Tedim Town Women Fellowship Khuado

Tedim Town Women Fellowship Khuado

Tedim October 22

Tedim khuapi sung a om nupite kipawlna ahi Tedim Town Women Fellowship (TTWF) makaihna tawh CMBC Pawlpi Hall ah October 21 – 22, 2014 sung teng Zola phuah dan, sak dan leh Zolam dan cihte sin kawm sa kawm lam kawmin khuado hun kizang hi.

Hih ni-in tan 10 Subject 3 pan atungsiah distinction ngahte mi 4 zong pahtawina apiak ban uhah 1970 akipan Zo ngeina tawh kisai tavuan la a vai ana ding den Siamah Ning En Hau tungah zong pahtawina pia uh hi. Tan 10 ongte pen kumpi sang bek hi loin SDA Sang leh Lawibual veng a om Sia Khawm Pau Sangte zong kihel uh hi.

Zo ngeina tawh kisai kum 40 kim bang Hakha pan Nay Pyi Taw dongah vai ana ding den Siamah Ning En Hau in mipite tha apiakna ah, “I tate in Zola phuak cih thadah a kiphuaksate zong sa thei nawn lo uh hi. Tua pen amau’ mawhna hi kei, nu le pate’ mawhna hi. Ko ciangciang pen lawki hun lap kha ka hih manun sin tawm kul loin kisiam lel hi. Khristian i hih khit ciangin Zo ngeina hoih tampi leh i thu i late pen dawi vai sa kha ihih manin khangthakte siam nawn lo uh hi. Khangthakte tungah Zola phuah dan, Zola sak dan leh Zo lam dan hilh ding pen nu le pa khempeuhte’ vaipuak hi…” ci hi.

TTWF Khuado apai khawm minkhum 123 pha uh a, mailam ah hi sang a hun limci zaw neih sawm ding leh nupite bek hi loin nungak tangval atam theithei hong kihel ding uh lunggulh huai mahmah hi, ci-in makaite in gen uh hi. Niangtui le moh tawh nisim TTWF Khuado kizang a, nuam kisa mahmah hi, cih thu kiza hi.

Tedim Post