Thunget hun vs Naseptam ~ Pau Do Lian

Thunget hun vs Naseptam ~ Pau Do Lian

Tulai khuasak ziate Gam tuamtuam ah i-etciang adiak in gamhangto gamah mikhempeuh nawhtak (rush) ciat in nasepding atamluat man in zoman keikhaleng cih vive hileh kilawm hi. Nikhat sung izawhding a gelkholh(schedule) sang in a hunzui azat(manage) ding haksa zawden keei hi. Mipilte muhna-ah stress atamzaw pen hun ihzat(manage) siamloh man hizaw hi ci hi. Cihnop na ah ihsepnop/zawh nop man asepsang in ihsepzawh zahciang sepding hoihzaw cihi. Tuabang a hunzek siamloh man a ihnak sepluak man in blood pressure, gastric, anxiety leh fatigue cih te piangsak hi.

Thich Nhat Hanh in The Miracle of Mindfulness acih nasung ah, ankuang nasawp leh ankuang sawp hi ing cih nalungsim sung ah phawk in adangdang te nalungsim sung ah ngaihsun ken ci hi. Acih nop na ah na kuangsawp kawm in thudang ngaihsunsun lecin nakuangsawp deihbang in sianglothei hi, nakuangsawp siangkei leh nasawpkik kulding a nadang nasepding kitan’ding hi ci hi man mahmah hi.

Tua ahih man in hoihtak ahunzat theihna ding in gelkholh (plan) kisam hi. Tua hileh bangphat tuamna omhiam cihleh, stress tawmzaw in nasep hoihtak in zothei ding hi.

Barnabas leh Saul

Sawltakte tangthu 11: 21 Topa in nakpi takin amaute huh ahih manin mi tampi in thu umin Topa lamah akihei uh hi. Barnabas leh Saul tezong mitam pitak in thu ummi hongsuah ciang un thuhilh leh thungen dingtam lua ahihman in buai mah mah hi.

El Buli Ansai akici Barcelona Spain ah om in miphatna tampitak ngah khin uh a, an nenuam te khaguk advance a booking kul hi. Nasep tamlua ahih man in a neipa Ferran Adria leh a nasem ten nikhat nai 15 bangsemden uha, gimkisa mahmah uhi. Asai neipan hihbang a ansai minthang kimlai kumnih sungkhakding ci hi. Mipawlkhat bangin pammaih samahmah tuak uhi. Banghang kum nih khaksawm hiam cihleh, anei pan en award khempeuh zongngah khinmah hang aizong in tawlnga hithiat in mailam planning leh puahphatding te gelkul hi ci hi.

Sawltakte tangthu 13: 2 Amaute in an tangin Pasian bia-in a om laitakun Kha Siangtho in amaute kiangah, “Keima na a sem dingin ka sapsa ahih manin kei-a’ dingin Barnabas leh Saul hong piakhia un,” a ci hi. 3 Amaute in zong an tangin, a lu tung uhah a khut uh nga-in thu a ngetsak khit uh ciangin a kuankhia sak uh hi. Barnabas leh Saulte zong a nasepding uh tam mah leh Pasian kiang ah thunget natawh hunla in Pasian in asepding ziate uh hilh hi.

Kumthak 2013 sung ah Pasian kiangah ihnget tampi tak omding in ka um hi. 2012 sang in thupha azah nih/thum a angen zong om ding hihang. Thupha ih nget mahbang in ih nasepzong hongtam zawpah khading ding hi. Keibang full-time in sangkah in on campus nasem kawm, ABCUSA (American Baptist Churches USA) khutnuai ah ordination ka hihlai tak leh Refugee tekiang ah pastor (volunteer) leh FBC Newton ah sexton sepna cihbang kasep kawmkawm in kasin khakthu ahih man in gamsung gampua eimi te hihbang a nasepbuai om khading cih lam etna tawh honghawm sawn ing.

Ei gamsung ahpen keibang na khakbek semka hihman in, Boston ah sangkah ding in katun akipan hunzat dan buai mahmah ing ahangpen nasep tam man hi. Hihbang in nasep tamlua kawmkaal ah Pasian maipha zonding number 1 akoihding hoih sa mahmah ing. Asim mimal tungpan hihbang phutkhak thute a omleh kihawm sawn ni.

Jeffrey Pau Do Lian
Andover Newton Theological School