Bogyoke Aung San, Zomi himaw, hilo?

Bogyoke Aung San, Zomi himaw, hilo?

Tuma kum 10 lai pawlin Zomi te in kumpi sem ding cih lutolte mangmuhna, gunkhawm gundung aa siluang kiko cihte ih za ngei ciat ding hi. Hi bang thute tawh kizui in hi, hilo cih ih gencian thei kei hi.

Ulian mangpi khat a minthang, a zalian a om leh ei tawh ih kinai nopna, ei mi hih sak nopna tawh kam kigenna te zong om den hi. A diakdiak in 2010 kitelpi ah a gualzo, gambup lutang a sem U Theinsein pen Zomi hi aci zong ki om hi. Ahih hangin U Thein Sein pen Zomi hilo in Kawlmi khat na hihi.

Tua mah bangin Kawlgam in suahtakna ngah nading in makai pupi Boyoke Aungsan zong Zomi hi, hilo cih minam sungah thukhat hong om ngei hi. Hih thu tawh kizawi in a lunglut huai le a theihnop huai thu tampi tak hong om hi.

(1) Boyoke Aungsan in Panglong thukimna suaihkaihna ah akihel Zomi makaite tawh 10,2,1947 zingsang lam ki hosim na khat nei uha, tua mun ah Boyoke Aungsan in “ei Zomi (Chin) le Kawlte pen Mongoloid minam hihang.

Mangkangte pen a mel asa, amitmul uh tuam, aguh atang uh goldiak in ei tawh kibanglo hi. Kawlte mah tawh ih gam puah khawm lehang khangto baih pen ding hihang, kei zong Zomi (Chin) ka hihi.” ci hi. Tua mah bangin Behte Kachin makaite zintunna ah vahawh in kei zong Zomi (Chin) hi’ng mah ci’n gen hi” ci uhi.1

(2) 1992, Mandalay City News Reporter in Daw Aungsan Suhkyi pen “Zomi numei ginalo (Chin-soh-mah, Chin soh mah) ci’n suaksak ngei hi.2

(3) Boyoke Khanggui

Boyoke Aungsan khanggui tawh kisai in Kawl tangthu kante in a sutna pen tam om khollo hi. A pa khanggui pen kikan theilo ahkl kisut lo in mangcip mawk hi.

Boyoke Aungsan’ pa min pen U Pha ahi hi. U Pha pen Sitni (lawyer) khat hi cih ciang bek kithei in a nungthu bangmah genna sutna omlo hi.

Kawl tangthu kan khat ahi Sia Tan Win Hlaing in Boyoke Aungsan khanggui sutna khat gelhkhia ngei hi. Tua khanggui sutna zong pen Boyoke Aungsan i nu, Daw Suh lam hi a, a pa U Pha lam pan ahih l eh a nu le pa min bek gelh hi. U Pha i nu le pa pen U De Koo (OD; onfukd;) Nu Suai Lay (qJGav;) ahi uhi.3 Amau pen zanglei nei minuamsa innkuan hi ci’n gen hi. Tua lo adang U Pha khanggui pen akigencianna omlo suak hi.

Sya Tan Win Hlaing gelhna ah, Daw Suh pusawn khat ahi Boyoke Aungsan Pi’ i apu pen U Chin (Pa Zo) hi’n, Pinn khua Hausa ahi hi. Amau khanggui pen Pagan kumpi gam akiat ciangin galtai Pagan kumpipa tanu te suanlekhak te ahi uhi.

Kongbaung hun (Alaung phaya kumpi khanghun, AD 1752-1760) ah Pagan kumpipa tanu suanlekhak khat ahi U Myat in Pinn khua hausa sem hi. U Myat suan ahi U Chin in apu mun luahto suakin Pinn khua ah hausa sem hi. U Chin in tapa 4 nei in, a nihna pa U ShweNi in Natmauk khua ah Hausa sem hi. A hun pen Mindong min khansung (1850- ?1878) hi ding hi. U Shwe Ni pen Boyoke Aungsan’ nu Daw Suh i Pu ahi hi.4

(4) Lai-at siam khat le Boyoke Aungsan PSO asem ahi Bomhu Hla Thun (aka) Tetkathu Ne Win in “Boyoke in kei pen mualtungmi (taiyinta sisan) kihel ni’ng” ci’n ki ummawh ahih lam gen ngei hi ci hi.

