Zogam thak bangci zuun ding? ~ Hau Za Cin

Zogam thak bangci zuun ding? ~ Hau Za Cin

Zogam Thak AMERICA bangci zuun ding i hia? Zogam Thak ah ZOMI bangci zuun ding? Zogam Thak ah ZONGEINA bangci zuun ding i hia? ZOLAI, ZOPAU, ZOGAM,…..

Zogam Thak lamah a teengsuak ding, inn leh lo kikhual ding, tu leh ta pattah dinga Zomite a honhon, a lomlom-a a kitun masak hun pen President Bill Clinton in “Diversity Visa”, a tom in “DV” a bawl zawh pawl hipan ding hi. Tua ma-a tungte pen amau hanciamna leh lampi tuamtuam zui a tung hi ding a, innkuan hilo in mimal hanciamna hizaw ding hi. A zin pak cih bang hi dinga, taamsuak ding cih lungsim leh teen theihna laidal tawi-a kuan hikhollo ding hi. Tua ahih leh a lomlom a a kitun pen kum 1993 zawh hi ding cihna hi.

Kum 1993 leh 2009 kikal, kum 16 sungin Zomi milip tul val kitungman cihna hi a, a tamzaw a ciahkik pak nawnlo ding, a teengsuak ding ihi hi. [Tul val ka cih pen a tawmpen in ka cihna hi. A mi phazah lian pen Zomi Innkuan USA in min khumna (record) khawng pan kimu thei dingin ka um hi, tua bang record a om leh]. US gam mi suak a, inn leh lo nei a, tu leh tate pattah a i pian i khanna Zogam nusia a nunghei nawnlo dinga pasal lungsim tawh kuankhia kihi phot hi.

Tua manin ZOGAM THAK a tung, ZOGAM THAK a bawlbawl, a satsat bangin ka ngaihsun hi. A tungsa leh a tunglai ding koi tamzaw ding… theilo… (Sia Lianpi @ Taanglungtup tawh ka holimna khat ah, “Sia Lianpi aw, la dawng bangzah phuakta na hiam?”, “Dawng nih”, “Na phuahsa leh na phuah lai ding koi tamzaw dia?”, “Theilo….ha ha ha..” Hong ciamnuihna hisam inteh). ZOGAM THAK a tungsa leh hong tunglai ding koi tamzaw ding kitheilo hi.

Bang hang in i pianna Zogam, i lam kiatna Zogam nusia mawk i hi hiam? Lasiam Tg. Thawn Kham in ZOGAM Lapi ah, “Ka lam kiatna, Ka lutang phum na’ng ZOGAM, kong it hi ZOGAM aw” na ci hi. Ahi zongin tu hun ciang Zomi pawlkhat adingin ‘lutang phum na’ng ZOGAM pen ZOGAM THAK hi kha ding hi. Zogam ah i ciahkik kei leh Zogam Thak ah i neihsa, i lamsa, i pilna, i siamna leh i lutang nangawn kiphum dinga, kinusia cip ding hi.

Leitung ah thatang hat khat a om leh amah sanga hatzaw khat hong piang pah a, mipil khat a om leh amah sanga pilzaw khat hong piang kik zel hi. A hau khat zong haupen den lo a, a thalaih ding ki khakcip theilo hi. Tua man in thatang hatna leh zawhthawhthu tawh vai kihawmna khempeuh ah amah sanga thahatzaw leh zawhthawhsiamzaw hong piang ding cihna hi. ZOMI leh Meiteite kikap thu khawng i sim ciangin i lungsim khat ah, thauvui thautang leh thagum tawh vai a kihawmna gam pen a sak pan, a khang pan thauvui thautang mah tawh kido a, a sung a pua pan nangawn in kisuam ziahziah hi cih i mu hi.

Zangkong Khuahun ci a Pu ML Thangbawi in hong suaksak zelna ah i sim ngei bangin Kawlgam ah Sen tampi hong lut in khuasung kongzingte ah khuang leh dak tum in awng ziahziah uh a, bulung balang sa kei uh hi cih i za hi. Tua banga sak pan khang pan kinekcip gawp dinga, hun khat ciangin tua ngapik bel kitamzan gawp thei ding hi. Tua pen leitung dan hi a, a sia khat a siazaw in laih in, a hoih khat a hoihzaw in a laih ngeina hi.

