2020 General Election ah Zomi hihna tawh etkak ding thute ~ Zam Thuam

2020 General Election ah Zomi hihna tawh etkak ding thute ~ Zam Thuam

Party, Policy, Personal – Koi zaw tawh mipi in teel ding cih kigen khol theilo hi. Thudik le siangtho tak tawh mipi in mee a piak theih nakleh hih thu thum pan khat hangin mee pia ding hi. Mee pia dingpa lungsim ah a piak ding palai pa pen hih thu thum ah a deih vive tawh kituak siat leh lungkim takin tua palai pa pia kha ding hi.

A hih hang Zomi sungah koi pen tawh ki en in mee hong hiam cih ahihleh gamvai mittang tawh en in mee kipia masalo kha thei ding hi.

Local or Logical or Political Culture

Tualsung tatzia ngeina bulphuh ding maw. Ngaihsut siamna, khentel theihna a bulphuh tatzia kalsuanzia bulphuh ding maw. Gamvai ngaihsut thupomzia tungah a kilam tatzia ngeinate bulphuh ding maw.

Mipite lungsim puakzia le a awmsung thu hi mawk ahih manin mipite in kiteelna ah mee a piak ding palai a khensat ding ciangin a bulphuh ding thubulte khat sungah amah tawh a kisu kha pen ahi tatzia ngeinate mah hong bulphuh ding hi.

Mistake or Missed Take

Thupomzia a khial tampi hong om ding hi. Mee khiat hun ding nai semsem kalsuanzia a khial hon khat hong kilang semsem ding hi. A lang khat ah a khial hilo napi a kimangilh, sep khak loh, phawkkhak loh pawl khat hong om dong hi. A kimangngilh kha a kinusia hon khat hong om ding hi. Hong kithei hong kiphawk hi a ci kha lo hon khat hong om ding hi.

Khialhna pen kithum leh mipi in telsiam thei hi. Awlmawh lohna nusiat khakna pen thum tawh baih a ven ding baih paklo hi.

To Judge or To Be Judged

Mipite pen ama upmawh thu tawh ahihna va gen phei kha ek pawl khat om thei hi. Na tua cih keileh tua bang mi na hi hi ci sukziau a thu a khen khol kiom thei hi. Kuanglui khat in mipi te tung thu a khen ding hilo in mipite in amah bang ci bang hiam cih a khensat theih a muh theih dingin hanciam huai zaw hi.

Gamvai ah mipite khial ngeilo hi. Mipite tungah bangci muh cih kikhial zaw hi.

More: Pheisam siam abang Nauru tuikhulh gam ~ Zam Thuam

Mipi in a deih a tel ding hi zaw ahih manin mipi in a deihmi hih ding palaite in kingin ding ahi hi. Koi bang hileh hong deih ding hiam cih thei napi cin (cilesa kinaina, beh le phung, awkaih cihte ah khialhlohna awlmawh hamtangna) tuate zuilo a mipi tung thu na khen leh mipi in a mee tawh nang thu hong khen ding hi. (Zom toto lai ni) Zam Thuam