Tangtak tai ni ~ Dong Mung

Tangtak tai ni ~ Dong Mung

Tangvalno thum lam dungah kitawng kawmin hong pai laitakun Papi khatin va tuak kha hi. Amaute kiangah “Tangvalnote aw a kitottot uh khol unla, kei hong zui dih un. Noteng tai na kidem ding uh a, a khatna pen thaman (letsong) kong pia ding hi,” a ci hi.

Tua caingin tangvalnote lawpmahmah uh a, a tottot uh hong khol pah uh hi. Ahi zongin Papi pa’n amaute kiangah, “Hua muh tawp ah ka ding dinga kei kiang tangtak aa hong tung penpen in thaman ngah ding hi. Na kipat ding hun uh kong theisak dinga tua ciangin nong tai ding uh hi,” a ci hi.

Tua panin Papipa zong a gamla sim muh tawp ah pai vingveng in ding aa, a kipat dinguh a theisak hi. Tua ciangin tangvalnote lawp mahmahna le hanciamna tawh tai hong kidem uh hi.

• Tangvalno khatpa’n tangtak aa a tun theih nadingin a khepeek en kawmsa in hong tai hi.
• A khatpa leuleu ciang a khialh khak loh nadingin a ziat le vei en kawmin hong tai hi.
• A tawpna pa leuleu ciangin a mittang koi mah ah hei khia vet loin gamla pi a ding Papipa bek en gige sa hong tai hi.

Tua bangin amau hanciamna tawh hong kidemna vuah a thumna tangvalno pa in a khatna hong ngah hi. Banghangin ama’n hong ngah hiam cih leh ama’n a kung uh mitsuan gige hi.

Thalakna:

1). Ei hangin midangte kitot, kiselna vengsak ni!

2). Mite ading lamhilh aksi hih sawm ni!

3). Khangthakte thalawpna ding vaihawm sak ni!

4). Nuntak khuasakna ah tupna nei ni!

5). Eima angsung khualluatna neilo in mainawt ni!

6). Kim le pam lung himawh luatna pan kidawmin mainawt ni!

7). I tupna tangtakin mitsuan gige in tai ni. Tg. Dong Za Mung (Mauvom)