Taangmi Adam, Mawhna tawh kisai

Taangmi Adam, Mawhna tawh kisai

Adam in khemna thuak masa lo a, numei in thuakin a khial masa a suak
hi (1 Tim.2:14; 2 Cor. 11: 3). A zi Eve adingin Adam pen a lutang ahih
manin Adam’ mawhna na kici hi (Romans 5:12-14). Tua mah bangin Adam le
Eve te’ suan le khak mi khempeuh taangmi pen Adam ahi hi. Tua hi a,
mawhna tawh kisai ah Adam pen a hoihpen taangmi na hi khin zo hi.
Kuamah in dem zo lo ding ih hih manin ih taangmi hi sak ni. Taangmi
tungtawnin mawhna ong pianzia thu thum ka gen nuam hi. Mawhna tawh
kisai-ah Adam pen na taangmi dingin a ding pa hi cih na pom theih
mateng hotkhiatna kal kisuan thei lo ding hi.

1. Mawhna ong kipatna bulpi thumanlohna (Original Sin)
Sakhi tui nekin pan lehang Adam, Eve, tanglai gulpi, Satan hihte’
kizopna tungtawnin mawhna hong kipan hi, cih pen ih theih sa ahi hi.
Adam in Pasian’ thu a up a muan lohna hangin thumanlohna hong kipan
hi. Tua thumanlohna pen mawhna hong kipatna ahi hi. Tua ahih manin Lai
Siangtho sungah “Biakpiakna sangin thuman ding hoih zaw hi” na ci hi
(1 Samuel 15:22).

2. Luahsuk Mawhna (Inherited Guilt)
Adam’ gamh ih luahsuk pen luahsuk mawhna kici hi. Banghangin luahsuk
ih hiam cihleh Adam pen mawhna tawh kisai ah ih taangmi ahih hang ahi
hi. Taangmi pa’ tungtawnin a paubaang (guilty) mi ih hihna pen ih
luahsuk ong suak hi. Tua ih paubanna pen ih zanni, ih tuni, ih zing
ciang mawhnate in tetti pang khin zo hi. Tua tetti in Adam pen ih
taangmi taktak dingin a kilawm a kituak mahmah ahihna ong lak hi. Lai
Siangtho sungah “Mi khat’ mawhna hangin…” a cih khit ciangin “…mi
khempeuh mawh uh hi…” na ci hi (Rom. 5:12). Adam pen taangmi cih bang
hi thei kei na ci phial zongin Adam mah bangin tua mawhna sungah pukna
tawh na kipeel thei tuan kei hi. Tua ahih manin luahsuk mawhna tawh a
kidim teitei na hi hi. Na luahsuk a kul ahi hi.

3. Pianpih Mawhna (Inherited Corruption)
Tua ih luahsuk mawhna pen ih pianpih siatna, ih pianpih sihna ong suak
hi (Rom. 6:32). Tua hi a, mawhna pen ih taangmipa Pu Adam’ thumanlohna
tungtawnin kiluahsukin, kipianpih hi. Luahsuk mawhna (inherited guilt)
le pianpih mawhna (inherited corruption) pen taangmi pa’ tungtawnin ih
pelh theih loh mawhnei mi ih suahna thumaan bulpi khat ahi hi.

Hih a tunga ih gen thu thum teng pen Lai
Siangtho in mawhna na ci hi. Tua mawhna in mihingte a beisa hun pan
tuhun le hong tung ding hun dongah hong khihcip ahih manin, Topa Jesuh
Khrih ong tatkhiatna Singlamteh pen a beisa ih mawhna pan hotkhiatna
(Salvation from the Past), tulaitak ih mawhna pan hotkhiatna
(Salvation from the Present), hong tung ding hun pan hotkhiatna
(Salvation from the Future) kici hi.

Mi pawlkhatte in luahsuk mawhna le pianpih
mawhna pen mi khempeuh tungah Jesuh Khrih in a sisan tawh mawh
maisakna ong pia khin hi. Tua ahih manin ih mihing nuntakna sunga ih
khialh theih mawhnate pan ei le ei ih kihotkhiat theih ding hi ta hi,
cih bang peuhin thu hilh thei uh hi. Ih pianthak khit ciangin mawhna
cih bang om nawn lo a, khialhna cih bel om hi. Khialhna ih bawl loh
zahzah, thukham ih zuih zahzah leitung thupha ding hi ci-in mawhna
tawh kisai nam nih in a gen om thei hi. Mawhna nam nih om lo hi. Mawh
hong kimaisak nading pen a tunga ka gen mah bangin hun thum pan kisam
den hi zaw hi. Tuate in Abeisa (from the Past), tuhun (from the
Present) le hong tung ding hun (from the Future) pan ahi hi. Ih
pianthak khit ciangin zong hih teng thum tawh a ki-awh den lai ih hi
hi.

