Nupi khatin kum 15 aphakhin atanu vakzawh ngaplo in thatlum

Nupi khatin atanu kum 15 aphakhin khat vakzawh ngaplo in thatlum

Thailand, Bangkok khuasung ah nupi khatin ama sungpanin apiangkhia atanu kum 15 aphakhin khat kepzawh, vakzawh ngapnawnlo ahih manin, agawl mekcip in thatlum cih The Nation pan kiza hi.

Thung Song Hong Police Station ah Deputy Inspector asem alaitak ahi Lieutenant Ukrit Suthirapong in agenkhiatna ah tua nupinu pen kum 52 aphakhin Yolawadee Suasermsiri kici minneikhat cihi.

Hih nupinu in abeisa Monday zingsanglam 3am hunpawl in Phone tawh Police te sam ahih manin ama omna Klong Prem Central Prison gei aom Apartment ah palikte pai uhhi.

Lieutenant Ukrit Suthirapong leh Central Police Forensic Science Division panin Officers pawlkhatin tua nupinu asapna munah adelhpah uhciangin tua nupinu pen atanu ii aluanghawm geiah atusa in akapkap kimu hi.

Tua nupinu in palik thunei te tungah agenkhiatna ah tuani in anasep ahi innteeng Maid nasep panin kakhawl cihi. Zingsanglam 9am hunpawl in atanu pen akamsung ah puansiakhat hencip in, anaktheilo dingin agawl kamekcip cimawk hi.

Tuakhit ciangin atanu aluanghawm geiah lumkhawm in, athawhkik ciangin Beer thawlthum kadawn cihi. Tuaban ah Diazepam zatui tangthum kane cihi. Tua Diazepam tang 3 tak anekpen amahzong asisuakding, sinuamzaw ahih manin, anek ci a, ahi zongin aden ciangin luakhiakik cihi.

Tua nupinu pen apasal in abeisa kum 3 hunlai in Lung Cancer natna tawh sihsan hi. Atanu pen amahguak in akep akoih avak kulta hi.

Atanu pen aneutung akipan alungsim cidammello “Autism” khat hi a, amahleh amah kikemtheilo ahih manin, nasemding in akuankhiat ciangin atanu pen innsung ah kong kakalhcipzel cihi.

Tua nupinu pen alungkham mahmah in, nisim in a ihmuttheih nadingin Diazepam tang 2 ta kaneden cihi. Abeisa sawtpipek inzong atanu thahlupding ka ngaihsun ngeihi ci’n Police te tungah genkhia hi.

Related: Palik khatin atanu Motorcycle tawh sangkha in apaipih laitak kikaplum

Atanu pen Wat Mahabutr Primary School ah sangkahlai, sangnaupang khat ahihi. Ahi zongin Rajankul Institute ah lungsim lamtawh kisai cidamlo “mental disorder” ahih manin sangzong hoihtak kahnawnlo ci’n genkhia hi. Sawltak #zomidaily