Tedim Zato Mialpi sungpan ki kona

Tedim Zato Mialpi sungpan ki kona

Chin state sungah Township om teng lak ah Tedim pen a khuapi pawl leh mipi a tam na mun hi. Zogam a dingin Tedim a khua lianpen khat le mi dang tawh a teng khawm khollo Zomi sitset tampi a ih om na khua a hihi. A khua lianpen a hih zah khat in Zato zong hoih in cina luna tampi tak in khua kiim khua pam pan in ki zuan ciat hi.

Zomi leh Cidamna

Ei Zomi te pen ih nek tawm tawh a buai pha diak minam te hi in zing huan nitak huan ding lungkhampi in a nei a zawng mahmah mite ih hihi. Mi nam dangte bang in (Family Doctor) innkuan Siavuan nei cih thadah damlohna khat ih nei phet in zong ki lak pah hetlo in si dek phial in ih nat teh zato a zuan pan, zatui zaha a vai hawm pan te ih hi.

Khanglui ten “Ih zawn in hong haisak “ a cih zah khat in naupang lai a ki pan (medical checkup) damlohna bang dan nei ka hiam? Ci a ki en sak ki tamlo omlo phial ding in ka um hi. Kei bang ka nei lai in ka ha a lin phet in bot ngam pahpahlo ka hih manin po thuah in sangsitte hong pai teh hong bohsak tawm khawng a ki ngak hi ha pothuah a a om ka hihi.

Zomi leh Neklehdawn

Zing huan nitak huan tawh a buai mahmah ih hih ban-ah mi namdangte dan in bangne leng lim ding, bangne leng tha om ding, bang teng ne leng ih cidamna tawh ki tuak ding ki ci zo peuhmahlo in bang dan in ne leng zek cing ding a tha om nang hi lo ki vahpakna ding a an a ne te ih hi. Tu hun ciangin bel ni dang sang inn kim ah tawm bang khangto zaw deuh tei hi hang.

Ni dang in hi le an tang a hai in ki batlak in sathau vatawt sikkeu tawh ki leitawi deidei hi hang. Kei ciaptehna ah 2011 khit ah gam dang mun tuamtuam a tung zong ki tam in Kumpi nasemte zong Kha sum hong tam zawk deuh teh mipi an nek tawm bang ki mang thei zaw deuh ta hi. A hi zongin ih na sep tawlna le ih nek ih dawn ki tut nai taklo a hih manin tha bei a cina tampi mah ki om lai hi.

Cinate leh Zato

Topa Zeisu in “Cidamte in siavuan kisam lo in, cina mite bek in kisam hi.” Matt. 9:12 a cih mah bangin damlohna lianpi ih neih ciang in zato ki zuan hi. Zato ih tun khit ciang in zatui zaha lei ding hong ki sawl ciang neih leh neihloh hi lo in ki lei sawm pah hi. Ki dam nuam a hih man in zatui man deek cih bang om theilo hi.

Tedim Zatopi

Tedim zatopi pen lupna 100 bek a hih manin mipi tamna tawh ki tuakin lupna a tawm mahmah a hihi. Tedim zatopi ah mei met zel a hih manin oxygen tawh a nakte a ding bangin dip kuat patauh huai mahmah hi. X-ray ding bang a om teh mei pai hun peuh ngak kul thei a hih manin ngaklah van hetlo hi. Zan in mei mit in khuamialpi sungah damlo a gim bang om le Nurse te in a phone uh deek in cinate hong bawl mawk a hih manin a damlote a ding le nurse te a ding in lung zin huai mahmah hi. Pumpi taksa damloh banah lungsim natna hong behlap mahmah hi.

Lunggulhna leh thukhupna

Tung Pasian in Zomite thupha hong pia in damlo ih gim mahmah teh zato a ki lak pante hilo in a hun hun in medical checkups nei zo leng lunggulh huai lua hi. An nek tui dawn zong gil vahna ding ciang bek in nelo in tha om theihna ding le cidamna tawh a ki tuak an ne zoleng lunggulh huai mahmah hi. Tedim zatopi pen lupna a tawm pen 200 bang a hih ding lunggulh huai lua hi.

Bang bang natna ih nei zong in Mandalay, Yangon pai un cih ki sawl kullo in ei phualzang Tedim ah ki bawl thei, Hong bawl thei ding Siavuan Siamah siamte hong om ding lunggulh huai mahmah hi. Sun leh zan in mei mit cih bang omlo zato lam tawh ki sai vanzatte zong a kim tak in ih neih ding lunggulh huai lua hi.

Hi thu teng a pian theihna ding in vaipuak a la thei dingte in veina lainatna hong nei in a pil a siam a haute in mun dang a zuat zawh hang mun dang a zuanzolo Zomi laizom tampi khualna tawh tha hong san ding uh Tedim zato khuamialpi sungpan ki kona awng in mikim bil sungah hong gin ngaih mahmah leh ka ut hi. Thang Nen Mung