Tua dung zui-in thu-ummite pen dinmun thum
tawh kidim lai hi. Khatna Diktanna dinmun (Justification), nihna ah
Sianthona dinmun (Sanctification), thumna ah Minthanna dinmun
(Glorification) hih teng thum ahi hi. Diktanna tawh kisai-in thu-ummi
pen luahsuk mawhna panin a kihonkhia khin (have been saved) mite ahi
uh hi (Eph. 2:8). Sianthona tawh kisai-in thu-ummi pen a pianpih
mawhna ii a vangliatna sung pan nisim nai simin a kihot khiatkhiat
laitak (is being saved) ahi hi (1 Cor. 1: 18). Minthanna tawh kisai-in
thu-ummi pen hih leitung mawhna panin a kihonkhia siang lai ding (will
be saved yet) ahi hi (Sawltak 15:11). Kamdang khatin gen lehang,
mawhna tawh kisai ah thu-ummi pen hong kihonkhia khin, hong kihotkhiat
laitak, hong kihonkhia siang lai deuh ding ahi hi.

Luahsuk le pianpih mawhna ih cih pen Adam’
tungtawnin mikhempeuh tungah mawhna hong pianna thu genna hi zawa,
luahsuk mawhna pen mikhempeuh tungah Jesuh’ sisan tawh kimai sak khin
zo hi cih thuhilh nading hi lo hi. Taangmi Adam’ tungtawna ih luahsuk
ih pianpih pen mawhna ahi hi. Tua mawhna in mihingte hong khihcip khin
ahi hi. Tua kikhihcipna sung panin Jesuh Khrih Singlamteh Lungdamnathu
sungah hehpihna hanga upna a ngah mite in a bucing hotkhiatna a kici,
a beisa ih mawhna pan, tulaitak ih mawhna pan, le hong tung ding ih
zing ciang nuntaknate sunga ih khialh theih mawhna khempeuh pan
hotkhiatna ahi hi. Gup ngah nadinga hong kimai sak mawhna nam, mi
khempeuhin Jesuh’ sisan tawh mawhmaina a ngahna uh luahsuk mawhna nam,
gupna tawh kisai loin leitung thupha ih ngah theih loh nadingin
khialhna nam cih bang om lo hi. Jesuh’ sisan pen luahsuk mawhna le
pianpih mawhna bek pan hi loin, zanni tuni a bei hun dongah a kisam ih
hi hi. Jesuh’ sisan in luahsuk le pianpih mawhna bek panin hong
tankhia zo hi lo a, bei hun dong adingin hong tankhia zo sisan ahi hi.
Mawhna a tuam khialhna a tuam, thupha ngah nading a tuam, gup ngah
nading a tuam cih bang om lo hi. Ih pianthak ma hi taleh ih pianthak
khit hi taleh Pasian’ thukham banga nuntak zawhlohna khempeuh mawhna
ahi hi. Ih pian thak khit ciangin nu le pa syate’ thuman lohnate
mawhna hi nawn lo hi, cih bang om thei lo hi. Ama le a khit mawhna
ahihna a kibang tawntung ahi hi.

Tua hi a, thu-ummite in zong ih pianthak khit ah
mawhna a kithat that lai ahi hi. Sihna ah mawhna a vui siang zo pan
ding ih hi hi. Taangmi Adam’ tungtawna ih mawhna pan Adam nihna ahi ih
taangmi Jesuh Khrih tungtawnin thu-ummite in dikna ih ngah hi.
Diksakna tawh kisai ah ih dinmun kilaih a, ahi zongin mawhna tawh
kisai ah ih nawk lai kul hi. Thunget lai kul hi. Kisik lai kul hi.
Kipuahphat lai kul hi. Hahkat lai kul hi. Hanciam kul hi. Siangtho kul
hi. Cleanliness is holiness, and holiness is godliness.

Evan. Suang Dal