Zo vontawite laitual lenna Swe-tui vangkhua – 2

Zo vontawite laitual lenna Swe-tui vangkhua – 2

Leitung Khumvum Kiruna Zinna – 11 May 2011 ni-in Sami a kici namneute omna Kiruna ah vanleng tawh ka pai uh hi. Tua mun pen Artic circle in huam ahih manin khua dam mahmah-aa lamgeiah vuuk pak bekbek kikhol eauaeu hi. Tua laimun ah Sami Parliament om aa, tua thu tawh kisai lecture khat ka ngai leuleu uh hi. Tua mun pen sanang(rain deer) kikhawina leh sik pianna(iron ore) mun hi a, leitung ah steel tam a pianna pen mun kici hi. Vanleng tung panin ih muh khempeuh vuukpaak hi phial aa, vanleng tual nangawn zong kimulo liang hi. Ka tun ni zan un ni a tum hangin khua miallo mawk hi.

Amaute adingin Lai Siangtho Lui sunga ni khawl cih pen lamdang luakhol kei leh kilawm ka sa hi. Ni a tum loh hun tam veipi om hi, ci uh hi. A pualam khua a dam mahmah hangin innsung nuam mahmah zel ahih manin khuahun nam nih a nei tawh kibang uhhi. Amaute in khuahun cih peuhmah a sia om ngeilo aa, puansilh sia bek om hi, cih kamzat tangzang khat nei uh hi (There is no bad weather but bad clothes). Ka theihloh kalin Thuamvum pan leitungvum a pai ka hi gige hi. A minthang mahmah Tuikhal tawh kibawl Hotel(Ice Hotel) khat om aa, a sungah kigiak thei hi.

Kiruna Khuapi Kituah Ding

Hih khuapi ah mi 23000 tang bang Iron ore sik sepna tawh nungta hi. Leisung sumpiang theite in a kan uh ciangin khuapi nuai-ah sik tamzawlai ci, ahih manin tu zawh kum 30 sungin tua khuapi kituah ding hi. Taih tawh kilam inn lianpipite nangawn kituah ding aa, Netherland-a company khat in hydraulic power tawh tuah ding ci mawk hi. A bei khempeuh Sik companyte in siding uh a, a kikhin man nangawn uh pialai ding ci uhi.

Huih Mei( Wind Mill)

Denmark gama WESTAS Company-te hanciamna tawh huih mei bawl uh aa, ka zintunna pan un 6 a kipei valval ka mu den uh hi. A khuamte 200 m bang sang aa, kum khat in 30 megawatt meitha bawlzo ci hi. A bawlna uh US§ million 5 bang bei-in, inn 50,000 a kicing pikpekin piazo hi. Zogam ah zong hi bang dan kibawl thei dingin ka um aa, ka lunglut peuhmah hi.

ESRANGE SPACE CENTRE

Kiruna tawh 40 Km bang a gamlatna ah European Union-te’ Estrange Space Centre om aa, rocket khah zel uh, kici hi.

Zo Vontawite Laituallenna Swe-tui Vangkhua

Zomite pianna gamnuam itlo-ngailo hi peuhmah lo-in nuntakna hamsatna hangin gamtuamtuam ah ih pai hi. Ih gam ih lei hong ukte’ bawlsiatna hangin zong a tung ih om hi. Ih lam kiatna leitang ih Zogamah ih innteekzo kei hi.

Va-ak anne bangin ih dipkua den hi. Sweden gamah pianpih laizomte a om diam ci-in ka dawp kiaukiau leh Leilum pan U Cinno ( Nang Khan Cin) tawh email tung tawnin ka kiho kha aa, Zomi Innkuan Sweden tawh kimuh nopna ka gen ciangin amau zong hong kikum uh aa, hong lemtang pah hi. Sweden gamtung Zo mite’ innpi ahi Sia Lian Dote zong na om ahih manin senpi mahmah hi. Amah ZISweden ah thuvanpi hi a, u Cinno in thuzeekpi a sem ahi hi.

