Teel siamna i kisam hi (Koi teelzaw ding)

Teel siamna i kisam hi (Koi teelzaw ding)

Nisim naisim in, i mai-ah teel ding lampi nihta hong om denden a, koilam teelzaw ding cih pen Pasian in asia/apha teelsiamna(khentel theihna) khuak hong pia ahih manin eima’ khentat ding, eima’ teel ding ahi hi. I teelsiamna leh i teelsiam lohna tungtawnin i nuntakna sungah agah hong kimu khia thei ding hi.

👉 Thuhoih thumanpha gen ding leh kikup ding tampi i nei/thei a, thusia lasia gen ding leh kikup ding zong tampi i nei/thei hi. Koi teelzaw ding?

👉 Hih dinga kilawm ahoih tampi i thei-a, hih loh dinga kilawm zong tampi i thei hi. Koi teelzaw ding?

👉 Pai nading mun tampitak i thei-a, pai loh nading zong mun tampitak i thei hi. Koi teelzaw ding?

👉 Mikim tungah piak dinga kilawm tampitak i nei/thei a, mikim tungah piak dingin a kilawmlo zong tampitak mah i nei/thei hi. Koi teelzaw ding?

👉 Thumanna leh cihtakna tawh i nungta thei-a, zuau leh khemna tawh zong i nungta thei hi. Koi teelzaw ding?

👉 Midangte i it, i hehpih thei-a, midangte mudah in i langpan thei hi. Koi teelzaw ding?

👉 Midangte i deihsak thei-a, midangte i haza thei hi. Koi teelzaw ding?

👉 Mi’ mawhna i ciamteh thei-a, mi’ mawhna i maisak thei hi. Koi teelzaw ding?

👉 Mi kilemsak thei-in, mi i phat/pahtawi thei-a, mi sutuah thei-in, mi i gensia thei hi. Koi teelzaw ding?

👉 Gen dinga kilawm tampitak i nei/thei a, gen dinga kilawmlo tampitak zong i nei/thei hi. Koi teelzaw ding?

👉 Hoih theih nading tampitak i nei/thei a, siat theih nading zong tampitak mah i nei/thei hi. Koi teelzaw ding?

👉 Thuakzawhna tawh i nungta thei-a, thuakzawh lohna(lungkiatna)tawh zong i nungta thei hi. Koi teelzaw ding?

👉 I kha cidam/thahat nading tampitak i thei-a, i kha thanem nading zong tampitak i thei hi. Koi teelzaw ding?

👉 I pumpi cidamna ding tampitak i thei-a, i pum cidamna a susia thei ding tampitak zong i thei hi. Koi teelzaw ding?

👉 Pasian’ min leh gam ading leh i pawlpi’ adingin ihih theihna bangbang tawh ma i pang thei-a, Pasian’ min leh gam ading leh pawlpi’ adingin bangmah hih loin zong i om thei lel hi.Koi teelzaw ding?

👉 Tawntung nutakna mun Vantunggam i teel thei-a, tawntung sihna mun hell zong i teel thei hi. Koi teelzaw ding?

👉 Leitung pumpi’ ading teel khialhna pen lauhuai mahmah a, i kha ading i teel khialh leh lauhuai bektham loin dahhuai mahmah ding hi. Koi teelzaw ding?

I nisim nuntakna-ah teel siamna i kisam den hi. A teel siam mite adingin, thumong hong hoih/nuam ding hi. Pasian’ deihna lam(ahoih lam) teelzaw ding maw, satan’ deihna lam(asia lam) teel zaw ding, cih eimah ciat kidongin hanciamin kisin ni.

A teelsiam dingin laisim mimal kim Topa’n thupha hong pia ta hen. Amen 🙏.

Khazih sungah, ✍️ David Tuang