Aung San Suu Kyi apumpi zaw “Paralyze” ci’n zuauthuthang ki khahkhia

Aung San Suu Kyi apumpi zaw “Paralyze” ci’n zuauthuthang ki khahkhia

Myanmar State Counselor Daw Aung San Suu Kyi pen apumzaw “paralyze” hi ci’n thuthang kigenpen ataktak hilo hi, zuauthuthang hi ci’n President’s Office in genkhia hi. Tuaban ah hih zuauthuthang pen koipan in hongki pankhia hidinghiam, kua genkhiat masak hidinghiam cihpen aki kanciansan laitak ahihi.

Daw Aung San Suu Kyi pen Paralyze hetlo hi. Nisim asepding khempeuh cidamtak in semciatciat den hi. Nungdiak in cidamna sitcianna Medical Checkup kibawl hi ci’n President’s Office panin Spokesman ahi U Zaw Htay in zanni Tuesday nitaklam in genkhia hi.

Abeisa April khasung in amit kibawl “Eye Operation” kibawl a, tualo apumpi damlohna bangmah omlo hi. Daw Aung San Suu Kyi pen apumpi cidamna Lifestyle akikemsiam mahmahkhat ahihi ci’n genkhiatbeh hi.

Daw Aung San Suu Kyi pen abeisa Friday ni in Karenni State sungah akibawl Public Peace Talk ah kihel a, tuani mahin Naypyitaw ah ciahkik pahhi. Tuazawh mipi muhkhakna ah aki dawkkhiatna omlo hi.

Myanmar Herald te genkhiatna ah Daw Aung San Suu Kyi pen apumpi zaw hi, Paralyze hi ci’n agenkhia masa pen khutlam entheite leh Politicians pawlkhat te sungah Sunday nitaklam in agenkhia masa cihi.

U Zaw Htay in agenna ah Daw Aung San Suu Kyi pen New Year Holiday khitzawh Tuesday ni in azum ah kahkikta hi ci’n genkhia hi.

Zanni Wednesday zingsanglam inzong State Counselor’s Office te’n Daw Aung San Suu Kyi zumkahding in President’s Office ah atunlian laitak Photo khahkhia uh a, zuauthuthang akigen bangdan in Paralyze tuak hetlo in, cidamtuak mahmah hi.

Daw Aung San Suu Kyi ii Family Doctors kumtampi asemkhin ahi Dr. Tin Myo Win in agenkhiatna ah aci damhi. Damlohna khatpeuh anei hizenzenleh Press Release ki khahkhia dinghi ci’n Irrawaddy te tungah genkhia hi.

Daw Aung San Suu Kyi pen abeisa September khasung in Yangon khupisung aom Grand Hantha Hospital ah Medical Checkup kibawlngei hi. Tuaban ah Naypyitaw ahzong ahunhun in Regular Medical Checkup kibawl zelzel kici hi.

Political Analyst khat ahi Yan Myo Thein in agenna ah Myanmar gamsung aom Political History sungah zuauthuthang pen aom theidenmah hi a, alamdang luapizong hinawnlo hi. Ahi zongin Daw Aung San Suu Kyi pen Myanmar’s Democratization Process ah athupi mahmahkhat ahih manin, ama thutawh kisai thuthang aom ciangin hoihtak in vaihawmhuai hi ci’n genkhia hi.

Azenzen in Daw Aung San Suu Kyi ii cidamna tawh kisai in ahunhun in mipi theihding in aki pulakkhia zelzel hileh hibangdan zuauthuthang pen omloding, phadawmding hi ci’n genbeh hi.

U Zaw Htay in agenna ah mi pawlkhat te’n Daw Aung San Suu Kyi pen cidamlo ci’n zuauthuthang akhahkhiat uhpen lungsim ginalo “Bad Intention” tawh akhahkhiat uh ahih manin, hihbangin akhahkhia masa kuahiam cih President’s Office in hoihtak ki kancian dinghi ci’n genkhia hi.

More: England, Oxford College ah pahtawina in akisuang Aung San Suu Kyi lim ki lakkhiatsak

Nungdiak December kha kipatcillam inzong President U Htin Kyaw pen cidam hetlo ahih manin, asawtlo in anasep panin tawlngading hi ci’n zuauthuthang khat ki khahkhia ngeihi.

Myamar gammakai tepen cidamlo hi ci’n zuauthuthang akhahkhiakhia tepen gamsung ah buaina apiangsaknuam te hiding hi. Hihbangin akhahkhia masa te ki theikhia hileh amau ii ngimna “intention” kithei khiapahding hi. Tua ahih manin kua cih ki kankhia dinghi ci’n Spokesman in genkhia hi. Sawltak #zomidaily