Tchoukball Federation thu tangkona

Tchoukball Federation thu tangkona

TCHOUKBALL FEDERATION

Hih kimawlna pen Kawlgam ah a thei tawm mahmah lai a, OM Sport Ministry, Myanmar pan Zomite a hilh kawikawi lai tak ahi hi. Kawlgam ah Pu Do Khan Khup (Chairman) in makaih hi. 2011 kum Vietnam ah 2nd SEA Tchoukball Championship ah Pu Mung Thawn Khai makaihna tawh Zomi khangno (numei team leh pasal team) va kihel uh a, 4th ngah uh hi. 2013 kum in zong Thailand ah va kimawl uh hi.

Hong tung ding August 22-24, 2014 sung Singapore khuapi: Pasir Ris Sports & Recreation Centre ah 3rd Asia Pacific Youth Tchoukball Championship tung ding hi. Hih kimawlna ah a kihel dingin Pu Do Khan Khup leh Pu Mung Thawn Khai makaihna tawh va pai dingin geelna nei uh hi. A kimawl dingin Kawlpi ZYA tawh kipawlin Zomite khangno kimawl siamte a sap uh ahi hi.

1. Kimawl ding kum 18 nuaisiah: mi 11
2. International Tchoukball Federation Referees: mi 2
3. International Tchoukball Federation Coaches: mi 2
4. International Tchoukball Federation Physio/Doctor: mi 2

Hih kimawlna hangin hih a tung a Zomi khangnote in maban limci mahmah a kinei suak ahih manin sem khawm le hang Kawlgam ah Zomi-te in makaih suak thei dingin lametna lianpi nei uh hi. 2015 SEA Games pen S’pore in innteekna la ding a, tua lai ah zong a kihel dingin Olympic Committee tawh a kikup lai tak uh ahi hi.

Tua ahih manin tutung Asia Pacific Youth Tchoukball championship ah kihel ding pen mailam thu saupi ngaihsutna ahih manin thupi mahmah hi.

Pang khawm ni:

Mai August 22-24 sung Singapore ah a kihel dingte pen amau leh amau lamsaap kisik ding ahih manun, a kuama ciat in a lamsaap a ngah theihna dingun thungetna leh piakkhiatna tawh gam sung/pua ah a om Zomi khangnote khempeuh kong cial uh hi. Sum leh paai neih manin a kisawm hi lo zaw in Zomi khangnote khantohna ding geelna tawh a hanciam uh hi zaw hi.

Lam tuamtuam tawh Zomi cih a kidawk theihna ding lampi hong hon sak Topa a minthang den ta hen.

A thu a kician zaw-in a thei nuamte in dot theih dingin:
Pu Mung Thawn Khai (Khai)
OM Myanmar
Mail: [email protected]
Phone: 0950-868-52