Zomi leh Sila lungsim ~ Dal Sian Pau

Zomi leh Sila lungsim ~ Dal Sian Pau

Leitungah sila nuam kuamah ki-omlo napi in sila lungsim kineithei hi. Tua ciangin Pasian in sila dingin kuamah minam bawllo leuleu napi in sila lungsimmah kipuahthei tawngtung hi. Hihte pen Pasian hong piak hilo in, nam khangto masate in hong piak leh hong neihsak uh na hi mawk hi. Minam khangto masate’n amau khangtohna tawh kibangin minam dangte in gualpha uhen ci in hong deihsakluaknate hangin sila lungsim kipawkha mawk hi.

Minam khangto masasa in, minam dangte in angawh uh sila lungsimte paitomtom uh a, amau hihnataktak a kikkik uhi. Gentehna in sanggam Meiteite pen Paunam kikhenna ah Tibeto- Burman Language family sungah Kuki-Chin nuai-ah Paukhangto pen akiciamteh minam hita uhi. Amau zong nidang lai in “Meiteilon” kici in amaubek kihuaituamna in nanei uh a, “Meiteilon” akicite pen atangpi in Imphal khuapi sunga om hun uh na omtham hi.

Hih “Meiteilon” cih kammal azatlai un, a Meiteipau zang napi a, a awkaih leh awsuah tuamte pen minam dang bangin na kibawlngei sam uhi. Tua hunlai a minam tuam banga akisapnate uh pen Chungkham Yashawanta Singh in“The Linguistics Situation of Manipur” cih pansan a, agelhna panin Paunam kua kigawm hi ci a,tuate pen CHENGLEI, LUWANG, KHUMAN, MOIRANG (KEGE) ANGOM, KHABA, MANGANG, HEIREM AND NINTHOUJA (MEITEI).

Tuhun ciangin hih paunam kuate in Pau namkhat in kigawm in “Manipuri” cih pen tuhun khangthakte in a om omna ua kici gamin Meiteilon kicinonlo uhi. Tuhun ciangin, kuate pen chenglei hi a, luwang kuate hi a, khuman kuate hi uh hiam cih pen kitheinawnlo in, ni dang a, namkhat leh namkhat sila lungsim apuakte leh minam dangte in piak sila lungsim paikhinta uhi. Tua ahihmanin Zomite in sila lungsim ineihnate leh ipaihkhiazia ding tawmkimtakin kumpaksai lehang ka ci hi.

1. Zomite in sila lungsim ineihnate

A masa pen in Pu Zo suan leh khakte Ciimnuai i tunzoh kumzalom bangzah hiam i om khopkhin ciangin, muntuamtuam ah khua leh tuisat in, kithehthang in kinunta hi. Tua banga, akikhenthang Zomite khang msalai in,lampi leh kikawmtuahna haksalua ahihmanin pu leh pate amau omna munciat panin Awsuah tuamciat hongzahna uh pen sumkuang ciangkei in kei hanga, minamtuam bangin kingaihsutna hong neisakin, Zogam pualam panin, (out sider) te in, ipianphung leh beh kanmasalo-in, amau dikli (degree) laknopmanin minamtuam bangin hong nasut uh a, ei Zomite taleuleu in, makai utna, leh kipilsakna in la-in, midangte hong sutzia uh adik pen bangin ngaihsutna ineihziakin, ibeh,iphungte mah ciat tawh atuam, atuam in om in, ei oliginal kankhialo-in kideidanna, kithulaktuahlohnate hong piangsak ahihmanin, sila lungsim masa ipuakna ahihi.

2. Sila Lungsim suahna,nambat nihna

Mangkangte’in Zogam hong kap uh ciangin, mi masate lau in, ahihna uh gengamlo uhi. Gentehna, No kua minam na hi uhiam ci in akidawt ciangin,Zo or Zomi cibangin hansantakin kigenkhia gamlo uh hi ding hi.

3. Sila Lungsim suahna, nambat thumna

Linguistics Survey of India (Grierrson) 1904 akibawl masakna bang zong zanimah tawh akibat hang iminam min hong zangsaklo a, Kuki cih bang, Chin cih bangin, Bengalite leh Kawlte kammalte hong zanmanin, Ei leh ei ikilawhna ‘Zomi’ cih sangin,tuhun ciang dong pilna siamna, leh sinna aneih mipawl khenkhatkhat in sangtheizaw lai ihihmanin, Sila lungsim hong neisaktaleuleu hi.

4. Sila Lungsim suahna, nambat lina

Zotuallai pen Pu Pau Cin Hau in hong mukhiasak in Pautuam ahilo Awsuahtuam azangte sungah minam picingna ding leh minam picing a, gam leh leitang ahong neihsakthei ding Zotuallai akhangtohlaitakin Amelikangte in misonnalite Zogamah a hong sawl uh a, Zogam a hong tun uh hi.

