Huai, Kem, Don ~ Pau Khat Suan

Huai, Kem, Don ~ Pau Khat Suan

Gambup huam na nasepnop leh gambup huai inla, Minambup huam na nasepnop leh minambup huai in. Hausa ut nahih leh nakhua huai inla, MP ut nahih leh na kuangluina bial (constituency ) huai in.

Pawlpi kem sia nahih leh na pawlpi huai in. Mi’ pawlpi peuh tawh buai dihdih kei in.

Hausa nahih leh na khua ading nasem inla, na zawh ciang na khuavengte ading sempan in.

MP nahih leh na constituency vaan in en inla, nang vote ongpia mite’ omna, na mite huai in, kem in, don in.

Huai lopi, vaanlopi, thudon lopi, amite thusim lopi tua mite’ omna, tenna, khua le tui, nam leh gam vai khawng buaipih dah lel in. Tuabang nasepna mazang tautau khollo ding hi. A huathuai bek thamlo, lomtat a kithutuak lingling kimlai a khenkham na suak lel ding a, na nasepna ah makai cih thadah maikhak nasuak zawsop ding hi. Nahoih semkhia cih sangsik in awngvang sui bang in a susia nasuak zawsop ding hi.

Mipi’ vai mipi tawh sepkhopna bek ah gualzawh matutna hoih kimuthei hi.

– Martin Luther King Jr. in a ngaihsutna, a sunmang mipi gen in makaih a a gualzawhna tudong kip hi.

– Pharoah in amang gen a, Egypt kialpi pan gumkhia in, gamdangte Egypt ah tokai uh hi.

– Lee Kwan Yew in a sunmang gen a, a mite pilna guan ahihman in kum 50 sung in buannawng khuapan vanholh a leitung ah khua/gam minthang suah in, gamdangte Singapore ah tokai uh hi.

Na ngaihsutna hoih kha mah inteh. Zong sang mahmah kha inteh. Ahih hang tua na ngaihsutna tawh a kizom mite thusim lo a, tua mipi tawh na tonkhop kei leh puukna ding gamla lo hi.

Nasep na kipat ma in mipite’ theihtuak thute gen inla, kuppih huai mite kuppih in. Mipilte in a galte leh a maban a nawngkaisak thei dingte lawm suaksak masa uh a mazang uh hi. Huai masa inla, don in kem in, tonpih in. Pau Khat Suan