Thu ngaihsut theihna leh tapa taimang

Thu ngaihsut theihna leh tapa taimang

“Thu hong ngaihsun thei a” a kicih kiau na mun pen Tapa Taimang thu ah ka deihpen na mun khat hi. A nuntakna hong kikhelin hong kibawlphat kipatna hi a, thupi hi.

Kumpi Solomon in zong Paunak Lai Siangtho sungah hih “thu ngaihsut theihna” pen na limgen mahmah hi. Poimoh hi in teh. Munkhat ah bang hi danin na gen e – “Pilna leh thungaihsut theihna len tawntung in la, cik mah ciangin khahsuah ngei kei in.” Len tawntung ding, khahsuah ngeilo ding cih hi mawk hi.

Thudang khat ah, mihing leh ganhing I kilamdanna khat pen hih “thu ngaihsut theihna” mah ana hi. Mi siamten ganhingte nuntakzia a gen uh ciang amau pen ‘instinct’ tawh a nungta ci uh hi. Mihingte in bel ‘freewill’ kinei a, i hamphatna khat hi. Hi le zong hih i hamphatna pen koihmawk in mawkkoih theih ahihzia kiim le paam khuadak in encik le hang kimu thei hi.

Sangkah a pilna zong ciatciat lungsim a nei leh neilote lawhcinna kikhia hi. Sum zong ciatciat zong thu a ngaihsun theite hauhna to diak leh kilawm hi. Gamdang tung ciatciat zong e, lungsim a nei leh neilote kibang vetlo ci uh hi. (Bang kibang mah ding? huh!) A tawpna ah, mihai leh mipilte kilamdanna zong hih “thu ngaihsut theihna” mah hong hi sawnsawn lai leh kilawm hi.

Tua hi a, limtak a geel a sepkhiatna tawh ma kitun hi. Geel geel a nitum bek zong bel hilo zel. I ngaihsutna hoih pen sepkhiatna in a zuih tuan kei leh i mumang tawh a manphat(loh)na kikim lian hi. Tapa taimang pa pen… thu hong ngaihsun thei a, a kicih khit ciang, inn lam zuanin a pa kiang ciah pah vingveng cih I mu hi. Thupi hilo hiam? Nasia lua! – Tg. Samuel Nas @ Thu Hoih La Hoih | 25012018