Tua ciangin, Zotuallai mah zangin mualtung thuhilhna (preach on the mount) teng,hong teisakin Zolai tawh, hong khetsak uh a, ahizongin, amau in Mangpau akhangtohna ding lungngulhna neih uh hi cihtheih ding khopin, Zotuallai haksalua hi ci-in Roman script tawh hong pattah uh ahihmanin, Zolai sangin, Roman Script deihzawkna lungsim tuni ciang dong Ei Zomite in nei-in, hoihsakzawkna leh Zolaitaktak pen zatna ding lungsim neinailo tazen hihang, Misonnalite in sila lungsim hong gawhkikna uh hikiktaleuleu e guai! Sila lungsim hong neisak hi.

Tuhun ciangin, hih atunga nambat khat panin linatan, ipaihkhiazawh masia, minam leh gam cih pen inakgenta zongin, abulmah-ah dinglai hihang cih imangngilhloh ding kisam ding hi. Pasian deihna tawh tehkaklehang, Pasian in, leitung mite, minamkhat, paukhat, laikhat a zang dingin hong bawl hi. Ahihhangin, mihingte kiphasakin, Babel tausang hong lam uh ciangin, kihihsakna, kiletsakna leh hihtheikisakna lungsim hong neih uhtakteh, Pasian thangpaihna amaute tunga hong tung a, Pau tuam, mituam, beh tuam, hong piangkhia neinai hi cih phawkni.

Ahitazongin, Zomi (Kuki-Chin) kontek-ah enlehang, Paukibang akikhen minamtuam, bek kibang minamtuam a kikhen, khuakhat pan khuakhat ipemna hang a, minamtuam a suakkoikoite hihanga, Awkaih, Awsuah akikhel hanga, akhiatna (meaning) kibang napi-a, minamtuam akihisakte kihilel hi. Tua ahihmanin, Zomi sung-ah, minamtuam omlo, minamkhat ihihna lenkipin, ihihlohnapi, ahih banga, i-omna pen paikhiaciat lehang, minam dang (outsider) te’n hong khenzononlo dinga, tua ciangin, igenkhatpeuh, ingetkhatpeuh, state level, national level leh International level-ah ithu in muibun-in, mi dangte leh kumpi vaihawmte’n zong abil-uh hong dawhmahmahta ding uh hi. nuamsi in the maw…

Tua ahihmanin, Zomite’n, tuni ciang dong ei a, sangin midangte a thupisakzawkdetna lungsim ineilai hi. Kuamahpeuh, kimawhsaktheih ahihloh hangin, eimite sangin midangte in ingeina, i hihna, itong leh izia hong sutsakzaw uh ahihmanin eimi namte in, mite hong sapna, hong koihzia, hong sutzia uh leh hong sangzia bang pen adik bangin ngaihsutna ineih man-un, tuni ciang dongin iminam sungah kua matheihloh in isangzia, i upzia, i deihzia kibanglo bangin kinungta, kikhangkhia in khat leh khat kithusimlo leh khat leh khat ki-uituilo bangin i om uhi.

Hih bang nuntakna hong neisak leh lungsim hong kigotman in a khangto mahmah banga ngaihsutna ineihlai in akhangto kihilo a, matthatna lam manawh anakihizaw hi. Bang hang hiam cihleh, ingeina puante enleng ngeina (traditional) puan bang nawnlo, azemtuamtuam kibawlbehgawp in, ahoihna leh amel leh puamte kilahmang in bang puan ahihiam ci-in kidottuahkha in ki-omtheiphialta hi.

Tualoin, Zopau bang kammal kibehlapnawnlo phial tawh kibangin om a, kammalthak izat ciangin,Mangkam bang zangin, tua banga kammaltuam a zangtheite pen apil, asiam muh in ki-mu a, akhangto minam bangin kingaihsutna hong neisak ahihmanin, tua bang ngaihsutnate pen sila lungsim hong guan leh ninam a mangthangsak ding lungsim leh ngaihsutna hong piate ahihi. Tua ahihmanin, ineihsa leh pu leh pate tung panga iluahtoto nate pen meltuampialo in, ahihna banga kemto a, minam dangte nasan asilsakzo dingin hanciamna ineih ding pen thupizaw ding hi.

Mi tawk ikibatna ding, laimal leh kampau i-uangbawldeuh leh minam a mangthang ding hihang cih phawkni, Mi tawh ngeina, kibanglo minamtebek in gam leh leitang neithei-in, apiathei kumpite in zong deihsakna piazaw uhi ci phawk inla na politician khatna hileh, kumpite kiangah mi tawh ikibatlohnate bangzahvei na gen hiam cih ki-entel in, minam dangte toh ikibatlohnate bek in gam leh leitang hong guan in, kingahthei hi. S.Dal Sian Pau