Theikhol thei leng ~ Rev. Fr. Damian Dal

Theikhol thei leng ~ Rev. Fr. Damian Dal “Who will cry when you die” (Robin S. Sharma)

Leitungpan napai khiatni ciangin, nanga dingin kua in khitui anul kha dinghiam, ci in, laigelhsiam Robin S. Sharma in laibu khat nagelh ngei hi. Norman Cousins in,”Mihing khat ii nuntakna sungah akhasiat huai penpen thu in sihna ahi kei a, pumpi nungta gegu napi in, eite lungtang sungah sihna i thuakna te ahihi,” ci in nagelh ngei hi (The tragedy of life is not death, but what we let die inside of us while we live). I sihciangin kua akapding hiam, kua in hongkhua ngaihlawh dinghiam, kua in kei adding in akhi tui malkhat hongkiat lawh dinghiam cih thute in athupi masa thu ahih lohna hongphawk sak hi.

Tua thusang in, kakhasiat laitak in, kei kua in honghehnem dinghiam, kadah lai tak in kua kabel dinghiam, kalungnem laitak in, kua in kei thakhauhna hongpia dinghiam, annduh gilkial a ka omlai takin kua in kei ann kamkhat hongvak dinga, lungleng khuangai a keikia khuazingsung katutlai takin, kua in keitawh hong tukhawm dinghiam cih thu te in mihingkhat apiang vannuai mimal ading in athupi zaw thu nahihi.

Hih thute hangin, anunung thukhen natawh kisai in, Laisiangtho sungah Topa Jesu honggen in ah: cina ka omlai tak nongveh hiam, thongkia a ka omlai tak nonghawh nongvil hiam, annduh gilkial a ka omlai tak ann nongpia hiam, silh le teen naneihloh hunin, puanlum niklum nongpia hiam ci in kongdong dinghi ci hi (Mt 25: 1ff).

Lamkhatpan in genleng, adah te nadah pih hiam, akapte nahehnem hiam, alungkham te tha napia hiam, agilkial te ann le tui napia hiam, alunggim mite napan pih hiam, lunglen khuangaihna athuak mite nakhawlkhop pih hiam, aki paampaih mite napawlbawl hiam, aki nengniam mite na lamsanghiam, cihna ahihi. Hi thute i etciangin, kasih ciang kua kapding ci in, sihni sihhun ding thu hilo in, leitungah pumpi nungta gegu napi in, alungtangsung ah lainatna, gentheihna, lunglen khuangaihna lianpi tawh lungsim sihna thuakna te i thupitsak ding hongthei sak ahihi.

Sente paunak khat ah (Chinese proverb), “Thudong mi in, atheihloh hun minute nga sung sawt a, thudong ngeilo mi in ahih leh, akhan sungtawntung bangmah athei lo ahihi” ci hi (He who asks may be a fool for five minutes. He who doesn’t ask is a fool for a lifetime). Tua mahbang, kei hangin kua khasia a, kei hangin kua gilkial dangtak in kapa, kei hangin kua ki paampaih a, kei hangin kua khitui luanga, kei hangin kua in haksatna leh maizumna thuak a, kei hangin kua in supna leh baaina te thuak in, kei hangin kua lungleng khuangai in om a, kei hangin kua in lungsim koltangin nungta a, kei hangin kua in gentheih haksatna thuak a, kei hangin kua in lungsimnatna te thuak hiam cih thu te ei le ei ki dot kikkik ding nakpi in thupi hi.

Mihingte khat le khat i kizopna, i kiho na ahi, laiki khakna akipan kizopna khempeuh te in, i kizoppih minu/mipa adingin, anuntakna ii manphatna, ahoihna leh, amanpha sak leh ahoihsak ding bek hi loin, anuntakna mahmah in ama ading leh mite adingin khiatna anei nuntakna ahihna thu asangzaw leh apicing zaw a, atheisak semsem kizopna ahihding athupi ahihi. Xerox PARC siapi (guru) ahi John Seely Brown in, mihingte kimakaihna, kizopna in sum le paai le neih le lamh khantoh nading, hamphat nading hi masa lo zaw in, mihingte nuntakna mahmah khiatna aneisak kizopna leh kimakaihna ahih ding thupi masa hi ci in nagen hi.

Kasihni ding kathei kei a, bangci sihding cihzong kathei kei hi. Tua ni tuahun te sangin, ka pumpi nungta gegu napi in, lainatna lungkhamna leh, lunglen khuangaihna tawh kalungsim sungah asi mi ka uutkei hi. Kasih ciang kua in kei hong itna, hongphawkna tawh akhitui malkhat hongkiat lawhmawk ding hiam cih kathei kei hi. Aomding in zong kangaihsun ngamkei hi. Leitungah nisim in mi atul athen in si a, tua te lak ah, kuama phawkkhak loh, amau te a dingin, khitui malkhat zong akikiatlawh lo tampi a om nathu i thei hi.

Kasih hunciang aluangding khitui te theikhol thei hi leng, kasih hunciang adah akapding mite thei kholthei hi leng, ka sih hunciang alungleng akhuangai ding mi khat le nih om zenzen kha ding hi henla, tua mi te thei kholthei hi leng, kagen nop thu in: kapumpi asih ma in kalungsim asihloh nangin honghuh un kaci nuam hi. Kei bek hilo in, mikhempeuh in tua mah acinuam dingin ka lamen hi.

Sihhun sangin, sihma thupi zaw a, sihni sangin tuhun tuni thupi zaw hi. Nu le pa sanggam u le nau te, it le ngaihte in hong paisan in, mual hongzuatsak ni le hunciang, khitui luangin i kah sangin, tu hun tulaitak a, akhitui luanna, alunglen khuangaihna, adah akapna thute tungah adamsak, anuntakna uh khiatna anei sakkik te, anuntakzia uh ahoihsak, a etlawmsak, apicingsak te ihih ding thupi hi. Tua bang nuntakna in Topa deihnuntakna zong hi a, hun nunung ciangin, maipha ngahnang zong ahihi. Rev. Fr Damian Dal (Leuven, Belgium, 25 January, 2015)