14 May 2011 ni-in amaute thusiamna leh deihsakna hangin meileng tuangin Stockholm panin mipihte’ omna Ljusdal khua ka va paitoh leh Sia Lian Do, U Cinno, Lalpi, Sangpi, Khaipi leh England panin hong hawhpak sia paunote putu (Sia Zam Heh Pau) makai-in laizom zomi khangnote in hong na dawn ngeingai uh aa, ka pianna nulepa, sanggam ulenau leh Zogamnuam a mu bangin ka kingaihsun a ka lungsim hong zenlua mahmah ahih manin, ‘Zo vontawite’ laituallenna Swe-tui vangkhua,’ ci-in ka lungsim sungah hong kilo niloh hi.

Sia Lian Do in a motor hoih mahmah maibukah hong tuangsakpah lian aa, zinmangpi muak bang lianin hong dawn ahih manin ka lungdam pha mahmah hi. Cope Topa’ jubilee khit –aa thang Zolukhu khat khu ka hih manin Khaipi in, ‘Sia aw na lukhu hong nusiat in,’ hong ci aa, ‘A hoih zaw omlai,’ ka cih leh nang-aa bek deih hong cih ciangin Swedente’ bawllung siampa Zlanta Ibrahimovic bang ka phawk peuhmah hi.

I mipihte in hong ngai uh hi.Hong phawk uh hi. Ka lungdam zungzung hi. A nitak ciangin bawngsa sungkua a kizohuan ngiat tawh hong vaitut lian ahih manun Zo ngeina a bawlbawl bangin ka kingaihsun hi. Sweden gamah kamphen kullo Ciimnuai mi 50 bang om cih hong kigen ahih manin Zo vontawite’ laitual lenna taktak ahi hi.

Nute’ Ni Thuhilhna

Ljusdal khua ah Kayin pawlpi, Khalkha pawlpi(Belivers’ Church) leh ZISweden a om ahi hi. Sia Lian Do hong deihsakna hang mahin tua pawlpite kigawmin Nute’ Ni limcitakin kibawl aa, Sweden piteekte zong samin pahtawina pia uh hi. Luke 1: 46-53 bulphuh in , “Women, rise up and build,” cih thulu tawh Kawlgam numeite’ dinmun lapsang nading ka limgen hi.

Kikhawm mi 130 bang kipha hi. Kikhop man ciangin an ka nekhawm ngeingai uh hi. Nitak lam ciangin kamphen kullo Zomi teng in, “ Siapa am ni,” ci-in Pa Liante’ innah hun hoih mahmah khat Sia Pauno tutpihna tawh thuahin hong neihpih leuleu hi. 1 Pe 2:9 siksanin, “ Pasian’ zat minam- the people for God” cih thu bulphuh in tha ka pia leuleu hi.

Sia Lian Dote innkuan, Pa Liante innkuan, U Cinno, Sia Pauno, Pa Singte innkuan, Bergsjo pan aa hong pai pa Kapte innkuan leh Sangpite hong om thei ahih manin nuam mahmah aa, Lalpite nupa ahih leh nasepna hangin hong omthei nawnlo hi. Kikhop man ciangin a lim mahmah ankuang um khawm ka hih manun Zo vontawite’ laikuang umna Swe-tui vangkhua taktak hong hi leuleu hi.

Pasian a itna hang uh leh minam hong itna hangun a bante uh hong sausak uh aa, hong guakciahsak nuam hetlo uh hi. Pasian in hong thukkiksak ta hen! Nipi khuavak ni zingsang 7:36 in u Cinno tawh Stockholm ka zuankik uh a, sia Lian Do mahin a motor mah tawh hong kha hi. Sia Lian Do leh sianu Cing in a neih uh tanu melhhoih mahmah Esther zan tawntung a gilna sa-in ihmu theihlo ahih lam a nu in hong gen ciangin ka lungnuam hetlo aa, lungsim thungetna tawh ka panpihloh buang huhtheihna dang lah ka neithei nawn kei tathong hi.

Zingsang Ljusdal ka nusiat ciangin ka lung hong lengsim diaiduai mawk hi. Kei zong mipihte ka ngai mahmah hi. Mailam ah Swe-tui vangkhual Zo vontawite laituallenna leh laikuang umna hi tawntung ta hen. Suang Khen Pau