Teci le Tetti ~ Evan. Suangh Dal

Teci le Tetti ~ Evan. Suangh Dal

Teci pen Witness ci ni-in, Tetti pen Testimony ci-in khen dih ni ei. Tetti (Testemony) pen na mimal tuah khak thu hi-in, Teci (Witness) pen Lungdamna thu tawh kisai diak hi. Teci pen mitmuh cihna hi-in mi khat ahi tua Jesuh Khrih adingin teci panna hi-a, tetti pen mitmuh cihna pian mah hi-in ahi zongin nang mah le nang mah adinga kigenna ahi hi.

Teci (Witness): Jesu Khris thokik hi cih tawh kisai ah Nungzuipite pen mitmuh tecite (Eye Witness) ahi uh hi. Khrih pen Pasian’ Tapa hi ci-a a nuntakpihte ii thuakna sisan pen Teci (witnessing) ahi hi. Teci cih pen Khrih adinga thuakna ahi hi.

Lungdamna thu lei mong dongah teci pang ding (Witnessing the Gospel). Khrih ading thu-um mimalte ii i gamtat pen a kisim thei laimal a kimu thei Teci ahih kul-a, tua mah bangin Pawlpi zong leitungah Khrih a kimuh theihna, Khrih a ki-up theihna, Khrih ading teci (Witness) ahi hi.

Tetti (Testemony): Thu-ummi khat in Jesu Khris Tanpa le Topa-in um-a i sanna tawh tui kiphumna pen tetti panna ahi hi. Tua pen Pawlpi le mipi’ theih-a i tetti panna teci hikhin hi. Na pianthakna tetti (Testemony) khatvei a pang khin na hi hi. Biakinn khawngah tetti panna i cih pen tuahkhak thu peuh, thupha sanna peuh eimau Pasian bek suahsuah thu genna peuh ding hi lo hi. Tetti pang nuam peuh ci-a hun mawk hon ding hi lo hi.

Pawlpi i cih pen mipi tawh Pasian biakna ahih manin mimal tetti pan kisam lo hi. Lungdamnathu Teci gen, thu ngen khawm la sa khawm, thuhilhna sermon ngai khawm ding hi bek hi. A pianthakna thu a gen nuam velvel a om leh minit 5 bang tomkimcing-a tetti panna bel kipia thei hi. Tua lo tulai tetti khaan, tetti pang cih mawkmawk pen Ciin le Zuih khat-in kinei mawkin zat loh zawk ding ahi hi. Biakpiakna nawngkai sak mahmah zaw thei hi.

Teci cih le Tetti cih kibang lo hi. Thu-ummite pen biakinn sung bekah Teci kihi lo-a, i nisim nuntakna ah Teci a pangpang kihi zaw hi. Na mimal tuahkhak thupi nasak mahmah Pawlpi level a genkhiat kul na sak tetti ahih leh tua bel Syate le upate in ngaihsun-a piak theih ahi hi.

“Na mimal-a na tuahkhak thu tetti panna (Testemony) pen Lungdamnathu hi lo hi” cih thu… Suangh Dal – Zomi Daily