Christian Hymn te’ tangthu: Thuciamna Pha Muang Ning

Standing on the Promises (2 Corinthians 1:20)
Russell Kelso Carter (1849-1928)
Russell Kelso Carter (1849-1928)

Thu ummi khat nuntakna ah a kip ngiungeu nading leh tawntung ading a lungmuan nadingin Laisiangtho sunga Pasian’ kamciamte’ tungaha kingak kul hi. Laisiangtho sunga hih bang kamciamte bangzah-in manpha! “Tuikhangte nawka na pai ciangin nang kong ompih ding hi….” (Isaiah 43:2)

Thu um mite a nisim nuntakna ah Pasian’ kamciam tungah kinga-a nuntak ding hong phawksak lamal leh tua lamalte tawh kituak lua mahmah la-awte hangin hih la a kiphuah cil-a kipan Pasian’ mite’ deihpen la khat-in om den hi.

Hih la a phuakpa Russell Kelso Carter pen America gam Baltimore, Maryland ah November 18, 1849 ni-in suak hi. Catonsville, Maryland ah August 23, 1928 ni-in si hi. A sangkah lai-in kimawlsiam mahmah khat-in minthang hi. 1887 kumin Methodist pawlpi ah ordination kipia a, Holiness, camp meeting movement ah makai khat-in om hi. A nuntak sung tawntung pilna siamna tuamtuam sin-in nasep khat pan khat a khel kawikawi mi khat ahi hi. Methodist minister khat ahih banah Pennsylvania Military Academy ah kum tampi sung professor of chemistry, natural science, civil engineering, and mathematics sem hi.

Tawlkhat sung California ah tuuhon khawi ngei-a, a laihilhnate tawh kisai-in textbook tampi khenkhia ngei hi. Novel pawlkhat zong gelh-a, Christian and Missionary Alliance-te’ hymnal Hymns of the Christian Life (1891) a kikhet lai-in assistant editor-in om ngei hi. Tua labu sungah ama’ phuah la-aw dawng 68 leh lamal dawng 52 kihel hi. A kum tam khit simsim ciangin zato lam pilna sin ding kipana Baltimore, Maryland ah siavuan sem hi.

Hih la “Thuciamna Pha Muang Ning” pen Pennsylvania Military Academy ah professor a sep laitak 1886 kuma a phuah ahi hi. Hih la a aw galkap vai lenlen pian-a, a phuakpa galkap sanga kah ngei, galkap sanga sangsia sem ngei ahih man hi ding hi, ci-in ki-um hi. Amah tua sang pan 1867 kumin sang zo ngei hi. Hih la a kiphuah kum, 1886 kum mah-in John K. Sweney leh R. Kelso Carter-te’ kaihkhop Songs of Perfect Love labu sungah kihel pah a, taang 5 pha hi. Tu hun ciangin a kisakna peuh mah ah taang 4 bek kisa dena, taang thumna kinusia den hi. Tua pen hibang ahi hi:

• Standing on the promises I now can see,
• Perfect, present cleansing in the blood for me;
• Standing in the liberty where Christ makes free,
• Standing on the promises of God.

Hotkhiatna thu kigenna cialpi khempeuh phial-ah hih la kizang den hi. Tuhun-a kikhen evangelical hymnal peuhmah ah kihel kim phial hi. Hih lamal tawh kituakzaw ding ci-a kiphuak la-aw dang a om hangin tu-a i saksak la-aw mah tawh kisasa a Pasian in nakpi mah in zang den hi.

Rev. Zam Khat Kham
Christian Hymn te’ tangthu 2005