Thupha maw? Hamsiat na, et kik huai. Nang e? (Blessing or Curse?)

Thupha maw? Hamsiat na, et kik huai. Nang e? (Blessing or Curse?)

Blessing or Curse? Thupha maw? Hamsiat na, et kik huai. Nang e? (65th Zomi/Chin National Day muakna) Paak tuiduh lo khat a khan ding deihsak lua in, tui ih buakbuak khak leh hong si zawsop kha ding hi.

“A hunzui in a kikhel theilo na khat, a nuntaak paisuak ding hamsa hi” ci-in a beisa kum tampi laipek in leitung mipil minthang khat in, a na gen hi.

Mipawl khat ten, na khat peuhpeuh a pianciang , a sia leh a pha tonkhawm, na ci se uh hi. A hih leh, kua-mah mawhsakna hilo, ih taangthu ih batzawh tan, tawm sulzuih kik ni ci leng,

1. Zolai hong kibawlsak a, nuam ih sa mah mah hi. A hizong, Tuallai ih thei nawn kei hi.

2. Pilsinna ah gualzuahna sangpipi ih ngah zo hi. A hizong, kikhenna in, ih zang thei hi.Ih kisak theih pih bilbel a, mi thu ih dong nuam nawn kei hi.

3. Gamsung gampua sumzon ih hanciam a, sumnei pawlkhat mah ih om hi. A tamzaw black market leh golhgukpiakna ah, ih tualbual hi. Guta leh ngalkhaat bang in khattang in ki gamtaangh nuam zaw-in, midang tawh kipawlkhop leh nasep khopding hong lunggulhsak zokei hi.

4. Tanghlai hun khat lai-in, ei leh ei ih ki-uk hi. Tua mah bangin, tualgal ih nei den hi.

5. Mangkaang/Kumpi vang in, ih mipi te ih-uk zo hi.Thahaat thu leh tungsiah mai-et zawhthu tamzaw tawh ih khuasa a, a dangte’ a tang thei nawn kei hi.

6. A nungta Pasian thu, lungdamhna thu hong kipuak hi. Democracy tawh hong tonkhawm na pi, ih zang siam kei hi.Biakna pawlpi hang in, u leh nau nangawn a kikhen, ih tamsim tham ta hi. Vantung-itna thupha sang, leitungna te ih masak kha hiam?

7. Tu-ma kum 65 lai-in, Kawlgam’ Mangkhut sung pan, Suahtaak nang’ ih panpih hi. A phawkna in, “Zomi/Chin Minam Ni” ih ci hi. Tudong ei ‘suahtaakna’ ih ngah zo kik nai kei hi. Tua bek tham lo, citak tak in, maban ih pangpih lai a, tudong ih mualtung mipih, minamdang pawlkhat te’ muhdahna thaman ih sang lai hi. Mailam ah kua tawh kipawl leh kua panpih lai ding ih hiam? Zogam leitang hong siikkulloh in, Kawlgam ah, ih ki va-ap zawh nung , Zogam lei hong siikngiat a, gam hong keek masa Mangkang te khiang, “ka suahtakna uh hong pia kik un”, ih ci thei diam?

8. Tawlkhat Parliament Democracy ih ciam(taste) kha ngei a, khantoh huai mahmah na pi’n, u leh nau kisiatna in ih zangkhial kha thei hi. A zangtheilo ta ding in, phattuamna a tam tuan kei hi. Democracy mah thupi ci-in ih deihlam ih pulaklak kha hi. Ih kipawlna constitution neukhat nangawn zuihding hamsa ih sa hi. A tamzaw deihna ci na pi hang, ei a ih thun zawh kei leh ih langpang tinten nuam pah hi.

9. Socialist party hong kah ciang, liang ko kikim ding ih hanciam kal, midangte hazatding liangin zalian-panmun lian pipi ih ngah kha hi. A hizong, tungsiah maipha leh angsung bek kimasak kha hiam? Mipi leh khua leh tuui khantoh taktak nading vaihawm na ah, mittaw kineih bangin ih om ngam lel hi. Suakta tak-in, thutak ih ngaihsun thei nawn kei hi. Mipi te’ na ngawn ih kaaipan nuam in, a gammang niloh ih bang sak kha hiam? Ih hihna nangawn ih gen ngam kei hi.

