Sun le zan a kigawm ciangin nikhat kici hi ~ Lian Tuang

Sun le zan a kigawm ciangin nikhat kici hi ~ Lian Tuang

Nuapang 6 le a ni (A pa’ naunu) in zingan ne khawm uhi. A nu le pa khualzin laitak ahi hi.

Naupang a u pen tan 8 hi a, a nau pen kum 2 pha pan hi. Zingan ne khawmin a kimawlmawl tawh a paupau tawh a kapkap tawh om ngeingai uhi. Ahi zongin a vekpi un a gil vah dong a Ni in nekpih hi.

An nek khit phet in kithawi sak pah hi. A nau pen sim loh a vek un kumpi sang le kumpi naucinna sang ah kha hi. Anautum pen tawh inn ngak hi. Naupangte lungleng se lo uhi.

A pa uh pen nuntak zongin khualzinmi khat hi a, a ni le a nu tawh amau teng inn ngak a hi hi. A nung nipi sungin a nu sanggam pa zato lum ahih manin a nu in va delh a, naupang teng leh a ni bek inn a om ahi hi. A Ni tawh nusia thei ahih manin a nu le pa te lungmuang takin khualzin in nasem thei uhi.

A Ni pen nasep siam in kizen mahmah ahih manin naupangte siangtho sitset hi. Naupangte bangmah kitasam sak loin kem thei hi. Ahi zongin a Ni uh pen a neu a kipan pau theilo in khua zong a za lo khat ahi hi.

Tua a kizen mahmah naupangte a Ni pen a neulai in mi hopihna za thei loin a pau theih pak loh ciangin a nu le pa a sanggamte dipkua in dah in lungkham lawh mahmah uhi. A lawmte hopihna tel loin ama gen nop thute zong a gen theihloh ciangin maizum in khasia mahmah hi. A lawmte lakah zong nuam sa nawnlo hi. Zatui zaha banah bawl theih tuamtuam tawh kibawlbawl hi. Kilamdang zo tuanlo hi.

Ama hangin nu le pa, u le nau in lungsim lel in kum tampi sung nuihmai zolo liang uhi. Kim le pam pan kamdawn tuamtuam za kawikawi lailai uhi. Mawhna khialhna khat hangin hih bangin naupang in a thuak hi ci in paulap tuamtuam tampi kinei sawnsawn hi. Kikhasiat in kilipkhap mai hi. Ama nuntakna pen maizumna khasiatna lungkhamna tawh kipan hi.

Ahi zongin amah ong khan ciangin nu le pa a khual thei pen, u le nau a huaisiam pen, tu le tate a it siam pen, u le nau veng le pam sungah lungnopna gualnopna a piangsak zo pen ong suak zawsop hi. Bangkua sung adingin khuampi bangin belh muanhuai khat suakto hi. Bangkua sung khang kizopna dingin tute tate a kem a zun a phuah ding a thupi penpen nu suak mawk hi.

Amah pen lungsim siangtho in pawlhuai mahmah khai ahi hi. Thudik mahmah a, innkuan sung vai khempeuh ama tungah kinga hi. Ama ngap loh ni pen innkuan sung u le nau sung cinat ni hi pah hi a, ama lungdam ni zong vekpi lungdam ni hi pah hi.

Amah pen ka nu no ahi hi. Ko unau teng banah a sanggamte tate teng bek hi loin veng le pam a naupang teng a kem nu ahi hi. Tua bek tham loin ka pute bangkua sunga khang kizom sak ding ka puno le ka pinote a kem a khansuah ding Nu ong hi mawk hi. Pasal nei loin innkuan ading a kisapna mun khempeuh ah a kipiakhia, khuaimei vak bangin a tuisuak tawntung mi manpha mahmah nu ahi hi.

Ka nuno nuntak kipatna I et ciangin ka pute bangkua sungah guallehna maizumna khasiatna lungzinnate a tunpih tawh a kibat hangin a huampi in I et ciangin innkuan sung u le nau khua le tui adingin thuhoih thupha a piang sak nu, meivak bangin itna khuavak a tangsak nu, mi khempeuh ading thupha nakpi nu na hi zaw mawk hi.

Tua mah bangin innkuan sunga pianpih tawh pianpih loh tawh piansualna langbaina, poina hemna nei in a cidam phalote pen innkuanpihte adingin vangik hi hetlo in thupha nakpite na hi zaw kha hamtang hi. Sun le zan a kigawm ciangin ni khat ahih mah bangin amaute tawh hoih tak I tonkhop ciang bekin mi picing taktak pan I hi ding hi. Amaute hangin ei le ei kikem kik thei I hih manin amaute pen ei ong kemte hi zaw uhi. Ei ong kem ong zunte pen i pianna nu le pa bangin it in I zahtak ding kilawm ding hi cih a kihawm sawn nuam i hi hi. Lian Tuang