The City upon the Hill ~ Pau Sian Lian
Tangtawng a kipan tudong US te in a gam uh a hoihna leh paktat huaina a gen sim un, “Mual dawnah a om Khua” kici tawntung uhin leitung bupah ki engpen, a khauhpai le a nasia pen gam hihang ci-in kipak den uhhi. A ki pumphatna uh hilo in tu dongmah zong kuama nial theihloh a khauhpai pen gam khat hi takpi hi.
Tua ahih leh a kipah pih mahmah uh “Mualdawn a om Khua” a piangsak kua, bang himawk hiam? George Washington maw? Abraham Lincoln maw? Christian te maw? John F. Kennedy maw? Republican party maw? Democratic party maw? Martin Luther King maw? Ronald Reagan maw?
A vek pi-un kihel gaihi. Ahi zongin dawnna man taktak in Political Science kammal tawh gen lehang “institution” hoih neihna nahi masa hi. Institution pen a tomin “rule of the game” zong kici ziauhi. Hih institution cih te pen Alexander Hamilton, James Madison te’ phuangkhiat federalist paper te khawngmah siksan in constitution hoih gelh pha uhhi.
Federal system, check and balance (executive, legislative, judiciary), capitalism cih a kipan bills of rights le law tuamtuam hoih phatak na lam masa uhhi. Tua ahih manin galkap ki-ukna cihpeuh piang dihdih lohi.
President hoih, party muanhuai cih te bel hih institution tungtawn in ama thu in hong ki haih khiakhia lelhi. Leitung galpi nihna ven khit gal lelin a zawm dikdek Japan gamzong US in a institution te hoih phatak puah phatsal uh-a leitung ah a hoih pen gam khat hong suaksak hi.
I minam vai, kipawlna vai ah i thu paizia, i policy, i rule of the game bangteng himawk hiam? Tua te hoih mateng Ne Win lungsim, Than Shwe lungsim pen a Zo, a Kawl cih hilo mihing a kici khempeuh sungah a na om lua vive hi. Minam it leh democracy mah it masa dihni. Pau Sian Lian
Comment piaknop aomleh...