Thanks 2014 Gospel Concert D.C Area ah picing tak in kibawl

Zomi D.C News: Thanks 2014 Gospel Concert D.C Area ah picing tak in kibawl

Pasian hong panpihna tawh “Thanks 2014 Gospel Concert” pen D.C Area ah Evangelical Baptist Church (E.B.C) (D.C) Pawlpi te’ makaihna tawh picing tak leh nasia takin kibawl aa, tualai ah sak leh khang pan Zomi tampi hong kihel thei uh hi.

Hih Gospel Concert ah Zomi Innkuan USA ten Zinmangpi dingaa hong sap uh ahi Kawlgam pan Sianu Esther Cingsan leh Zomi Gospel Concert (Tulsa) ah Special Singers dingaa akisam Kawlgam pan Tg. Khuppi leh Lia Niangpi (Idol) te hong kihel thei aa, picing mahmah hi. Tua bek tamlo in D.C Area om Zomi te makaih Pawlpi tuamtuam pan Local Singers Lasa siam te zong hong kihel thei uh hi.

Tua hun sung mah in Zomi Innkuan Washington D.C Area (Zomi D.C) kipawlna ten Siamah Esther Cingsan in Kum 33 sung Pasian la leh Minam la te sakna tawh Pasian min leh Minam min hong thangsak, hong pahtawina hangin “Pahtawina Laipi” zong kipia thei hi.

Hih Gospel Concert pen D.C Area om Zomi te bawl Concert lak pan a nasia leh a picing, standard a nei pen Concert khat in kiciam teh bek thamlo in, Zomi te kipumkhatna, nasep khop theihna hong laak ahih manin I minam aadingin angtan huai mahmah hi. Hong vaihawmkhia E.B.C (D.C) Pawlpi tung kilungdam tek hi. Zomi D.C News group