Khitui Nam Nih Tawh Na Ciah Ing
Tutung Zomi Khangno khempeuh kimuhkhopna khawmpi “A Nihveina Zosuan Tuailai Khawmpi” pan khitui nam nih tawh na ciah ing.
A khatna pen, Manglai hilh dinga hong pai pianpih sanggam Zomi te a hun man nailo a ‘kiciahsak’ cih ka zak ciangin ka khasiat hong suak lua mahmah ahih manin ka thugen masakna pen ah ka khitui hong luang kha mawk hi. Zosuan Tuailai Khawmpi siim u leh nau a kuamah peuh in tua a hon nitak a ka thugenna nong telsiam ding uh hong thum ing. Internet tungtawna video pan a en kikte in zong na et khak uh ciang nong telsiam nading uh hong gen masa nuam ing.
Zomi khangnote kimu khawm in kithuahkhawm in kikhawlkhawm ding, holim in nui khawm ding ci in ni tampi zong kigel zolo a, ni tawmvei sung bek a kigel zo ahi hi. Tua tawh kiton in Zomi siamsin naupangte in ni khat ni ciang a zattheih ding uh Manglai, Mangpau a theih ding uh, a lunglut ding uh deihsakna tawh ni 10 sung bek kihilh in kisinsak, la kisakpih leh cih deihna hi a, ni 10 sung nangawn nuamtak kikhawl manlo a ‘kiciahsak’ cih lawmlawm pen hong khasiat-huai lua deuh a sa himai ing. A khasia baih lua ka hih leh lah hong maisak unla… Ahih hang, Singapore pan lawptak in Lamka pan hong pai Manglai hilh ding siate tawh kimu nuam ciin ni thum bang a pai baih zawzen ka hih uh hang Kawlpi ka tun uh ciangin ‘amau ciahta e’ hong kicih ciangin Tedim ka tuntoh ding nangawn uh lawp ding zaha lawp zo nawnlo in Kawlpi ah ni khat bang ka kiziakai sak uh hi. Mailam ah hih bang vai limci a kivaihawm kik zawh leh a tawp dong a kizatsuak theih ding lunggulh huai mahmah hi.
A nihna pen, khoppi bei ni, nitak mangpha khakna leh khawmpi khakna hun ah lawptak, maitai takin kikhakna bawl ding ciin ka ngaihsut laitak in ka pianna ka zuapa Pa Pum Do Lian (74) in lamet het loh in ka khua uh Murlen ah hih leitung nusia in Pa kiangah hong ciahsan hi cih ka zak vat ciangin ka khitui hong luang leuleu hi. Hih leitungah cikmah cianga kimu kik nawnlo dinga ‘Mangpha khak’ a kul manin ka khasiat hong suak vat in ka khitui hong luang kha mawk hi. Mihing i hihna hong kilanga, hun nai kei si e maw Pa ka ci nuam phial a, ahi zongin eite hong bawlpa Pasian in ‘hunta’ ci ahih manin ka khasiatna ding a om kei hi.
Sihna, natna, lungzuan khuangaihnate a om nawnlohna mun vantung gam ah i kimuh kik ni ciangin hong bawl Pasian min phat in Siangtho, Siangtho, Siangtho ciin vantung tuuno i phat khawm ding hi.
Ka pa hong nusiatna hanga hong dahpih, hong phawk, lai hong khak, thu hong ngetsak, kam tawh hong hopih, phone tawh hong sama hong hehnem, nomau omna pan thu hong ngetsak khempeuh tungah ka lungdamna uh ko innkuan tangin kong gen a, Topa in a zah tampi in note tungah thupha hong piata hen.
Ka lungdam.
Hau Za Cin
Phuitong Liim
www.hauzacin.blogspot.com
Comment piaknop aomleh...