Japan, Tokyo khuasung ah mawtaw khatin khetawh lamkan mipilak nawkgawp

Japan, Tokyo khuasung ah mawtaw khatin khetawh lamkan mipilak nawkgawp

Japan gamsung ah migilo te ngongtatna kiza mengmenglo hi. Ahi zongin Monday nitaklam in Tokyo khuasung ah Van mawtaw khatin mipi khetawh lampai zuahzuah kawmkal hattak in hawlgawp cih Straits Times pan kiza hi.

Japan, Tokyo khuasung aom aminthang Shibuya Crossing kicihna khetawh lamkanna ah Monday nitaklam 10pm madiak in thupiang ahihi. Khetawh lamzikpi kantan in mipi apai zuahzuah laitak in Van mawtaw avomkhat hattak in hongkhawlsuk a, mipi te lauthawng in kihem zuahzuah uhhi.

“The Fast and the Furious: Tokyo Drift” Movie Scene tawh kibang phialdek in mawtaw in mipi ommuanglak ah hawlkekgawp kici hi.

Tua Van mawtaw pen Red Light kantan in taisuak a, Police Car te’nzong delhpah ziahziah uhhi. CCTV sungpan in aki etkik ciangin hih Driver pa’n mipi khetawh apailaitak khatveibek hilo in, nihveitak anawksawm kici hi.

Amasa in mipi adimzihziah khetawh lamkanna pedestrian-filled junction ah nawkmasa hi. Tuakhit Second 10 khitkhawng ciangin khatvei U-turn kikin, mipi omnalam ah nawkphei leuleu hi.

Sora News 24 te pulakna ah Police Officers te’n tua mawtaw Driver leh anei kuahiam cih akansan laitak uh kici hi. Kanphatna tawh hih buaina Incident hangin asi aliam kuamah omkhalo kici bilbel hi.

Tua Van mawtaw in mipilak anawk masaksawm laitak in agei aomkha khatin akhe tawh mawtaw nasuihsawm mawkmawk hi. Ahi zongin mawtaw in nawkkhalo bilbel hihtuak hi.

Hih lamkabom Junction pen Tokyo, Shibuya Station apualam ah aom hi a, leitungbup ah lamkabom abuaihuai, khetawh lampi kantan atampen khatin akiciamteh ahihi. Mipi atamdiak Peak Hour laitak in khatvei lamzikpi aki kantan ciangin mi 1000 valbang phathei ciliang hi.

More: Spain, Barcelona ah mawtaw khatin mipi nawkgawp in mi 13 si, 100 val liam

Europe gamsung tengah hihbangdan mipi ommuanglaitak mawtaw tawh nawkpatgawp cihpen tulamciang migilo te’n hong limzat mahmah uhhi. Tua Europe gamsung migilo te gamtat hoihlo tengin Asia gamsung hong lawhphei pianpianta hileh kilawm hi. Sawltak #zomidaily