10. Kawlgam haksatna vai in, muntuamtuam ih tungzo a, khua ih mu zawdeuh hi. Kawlhuihnin dikzawh sawt a hih man in, ih luahsuk Virus/DNA/Genetics ki keng lai a, gelkhop, sepkhop ding munte ah, ih pangkhawm zo pahpah kei hi. A tangpeeknuam ih tam mahmah lai hi. Langbawm(vasa a neu mahmah nam khat) bangin, ih ek ah, ih awk ding a lauhuai hi.

11. Pasian in leivui pan hong lamto in, leitung kiuli ah ih tung hi. Lampi tuamtek kitawn in, ngaihsutna tuamtek tawh ihtupna-gam ih tung hi. A hizong, ih nungzuiding mi-muan(Loyalty) a hamsa hi. Ih khekhap te ih leh-etngam nawn kei hi.

12. Haksatna ih tuahna dung zui-in, gam itna, ngaihna te ih gen hi. A hizong, hun-awng uukna (Hobby) bang bek in a nei, ih tam lai hi. Hunbit kipia khiazo sunsun zong mihing thanemna te panpih genloh, kobawlna tawh ih pahtawi hi.

A sau zaw deuh in,

Tuma kum 100 lai-in Zolai/Tedim lai hong kibawlsak in, ih lungdam mahmah hi. Zomi a tamzaw in ih thei a, manglaimal tawh kibang a hih man in, Leitung kizopna tuamtuam te ah ih noptuam pih hi. Tuallai ih theinawn kei hi. Tuallai tawh ki-at lai a om phial zong’ simthei lo ih hih man in, nin bangin, a thupi taangthu pawlkhat ki vaphualpaai kha in ki-um mawh hi.

A beisa Kawlgam ki-ukna tungtawn in, hamphatna pawlkhat a ngahlawh ih om hi. Kumpi Pilsinna a ginat loh hang in, ih mainawt tek in, gualzawhna sangpipi ih ngah hi. A hizong midang te’n gualzahna sang a ngah leh a mipih te a huaizo kei zong, lampi a khialh pih kei hi. Eimi-te gualzawhna sang ih ngah leh minam ki khen, pawlpi kikhen sak in ih ki va thei lai phot hi.

Nuntaak-khuasakna hangin, sum leh paai zontheihna, muhna ih nei hi. Gamgi kantan in sum ih zong liang hi. Ih zon mah bangin, a ci thei zong pawlkhat ih om hi. A hizong, a tamzaw black market leh thunei te golhguukpiakna tungtawn a hih man in, ih tatna khempeuh ah guktat bekbek tawh a kibang a, sepkhoptheih tawmzaw a hih man in, ngalkhaat bangin ih tanglen tek hi. Sumbawlna bek hilo, thudang vaihawmna te ah zong, blackmarket lungsim ih neinuam zaw ta hi. Khat leh khat kimuan leh thu-maan ding hong hamsa ta hi. Na khat peuhpeuh a hon-in, ih sepkhop ding a baih nawn kei hi. Sumvai ih van zawh nak leh Pawlpi Siapa tung nagawn ah, ih tuang nuam hi. Deih a bat kei leh pawldang khat ih phutzo pah lel hi.

Hun khat lai-in, ei leh ei sung, a thahat zawzaw in ih ki-uk hi. Kuamah dang in hong susia lo in, ei leh ei tualgal ih kido niloh hi. Gamkeek Mangkaang te hong tun ciang’ amau khutzat te uh tungtawn in hong uk uh a hihi. Tua khutzat te lo buang a dang’ kuamah a tangzo kei hi. Ih suahtaakna leh ih thahatna te ih sum maimang hi.

