Syrian Rebels te’n IS te khuapi Raqqa kianga khuata pawlkhat la
Nov. 8, 2016: US tawh kipawl Syria kumpi lehdo thau tawi – Syrian armed groups kici pawl tuamtuamte kipawl in Syrian Democratic Forces (SDF) kici ten Nipini a kipanin Syria gam-a ISte khuapi (caliphate) Raqqa lak kik ngimna tawh galdo kipan uh a, US leh a pawl ten tung lam panin huhna pia uh hi. Hih Syrian Democratic Forces (SDF) kicite pen Syrian Kurdish YPG militia leh Arab groups kicite kipawl uh hi a, lei lam panin Raqqa nawk dingin nawk ding hanciam uh a, Raqqa khuapi kiim-a khuata pawlkhat la zo ta uh hi ci-in SOHR leh Kurdish source in pulak hi.
Syrian Democratic Forces (SDF) ten a ngimna masa pen uh ahih leh Raqqa khuapi kiim-a khuatate lak masak ding leh Raqqa umcih masak ding cih ahi hi. Hih galdona pen “Euphrates Anger” kici a, Raqqa leilu lam leh Raqqa leitaw lam, Raqqa panin Km. 50 (30 miles) a gamla Ain Issa khua panin nawk ding cih ahi hi.
SOHR in SDF ten Raqqa khuapi kiim-a khuata pawlkhat ah ISte panmun tampi laksak ta uh a, ahih hangin Raqqa khuapi lamah mainawt zo taktak nai lo uh hi ci hi. Kurdish source in bel khuata tampi ISte khut panin kila ta a, IS ten car bomb nga puaksak ta uh hi ci-in gen hi. Galdona pen baih lo a, cik ciangin Raqqa kila zo ding hiam cih gen theih lo a, US leh a pawl ten tung lam panin lim takin huhna hong pia uh hi ci-in gen beh hi. SDFte pen US ten a beisa hunin Syria leilu lam lakna dingin lei lam-ah panin a nawk dingin nak zat mahmah uh hi.
Raqqa a kilak zawhzawh ciangin hih khuapi pen galkap (military) leh Raqqa khuami civilian council ten uk ding uh hi ci-in SDF spokesman Jihan Sheikh Ahmad in gen hi. Raqqa pen Syria gam-a ISte khuapi ahih manin IS ten zong su hum taw hum in na humbit nuam ding uh ahih manin lak kik ding pen baih lo kha ding hi. -Reuters Thang Khan Lian
Comment piaknop aomleh...