Malaysia, Klang Valley sungah zu atuh adawnkha mi 19 sikhin, tampi zato tung

Malaysia, Klang Valley sungah zu atuh adawnkha mi 19 sikhin, tampi zato tung

Malaysia, Klang Valley kuamsung ah Beer leh Liquor atuh akibawltawm adawnkha lakpan mi 19 te’n sihlawh khinta cih theSun pan kiza hi. Tua mihing nuntakna asusia, mihing sihnadong apiangsak Beer leh Zu atuh azuakkhia pen Klang Valley huamsung aom Townships tuamtuam pan kici a, Monday ni akipan buaina akipan cihi.

Zanni nitaklam 5pm hunciangciang Beer leh Zu atuh adawnkha gamdangmi Foreigners akigawm in mi 51 bang zato tunlawhkhin uhhi. Tua gu akikhel zutuh adawnkha tepen Sungei Buloh, Gombak, Ampang, Kajang, Banting, Klang, Shah Alam vengsung aom Hospital tuamtuam ah kipuak kawikawi uhhi.

Tuabangin zutuh adawnkha te lakah pawlkhat pen gimmahmah, huaisia mahmah uh ahih manin, zutuh dawnkhakna hangin misi pen ki behlap totothei khading cisawnsawn hi.

Sungei Buloh Hospital ah cina tamkipuak penpen a, amau kiangah akipuak bekbek mi 22 bang phakhin hi.

Zutuh adawnkha te lakpan asi te lakah Batang Berjuntal pan Security Guard asemkhat, Nepalis gammi 4, Indian gammi khatleh Bangladesh gammi khatzong kihel uhhi. Zato alupsan laitak te lakah Myanmar gammi, Nepalis gammi, Bangladeshi gammi leh Malaysian gammi tezong kihel uhhi.

Hih zutuh adawnkhial te lakah amasa penpen zutuh dawnkhapa pen Sungei Buloh Hospital ah kipuak masa hi. Monday nitaklam 7pm hunpawl in zatui Treatment kibawlding in akipuak ahihi.

Tua buaina hangin Police te’nzong tua zutuh te koipan kibawl in, koibangin ki hawmkhia hiam cihpen kanpah uhhi. Zuthawl tepen athawl tungah Label laisuan akician omlo a, Malaysia gamsung Sole Supplier khatin ahawmkhiat, tuapanin zusai Liquor Shop te’n azuaksawn uh kici hi.

Label laisuan akician omlo ahih manin tua zu tepen aki bawlkhiatna akician in kitheilo, Label tungah kigelhlo hi.

Hihvai tawh kisai in palik thunei ahi Selangor police chief Commissioner Datuk Mazlan Mansor in agenkhiatna ah asi tepen zu sungah gu akihel dawnkha ahih manin asi cipen kician mahmah ci a, ahi zongin Hospital panin zudawnkha in asi te asihna taktak Postmortem kibawlsak veve cihi.

Tua misi te asihlawhna adawnkhak uh Liquor leh Beer tepen Mandalay Whiskey, Grand Royal Whiskey leh King Fisher Beer cihbangin Label akituangsak te hi ci’n Investigors te’n genkhia uhhi. Tuabangin zu atuh abawl, aki zuakna munte kumpi thunei te’n alimkansan mahmah laitak uh ahihi. Tuabangin zu atuh abawlkhia leh azuakte pen gamdangmi vive kici sawnsawn hi.

More: Zukhamsa in mawtawhawl khatin mi taihkha in taisanziau, ataihkhak pen azi leh atapa nahi sawnsawn

Malaysia vengpawlkhat aom Zomi te zuhuansa adawndawn pawlkhat tezong adammello om cihkhawng kiza hiauhiau ngei himahleh, hihbangliang in atuahsia gawp kizanai samlo hi. Ahi zongin zu limlim pen ahoihloh banah zu atuh tepen cidamna susiabaih phadiak in asihlahpah lianlianzong omthei hi. Sawltak #zomidaily