Tua banga i lamkiatna gam ah annek tui dawn a hamsat tak ciangin nuntakna ding zongin sak ah khang ah kidiangkek gawp in tu laitak Zomite ZOGAM THAK a kitung ahi hi. Annek tui dawn kikhamlo, nuntak hamsa cihte ‘a hang’ gen kikkik kullo in Zomi bek hilo Zomi leh Zogam nangawn a thei ngeilo mikang mivom misante nangawn in hong theihpihta uh hi; tua hang mahin ZOGAM THAK a tung ihi hi. Suakta Zomi hita. Tua ahih leh a ‘suakta’ Zomi a suahtakna gam ah bangci nuntak ding hiam?

1. Semkhawm ding hi hang: USA pen nikhat ni ciang USSR bangin hong puakkham kha zenzen leh tua hun ciang ZOGAM a nei thei dingin tu laitak Zomi khempeuh in ngaihsutna limci khat nei kawma nasep khawm hun hilo hiam. I lam kiatna Zogam ah kumpi gakcipna hangin suakta lo, na semkhawm theilo, kipawlkhawm theilo i hih hangin tuin suakta takin i semkhawm thei a, i kipawlkhawm thei hi. Gakcip hinawnlo hi hang. Tua manin hong khaktan om nawnlo a, hong dal om nawnlo hi.

I kipawlkhawm kei a, i sepkhawm theih kei leh kua mah mawhsak theih hilo, a suakta Zomi ihi hi. Tua manin i hihna taktak hong kilang ding hita hi. Kumpi in hong khamcip kici thei nawnlo hi. Khantohna ding, hauhna ding, siamna ding, pilna ding, khangthakte pattahna dingin i sepkhawm kisam ta hi.

2. Kihuh liailiai ding hi hang: Hong tung thak a om leh ahi thei bangin kihuh ding hi hang. Nasem thei ahih leh nasepna ding zonpih pah ding hi hang. A zawi i theih leh kilak ding hi hang. Pilna zong thei khat ahih leh a sangkahna ding kihilh in, a hih dan, a lampi kihilh ding hi hang.

3. Zolai Zopau innsungah zang ding hi hang: Sangkil kaan le’ng Zopau kizang mello ahih manin innsung beek ah Zolai Zopau hanciam ding hi hang. Zomi te in i sin peuh kisiam a, sawm peuh le’ng kitung hi. Pasal tup leh ngaltang tup. Zolai Zopau a zat theihna mun khempeuh ah zat a, pau dang a kisapna munte ah zong pau dang, lai dang zat theih ding a sia hilo hi. Kum 4, kum 5 khawng minam dang lakah om panin i Zolai Zopau mangngilh lianga a dangte i thupisakpah leh bel guai, maanlo ding hiveh aw!

Ahi zongin i lungsima i ciamteh ding hoih ka sak khat om: Zolai Zopau khen lamah Zomi i hihlam i mangngilhloh ding.
(….hih thu saupi kikup theih tepawl hi…. hiah tuazah hong gen phot ning)

US a tunzawh kum 10 khawng a phata khat in honggenna ah, naupang pawlkhat a nu leh pa a hopih ciang English bek zang uh ahih manin a nu leh pa tawh kiho theilo hi, ci hi. A kampau zat uh kibang nawnlo ahih manin. Hey man….. cih khawng, hey guys…. cih khawng zang ziahziah uh ahih cianga a nu a pa luvaisak mahmah uh hih tuak hi.
(….. hih thu ah Zomi Innkuan Kipawlna tepawl in manlang taka Zolai Zopau sinna hanciam pah ding kisam ahi tam ka ci hi, tua ahih kei leh innkuan khat leh nih hanciamna bek tawh Zolai Zopau kepcing ding a baih hetlo thu hikha ding hi).

Thukhupna:

Zogam Thak ah Zomi khempeuh paulap om hetlo a suakta taka kipawlkhop theih ahih manin kipawlkhawm ding, na semkhawm ding, kihuh liailiai ding…tuate eima khutsungah om hi. I sep kei a, i hih kei leh kuamah kimawhsak theilo ding hi. USA a tung Zomi khat pen a pil, a siam, gelna kicing a nei hi ding ahih manin leitung kiuli pan na Zomi pihte in hong galet dimdem a, etteh taaka nong kalsuan ding leh lamlakpa, lamlaknu nong suah ding a kideih hi. Nang nopsakna ding bek zong lo in na laizom Zomi khempeuh lamet leh mitsuan khat na hi cih hong mangngilh ngei kei in.

Zogam Thak ah Zomi i deih bang lianin kiseek thei hi. Zomi te pumbuk bangin ngaihsun ni. Zomi aw, na khutsungah a hoih, a hoihloh ding kinga takpi hi. Hau Za Cin