Breaking & news update: Russia – Ukraine (April 02, 2022)

Breaking & news update: Russia – Ukraine (April 02, 2022)

1. Ukraine te Capital ahi Kyiv khuapi ngei teng pan Russia galkap te paikhia in pusuak khia ta uh aa, Kyiv region khempeuh Russia buluh te khut sung pan suakta ta hi ci in Ukraine’s Deputy Defense Minister Hanna Maliar in tuni taangko khia hi. Mrs. Hanna genkhiatna ah Ukraine khua te ahi Bucha, Irpin, Hostomel leh Kyiv khua teng Russia buluh te khut sung pan kihonkhia zo ta hi ci in ama Facebook pan taangko khia hi.

2. Russia buluh te Ukraine Khuapi Kyiv pan apaikhiat zawh uh ciang Eastern Ukraine lam aaom Russia minam te tenna Donbas leh Luhansk region lam manawh in kuan to kik hi ci uh hi. Russia buluh ten Ukraine Eastern lam aa state pawlkhat May kha sungin lak sawm ve ve uh ci uh hi.

3. Nung deuh in Russia ten abuluh uh Chernobyl Nuclear power plant pi pen Ukraine galkap ten la kik zo uh aa, Ukraine Flag suang kik zo ta uh hi ci in CNN in report na nei hi. Abup pi in en kik leng Russia galkap te tampi si in galvan tampi sum ta uh aa, expert pawl khat in belh Russia-Ukraine kidona ah Russia ten lelh to to uh in Ukraine mipi ten gualzawhna ngah uh hi ci uh hi. Ahi zongin Ukraine gam mun khempeuh Russia te suksiatna hangin kisia mangta ahi hi.

4. US Kumpi in Ukraine te $300 million man galvan te huh leu leu uh aa, tualak ah amanpha leh technology asang mahmah Switchblade suicide drones, Anti-drone systems, Armored vehicles, Night-vision equipment, Thau tuamtuam leh Ammunition te tampi kihel hi. Tuni ciang dong US ten Ukraine galvan aading huhna 2.3 billion piakhia ta uh hi.

5. Zanni April 1 ni in Ukraine Helicopters ten Russia gam sung aaom Datsi/Diesel koihna fuel depot pi kap kham uh aa, meikang mang hi ci in Russia Ministry of Defense in taangko khia uh hi. Russia buluhna apian zawh Ukraine galkap ten Russia gam sung asim kikna akhat veina hi ci uh hi.

6. US kumpi in Soviet-era hun lai aa akibawl Soviet-era T-72 Tanks tampi Ukraine te kiang puak in pia ding uh ci in US thu nei lam ten genkhia uh hi. Hih Tanks te pen NATO gamte ii territories (gam) te pan kipuak phei ding aa, tu nipi sung kipuak pah ding hi ci uh hi.

More: Russia & Ukraine Update: Russia galkap asi aliam 40,000 val ta

*** MAL ii Pupi Russia te zong gal hong lelh to to ta uh in min hong sia tek tek aa, asawt lo in Kawlgam ah zong Mipi ten hong zo to to in MAL pi in gal hong lelh ding kilunggulh mahmah hi..**** Ref: CNN news Thomas On Sian Mung (Thomas Mung Guite) Washington D.C