Zogam ah, a nungta Pasian thu hong kipuak a, lungnopna leh tawldamna a deih khempeuh in, ih ngah thei ta hi.Lungdamna leh hamphatna lianpi ahihi. Tua tawh kizui mah in Democracy a kici, mipi te thuneihna hong kipuak khawm a hihi. Kawlgam in suahtaakna ngah khit’ parliament democracy a zat ma-in, Zogam Pasian biakna sung ah Democracy hong tung khin ta ahihi. A zatdan ding bucing in hong kihilh lo a hiam? ki zangsiam lo hiam? Biakna leh pawlpi in, minam sung hong kikhenkham sak thulian pen khat hongsuak dihzen tawh kibang a hihi.

Mangkang khutsung pan suahtak nading’, a ki tansa ‘ei leh ei ki-ukna’ ngah theih kikna ding’ lunggulhna tawh, a beisa kum 65 lai-in Zogam ukpi pawlkhat leh mipite thukim na tawh ,mualtungmi ih hih zahkhat in, lungsim siangtho tak-in, Kawlgambup suahtaak nading ih panpih hi. Ih ki thutuahna te ih kisaktheih pih peuhmah a, a phawkna ding in, Union Day, “Chin/Zomi Nam Ni” cih bang-in tudong mah ih tang(observe) lai hi.

Alang khat pan in, tuibuasa kiluak kik theinawnlo bang in, tuahun lai mi te- ngim leh gel te tangtung zolo, lamkhial tawn kha tawh ih kibang den a, ih kileh zonai kei hi. Mangkang/Japan te Zogam hong siik ngiat nangawn, ih nan’/do teeltaal bang hilo, Kawlmi te-in Zogam khe tawh sik kullo in, Panlong vapai liang in, Zogam a vapia suk ih suak dihzen hi.

Panlong hunlai mi te lungsim puakzia leh khusak zia bangdan hi a, bang hang in, hibang thukimna leh khensatna te na bawl uh hiam? cih ngaihsut huai a hihi. A tom in ci leng, lungsim siangtho tak tawh, mikhempeuh liangko kikim ding’ leh khantoh na ding cih deihna hi mah a, ahizong “ih kipawl pihding kuabang te?” cih, ngaihsun khalo hi le-uh a kilawm hi. Tu hun ciang, ih theih/thuakna tamta a hihman in, ki pilvangta dingin, ih lam-en hi.

Mangkang khutsung pan ‘suahtaakna’ kingahcil lam, hunkhat sung naupang muamkhum tawh khem’ a bang phial zong’ Parliament Democracy ih nei/ciam kha hi. Khantoh huai mahmah sam napi-in, Party tuamtuam neihna hangin, U leh Nau sung nangawn kisia phialzo zahdong in, na ki-om ta leuleu hi. Mangkang te lungsim pi-cin dan ki manzo khalo hiam? cih huai hi. Saklamgam a teeng’ ih sanggam te na ngawn, Democracy gol pen gam khat ah, a suak’ a khankhiat hang un, zangsiam taktak zonai lo tawh a kibang hiam? u nau minam khat leh khat, gal leh sa bang in, ki banban lai thei mawk uh, a hi hi.

Democracy ih minthang sak pha mahmah a, ka deih tua hi, ih ci liang hi. Kipawlna khat sung a, rule neuno nangawn zuih ding hamsa ih sa thei hi. Gam ukna hoih a ki cih ciang, rule of law in limtak in nasem thei a cihna hi ding in, san hong kul ding a hihi. Democracy gam a, tungsa ten, zuih ding ki khung Law tam pha mahmah zaw cih, ih theikim ciat ding hi.

