Taiwan meileng atuahsiatma in ahawlpa in Speed-control System khakcip, mi 18 si, 187 liam

Taiwan meileng atuahsiatma in ahawlpa in Speed-control System khakcip, mi 18 si, 187 liam

Taiwan gamsung ah abeisa Sunday ni in meilengkhat tuahsia a, mi 18 takin sihlawh in, adangzong mi 187 takin liamlawh dikdek uhhi. Tua meileng tuahsiatna vaitawh kisai in meileng ahawlpa pen thusitna kinei a, Train Driver in agenkhiatna ah meilengpen atuahsiat madeuh in Speed-control System ka khakcip “Switched off” hi ci’n tuni Tuesday ni in Court ah genkhia cih Reuters pan kiza hi.

Speed-control System cihpen meileng ahatluat ciangin meileng ahatluat zenzenleh alenkiptheih nading, Control bawltheih nadingin akithuah ahihi. Tua ahatluatna alenkipdingpen ki khakcip ahih manin meilengpen hatlua mahmahin akibung, atuahsia kici hi.

Abeisa in Taiwan gamsung ah meileng tuahsiatna kiza pakpak ngeilo ahih manin, hih Taiwan gamsung meileng tuahsiatna pen Decade kumtampi sungah ahuaisiapen “Taiwan’s worst rail crash in decades” ci’n ki ciamteh hi.

Hih meileng tuahsiatna tawh kisai in athu akancian ahi Government Investigation Team panin makai khatin agenkhiatna ah tua meilengpen mual leh guam atamna “Taiwan’s mountainous northeast” sungteng ah atai laitak in atuahsia cihi. Atuahsiat laitak in meileng ahatna pen naikhat in tai 87 (87 miles per hour/ 140 kmh) tawh atailaitak in atuahsia cihi.

Ataktak in meileng ahatpenpen in hawlkhuan aompen naikhat in tai 46 (46 mph/ 74 kmh) hi a, ahi zongin azahnih dektak in hatsakgawp in taisakgawp ahih manin, tuahangin atuahsia kici hi.

Chief investigator Wu Ze-cheng in Reuters te tungah agen masakna ah Speed-control System akici Automatic Train Protection pen tuahsiatna apianma in ki khakcipkhin “Switch Off” hi ci’n genkhia hi. Tua tungtawn in banghangin Speed-control System pen ki khakcip hiam, amathu in aki khakciphiam, ahih keileh mikhatpeuh in akhakcip ngiathiam ci’n limtak akankhia uh ahihi.

Athu limtak aki kankhit ciangin tua Speed-control System pen meileng ahawlpa in atuahsiat madeuhin meileng ziakaipian ahih manin, amanlang theithei in apaitheih nadingin Speed-control System khakcip in ahatsak hi ci’n thunei ahi Taiwan Yilan District Court pan Spokesman khatin Reuters te tungah genkhia hi.

Tuabangin meileng ahatsaknop manin Speed-control System pen khakcip a, ahi zongin adang Station khat atun ciangin Speed-control System pen hongkik nawnlo ahih manin, tuahsiatna apiangsak hiding kici hi. Tua ahih manin meileng ahawlpa pen zulhtatna tawh ki muangmawh in ki mawhsak mahmah hi. Meileng pen naksiat mahmahin, ki khekcip dikdek hi.

More: Yangon Airport leh khuasung meileng khawlna kikal Airport Shuttle mawtaw amanlang in taisak tading

Tua meileng ahawlpa pen amin You Zhen-zhong kici a, kum 48 aphakhin khat ahihi. Thunei te’n mankhiapah uh a, ahi zongin Taiwan sum T$500,000 (US$16,167) tawh Bail in khahkhiakik uhhi. Ahi zongin Taiwan gampanin gampualam koimah pialkhiatheilo dingin thu kipia cih kiza hi. Sawltak #zomidaily