek kisading a, Malaysia gamsung aom Zomi lasaksiam tengin hong zaiziahziah ding uhhi.

Khuado pawi ah hongpai inla, hihtung a kigenteng namit tawh na mukhapah ding hi. Cikmah in a om ngeinailo Zolia & Zotaang kidemna ah hongpaiding in honglamen ungh. Zomi te ngeina khuado thu leh thucin thutang tampitak kigending a hihman in peello in hongpaisawm un.

Khuado Pawi Committee, Malaysia