Myanmar President thakding in Win Myint ki teelkhiata

Myanmar President thakding in Win Myint ki teelkhiata

Myanmar gamsungah President asemlaitak ahi U Htin Kyaw pen apanmun panin akhawlvat ciangin President omlo dinmun kitungvat hi. Tua President panmun aluahto dingin tuni Wednesday ni in Myanmar’s Parliament ah Vote tawh teelna kinei a, U Win Myint in Myanmar President panmun hongngah cih kiza hi.

U Win Myint pen abeisa in Lower House Speaker panmun tawh kumpi sungah nasemkhat hi a, nungkalsung mahmahin apanmun pan akhawl ahihi. Tuakhit ciangin President dingin Vote tawh kiteelna ah lutkik in, tu’n Myanmar President dingin U Win Myint kikipsak khinta hi.

Abeisa in President asem ahi U Htin Kyaw pen Aung San Suu Kyi tawh aki meltheih mahmahkhat ahihi. Amahpen cidamlohna paulap tawh tawlngakding kisam ahih manin, Myanmar President panmun panin nasep akhawl kici hi.

Lawmaker te’n meetang akigawm in 636 tawh Myanmar President dingin U Win Myint, U Myint Swe, Henry Van Thio mi 3 lakpanin teelkhia uhhi. Tualak ah U Win Myint in Vote (403), U Myint Swe in Vote (211), U Henry Van Thio in Vote (18) cihbang in ngah uh a, Vote akikhial 4 tak om kici hi. (MP pipi te’nzong Vote piakzia khialtheilai hihtuak mawk hi)

Tuabang in Vote tawh aki teelkhiatna ah U Win Myint in Vote 403 tawh Myanmar President panmun angahta ahihi.

U Win Myint pen kum 66 aphakhin hi a, NLD Member ahihzawh sawtpi hikhin (Life-long) hi. U Win Myint pen bangni ciangin President kiciamna neiding cih akician in genkhiatna omnailo a, ahi zongin Thursday ni hidingin ki ummawh hi.

More: England, Oxford College ah pahtawina in akisuang Aung San Suu Kyi lim ki lakkhiatsak

U Win Myint in Myanmar President angahna hangin Policy bangmah kikhelna omloding hi. Abeisa President ii sep hunlai mahbangin Policy aomsa te kizangsuaksuak dinghi ci’n NLD panin Lawmaker Kyaw Tote in genkhia hi. Sawltak #zomidaily