Tedim Thuthang – Tedim News (01 June)

Tedim Thuthang – Tedim News (01 June)

1. TEDIM VIEW POINT

Sezang khualu, Leitawhtan khualu mualsang pen dawn pen Tedim View point in kibawl hi. Anuai mawtaw lampi, Pa Dam Khua Zam Datsi sai ah tuaksuk hi. Kahlei hoihtak kibawl a, Step 800 val pha hi. Viewpoint panbel Tedi khausung nuamtakin kigalmuh hi.

2. COVID-19 ZOMITE KHANLAWHNA

Leitung natnapi, Kawlgam ah a om masa penna Tedim ahi hi. Hih natna ngahte pen Intensive Care Uni (ICU) ah kikem ding hi a, Falam puak ding ahi hi. Ahi zongin Falam MP Zung Hlei Thang in adeihlohna nawhtakin hong pualak hi. Natna nei hong kibehlap ciangin Kawlpi puakding cih lungngaihna om leuleu hi. Kawlpi pan Khuanu khuapa leh kipawlna tuamtuamte in hong tangkoin hong nolh uh hi.

Tedim pan na kisa veve, kithangpai veve a, eimau neileng cihthu hong ging khia hi. ICU bawldan, manphatdan a theizaw deuhte in, ei bawlzawh ding hikei hong ci leuleu hi. A kisapna zui-in kideih lua mahmah , neih loh inzong hong phamawh semsem ahih manin, hanciam dingin kigeel ta hi. Gamsung pan gamdang pan huhna luan hong kipan pah a, ICU Committee kiphuanin kihanciam pah hi. Tedim Siavuanpipa in thupi takin hong maa hong panpih in, amun ding hong geelsak pah hi.

Tu in ICU building Foundation kibawl khin a, akhuamteng kahto pah hi. Hong kihel lai-un. Ih gamleh minam ading, manpankhopna thupi pen hi.
Oxygen Plant leh Meiset golpi khatzong kingiim hi. Ih omna ciatpan maa pangkhawm ciat ni. Nang hong ngaklai hi.

3. KHUALZIN GAMVAK NOP NAILO

Tedim pan Kawlpai ding, AD zum Thauhkhansa tawh kizin hi. Kawlpan cia nading, Kawl mahpan kila leuleu hi. Mini Bus te ah Mi alang bek kituang hi. Lampi hoihzahin khualzin nuam nailo suak hi.

4. TEDIM LE KAWLPI LAMPI

Tukum ading guah tamnailo a, Lampi pen nuam mahmah hi. Kawlpan Mini Bus te Tedim ciang Nai 3 pai a, Motor cycle te nai 2 pai hi. Nidangin Kawlpan Sozang nai 2, Sozang pan Tedim nai 2 kipai hi. Kumpi in lampi hong bawlsak lo ci-in kumtampi sung kiphun hi. Hong pai vanglakteh Sozang leh Tedim kal, Concrete lampi hong pia a, mawtaw sungah Ningtui zong bua non lo hi.

Lamhoih neileng, Cycle, Mawtaw kitaihtaih inteh cih ihlunghihmawh kholh khat ah hihi. Lam ahoihta zongin kitaih ding kuamah ngap tuamlo ut tuan lo uh a, nuamtakin khual kizin ciat hi. Concrete lampi pan ih state sungah hitan a sau a bawlna omnai lo hi. Lamkawite ah tawmta bawl uh hi.

5. COVID-19 TE KIKEPNA

Tedim in ICU neilo ihih manin, natna nei hong omteh, Inn kilam thakte sung ah kikem hi. Zato Quater thak siuseu buiding kinei a, khat ah natna neite kemin, khatah Volunteer Dr. te kiomsak hi. Senpi mahmah hi. Q kikem tepan, SHS No 1 sang thak leh FBBC Sangin ah kikedm hi. Anlim kivaak zihziah hi. Nuamsa uh hi. A duhgawh bang omphial leh kilawm. Hihte vak nang in khuasung ah huhna kidong a, kipia ziahziah hi.

Tedim zato pan a damsiang nih omta hi. Lungdam huai mahmah hi. Siavuan siamah te in, akep bekuh hilo, a lunglen lohnang, a patauh loh nang, a lungsim uh anau loh nangin ngeekbawl uh a, kisapna omlo-in koih uh hi. Hih hun a dingin Pasian in Siavuan hoih, Siamah hoihte hong geel sak hi.

6. PASIAN THU TANGKONA

Hih natna hangin biakinn kikhop ding hong kiphal nonlo hi. SYC (Shalom Youth Commitee ) ten Lawibual ah tangkona Awletna (Loudspeaker) pan Pasian nasem siateng kilaihin zingsimin Pasian thu tangkona kinei hi. Inn ciatpan Lai Siangtho tawh ngaikawmin, tha lakna kiciat hi.

Bethel AG pawlpi Biakinn tungah Awletna mah koihin, Nilainitak, Nipi nisun cih kikhophunte ah lungdamna thu tangkona kinei hi. Tha kingah ciathi. Rev. Nang Lyan Kap in Timothy Lai Siangtho sangpan zingsimin Bible Study nei a Aw letna mahtawh zomin a veng le paam te in phattuam pih uh hi.

7. SANG HON HUN DING KINGAKLAH:

Natna hangin tudong sang kong kihong thei lo hi. Kumpi sang kah dingte, Lai Siangrtho sang kah dingte in ngaklah takin om dimdem hi. Kumpi sangpan zong laibu hawmhawm ta hi. Lai Siangtho sangten zong sangciat puahin siaten kiging zihziah ta uh hi.

8. ZOMITE ZOOM CONFERENCE KINEI

Kawlgam, Zogam le Leitung gam tuamtuam a om Zomi makaiten mailam Zomite khantohna ding lunggulhna tawh Pu Thomas Khanno (Yangon) leh Pa Suantuang (Kawlpi) te’ vaihawm siamna hangin kalkhat thum veita, Zoom Conference kineithei hi.

Tua laiah Thulu tuamtuam zangh in, Zomi sungah mipil, misiam leh a zahtak huai Uliante in thugenna le thusunna kinei in, mipite ading theih nophuai thuthuk le thumanpha tampi kimukhia hi. Hih Zoom Online Conference hangin Zomite sungah mailam khantohna tampi piang dingin kilamen hi. By: Dr. Thuam (TKThang) Dimtui Vangkhua/ Tongsan