Socialist Party ci-in party khat bek tawh ki-uk na, khat leh khat kihuai ding cih, policy hoih mahmah tawh Parliament Democracy ki laih a hihi.Tua zahkhat mah in zong, mipi deih/teel kullo in, tungsiah te ih etzawh nak leh gam-uk makai peuh kisuak-kisem thei zanzan a hihi. A hoihna khat ah, Party khat bek a hihzah in, U leh Nau sung, kithu tuahloh nading zong hong omnawn lo zel hi. A hizong in, tungsiah te maimu kei khaleng’ cihna bek tawh, mipi te kithusim khanawn lo in, kim leh pam, khua leh tuui khualna mitte hong taw ta a hihi. Hih hunsung a, kumpi khutnuai pan, a khangkha te mit’ a vak kik/ a muhkik nang uh, a hamsa mahmah ta a hihi. Tua vang in, Zomi te lakah mipi leh minam khantohna taktak sang’ tungsiah/angsung khualzaw mittaw tampi om lai leh tuami te gamvai-minam vai ah a gamtat lai man in, Zomipi te ki gammang niloh lai tawh a kibang a hihi.

Nitumna, a khangto mipil mipantah siamte in, naungek khat kum 7 a cindong bek hong kemsak leu uh cin, micingtak khat in ka hong pia kik ding uh hi, ci liang hi. A langkhat pan, Kawlgam huihnin ih dikzawh hong sawt lua ta a hih man in, Kawlgam sung bek hilo, gam thupi dang ah ih tung zong, atam-atawm in, hunlui Kawlgam ki-ukna pan ih luahsuk Virus/DNA/Genetics kivom tek a hihi. Tua virus te quarantine (kemcing) zo/zolo cih-in, ih nasepna leh kipawlna khat peuhpeuh ah, thugen lai pha mahmah phot ding a hihi.

Kawlgam huam Zogam a, Zomi te sang in, Saklamhuam Zomi te’n gamvai suaktatak ngaihsut na ah, picing leh tangzai zaw-in ngaihsun theizaw ding uh a hihi. A gamlapi etkullo in, national politics knowledge lam a muhna uh kanhuai leh a etteh huai zaw ding hi.

Zomi te Pasian in leivui pan hong laamto in leitung kiulii kizeel ta ci-in ih ki koko hi. Lampi tuamtek ki tawn-in, thuakna leh ngaihsutna tuamtek tawh, ih maatek ki khuat hi. Ih nungzui ding-mimuan ding, hamsa kisa tek hi. Ih khekhapte ih enkik ngam nawn kei hi.

Khantoh zawk ding lunggulh in, pianna Zogam ih nusia hi. Innluah inntuan ci-lo’ki lengkhia phengphang hi. Ih Innpi kua-in, na vaan ding hiam? Innmun logam ih cih zong haaibang in, a-ngak a-zuun omkei leh buahthap kaai leh maimang thei veve ding hi. Ih Pupa gam, migam/ milei hong suak a, lenglaa bangin, ih vahawh hun’ hong tun khak ding’ lauhuai a hihi.

Israel te, koikoi ah a om uh zong, a khangkhang in minam-it leh “Pasian in nikhat ni teh gamkhat hong pia ding” cih lametna nei mite bang’ ih hi ngam diam?
Gam leh minam-it ih cihcih hang, ih tuahkhak ciat dung zui-in, uukna(Hobby) khat bang in kingaih sun a, hunbit taktak in a kipia khiangam ding kitam nai hetlo ban ah, a om sunsun te zong a thanemna te uh, ih lehpahtawi thei lai phot hi.

Tuciang, gamdang tung Pupa gam-it Zosuan te khangkhatna te bekbek hi zaw a, gamdang a, suak/khangkhia Zosuan ta te lakpan minam it a, minamvai nasem kimu khia nailo hi lai phot hi. Hih khangthak Zosuan te hong gamtaang le-uh, tukhang te sangin, muhna te a kipan pilna, siamna, neihsa te kicing zaw ding leh a tunga Kawlgam-gamh Virus/DNA/Genetics te a beilian keizong tu-hun zah in, gamtang(active) zonawnlo ding a hih man in, muibun mahmah zaw ding in ih lam-en hi.

A picing khantohna lam ah hong huh ding in, ih pilna,siamna leh hauhna, te zang in, Zomi te zia leh tong a kantel ding leh mailam lamlak thei ding in, Research Institute khat bang kipat huai ta lo hiam? Nantalsuan