Ahizongin a tangthu a at na ah Boyoke pen Kawl mi siangsitset dan in gen zel a, a pianna khanggui sutna nei lo hi. “Khampat khua uk pa tawh zong kinai uh a, a pu apate pen kumpi suanlekhak hi” ci’n gen hi ci’n zong gelh hi. Ahi zongin hithute pen anu khanggui lam genna hi a, a pa lam pan kinaina na hilo hi. 4

(5) Wikipedia in Aungsan thu a suahsakna ah a pa U Phar pen Kawlgam aa om Zomi (Myanmar-Chin) hi cin na ciamteh uhi. 5

(6) Ei Zo mite, Kawlten i min in hongsam theilo ahih manin U Chin, Maung Chin, Chin Lay cih bangpeuh in hong sam uhi. Tua min mahtawh ong ciamteh uhi.

Zanggam a tun zawh asawt Zomi pawlkhatte, khangsawnte in Zopau, Zo ngeina te theinonlo in nam man ding dahna tawh ata, atu te min vuah Chin ci’n vawh thei uhi.

Ka sangkahpih ka lawmpa khat zong apa te unau vuah Chin min kiguang kim ciat hi. Ka lawmpa’ pa min pen U Chin Maung ahi hi. Lamdang sa in ka dot leh ka pu pen Chin si kihel hong ci hi. Ahi zongin amau, a tuletate pen Kawlmi ci’n kithei ta uhi.

Tu madeuh in zong Tongsan.org ah KenWin MinGyi U Kaung neu min ahi Maung Chin siksan in Zomite hiding hi cih laigelh khat suak ngei hi. Tua mah bangin Boyoke Aungsan Pu sawn ahi U Chin pen zong a khanggui ah Chin si kihel ahih manin Chin ci’n min akiphuak zong hikha thei dingin ka um hi.

A tung a thute i ngaihtuah ciangin Panglong suaihkaih lai in Boyoke Aungsan in Zomi makai te kiang le Behte makaite kiang a gensim khiankhian ahi “Kei zong Zomi khat mah hi’ng” acih pen hithei dingin ka um hi. Tuamah bangin Boyoke Aungsan sisan sungah Zomite si kihel kha ngel ding hi ci’n ka um hi.

End Notes

1. Dr P.S Kham Do Nang in Zingsol Journal ah a gelh thului pan kila hi a, ei Zomi sung ah zong a kigen zeuhzeuh thu khat ahi hi. Pawlkhatte in Boyoke Aungsan in makaite a zolna/khemna hilel ding hi ci’n zong a um mawh ki om hi.
2. Dr. PS Kham Do Nang in Zingsol Journal ah a gelh thului pan laksawn hi.
3. U Pha le a nu le pa’ te(Boyoke Aungsan Pa, PulePi) min pen Kawlte in nei ngeilo uhi. Tua hi a, zanggam-Zomite (Asho-Chin) te hithei kha ngel ding hi” ci’n zong kigen hi.
4. Tetkatho Ne Win aka Capt. Hlathun gelh ahi Boyoke Aungsan thu laibu sung pan a pianna, a suahna a gelhna laimai pan pawlkhat lakkhiatna le Mindat Sangsiapi U Shing hong gensawnna pan hi.
5. Boyoke Aungsan i neulai thu (early life) ah a Pa U Pha pen Myanmar-Chin cin at sitset uhi. Lai-at: Dr Nang Khan Lian

References

1. P.S Kham Do Nang, “Boyoke Aungsan in Kei zong Zomi (Chin) Hi’ng Na Ci Ngei Hiven”, Page 12, Zingsol Journal, Lom 15. Hawm 3, April, 2013.
2. Tan Win Hlaing, YokTuh Mah Piua Taw Myanmah Tamaing Win PohKo Thoo Myia
3. Tetkatho Newin, Boyoke Aungsan
4. Wikipedia, https://en.m.wikipedia.org/wiki/Aung_San