Adoniram Judson upna laigil ~ Pau Do Lian

Adoniram Judson upna laigil ~ Pau Do Lian

Thumasa :: Kawlgam lungdam nathu hongpuak masa Judson hilo hi. Kublai Khan galte in Kawlgamhuam hongnawk lai, AD.1282 in agalte lakah Nestorian Christiante hongtungkhin ahihlam Pagan ah singlamteh lim leisungpan kimukhia hi (Coupland British Empire: 8). Italy sumzong thu-um mitezong AD 1300s in hongtungkhin ta uh hi. Tuabek thamlo Fr. Vince Sangermano kum zalom 15 lai in missionary in hongpai khin hi. Ahizongin hongkipuak lungdamna thu Kawlgammi lakpan asang masa penpa U Naw, pen Adoniram Judson July 13, 1813 Yangon hongtung hang ahihi (Harvey, History of Burma: 139).

JUDSON TANGTHU TOMKIM

August 09, 1788 in Malden, Boston khuapi Massachusetts ah suakhi. Apa minzong Adoniram Judson mah hi a, Congregational pawlpi ah pastor semhi. Judson kumthum aphakin laipai hoihtak simthei-a, kum sagihciangin leitung kiheiziate theita hi. Providence College ah akah laitakin alawmpa Jacob Eames, [Atheist] tawh Pasian a omlam anih un umlo uh a, tua lawmpa mahtawh lametloh pi in Hotel khatah akhan [room] uh kizom in zankhat ziakkhawm kha uhhi.

Zanthapai in Judson cidamlo atau-aw in ihmusaklo in ngaihmahmah a, hotel nasemte kiangah tua atautau kuahiam acihleh Jacob Eames hi, sikhin tahi acih uhciang, Judson lamdang saluahi (McElrath, To be the first, 1976: 40). Tuapan in mihingte mailam kigenkhol theilo cih alungsim tawngah honglut a tuapan in anungta Pasian thukan nuam ahihman in Andover Theological Seminary ah 1808 in kah a akum kik, 1809 ciangin mipi mai-ah Khazih pen ka Topa hi ci in pulakna neihi. Apa’ Pasian nasepna pawlpi in pastor ahuhdingin cial uh a, ahizongin kei ka Pasian nasep nading agamla pi hi-a, hihteng ah semzo loding hi ing ci indawng hi (Mathieson, Judson of Burma: 27).

Boston pan France tembawpi tawh hongpai khia uh a tualai tak France leh England te gal kineih laitak hisese hi. Atlantic tuipi tungah France gamzuan in apailai takun tembaw nuai nungpenpen ah khumcip thuakhi. Frenchpau theilo ahihman in English zanga, England te kisa kha in France te’n tembaw sungah gawtna napia pah malam uhhi. England atunkhit ciangin William Carey Calcutta ah missionary in omcih thei ahihman in Baptist te-upna bulpite England pan India kikal tembaw pitungah study bawl a Congregation pawlpi panin tuipi tungah Baptist suakdingin khensatin Calcutta atunciang Baptist suak hi.

India atunciang in England gampa’n gamkek sumzongte in West Bangel kimte leh India gamsung pawlkhat ana uklai tak uh hi-a, India ah sawt omthei lo lauhuai ahihman in Madras pan tembaw paikhia khat cihmawh thu inzuihi. Indonesia lampai ding Yangon tuipi gei anawklai takun huihpi nunggawp a paisuak theilo in Yangon seaport ah akhawlpak kal un Judson in Buddha biakna omlam amuhciangin mission sepding khensat in asihdong, 1813-1850 Kawlgam adingin anun takna piahi.

JUDSON UPNA BULPI

2004 kumin Judson banghangin mission nasepna ah lawhcing hiam? Cih dotna laikasim kha a, adawn na-ah, 1) amahpen, doctrine, upnaguipi [To thum Pasian] lenkip hi. 2) Laisiangtho sanghoih ah kah hi. 3) Kipawlna muanhuai in khahkhia hi ci in dawnghi. Yangon [Tualai in Rangoon] atunkhit phetin Kawlgam kumpi migilo mahmahpa kiangah Lungdam nathu agentheih nading uh phalna laipia in, alaitungah Gospel tract khat belhthuah in, “Tawntung Pasian khatbek om hi, amahlo Pasian dang omlohi” cihtawh kipan hi (Bailey, Adoniram Judson: 61). Milimbia Kawlkumpipa mai ah anungta Pasian khatbek omhi cihngamna pen hangsan mahmah ahihi.

Kawlbiakna tawh gawmkhawm [compromise] hetlo in Buddhist te Pagoda [biakinn] khawngah Pasian thugen ding ngaihsun lo-in lampi gei-ah bukno, Zayatkici khat lamin sunthapai in tu-a buksungah tuibel khatkoih hi. Tuidawn ahongpaite lungdamna thugen pihpih ahihmanin April, 30, 1819 ciangin U Naw hongpiangthakhi. Judson upna pen Matt. 28:18-20 bulphuh a, ‘Tua ahihman in note pai unla’ mikhempeuh Zeisu nungzui suaksak in, Pamin Tapamin, Khasiangtho min tawh natuiphum un! Kawlkumpi patungah, “Anungta Pasian khatbek omhi” acihpen Kawl milim Pasian tampitelak ah agen ahihman in To thum Pasian ci-a agen ahihlam atuiphum ciangin kilangh sak mahmahhi.

Judson Kawlgam atun mapek[Boston leh France] kikalah thongkia khinzo hi. India pan kihawl khialeuleu in tuipi tungah huihpileh guahpi ahatluatciangin Yangon tawmvei atembaw khawla tua tuipi hangin Judson Kawlgam hongtuntheih nading Pasian honggelsak kici theihi. Kawlgam kibawlsiatna asangpen thong ah kha 17 kia in azi in naupai laitaktawh kituak ahih manin vaveh zolo a annek lohhun tamzaw hi. Akhete gel henkhawmsa in vanlam ah kikhai in zanciangin tuabangin ihmusak uhi.

Tuapan hongsuaktat ciangin agen lungdamna thubekmah genzom in Kawl phonggyi [monk]te puansilh, ‘yellow robe’ silhin biakna sia ahihlam mitheih nadingin silhhi. Ahizongin Kawl phongyi tawh akibatlam amuhciangin ‘white robe’ puantual kang silha, Kawlbiakna tawh akibanglo ahihlam kilanghsak hi. Kawlte biakna leh Christian upna kilamdang mahmah thei ahihman in Zeisu bek lampi hi cih bulphuh in nagen ngam ahih manin Kawlgam ah thu-um mitampi hongpiang thei ahihi. Buddha biakna azuite inzong amau vantunggam ahihkei leh eitawh akibangin Vantung tungding hi cihpeuhmah sanglo ahihman in Zeisubek Vantung gamtun nading hici in natangkohi.

JUDSON LEH NGEINA

Judson in Kawlgamte ngeina [culture] neumuh leh langpan lo-in Pasian lungdam nathu hih ngei nate tungtawn in bangci hilhthei ding cih namu hi. Gentehna in Zayat, bukno alam pen Kawlte ngeina, khualzinmi te khawlnang leh tuidawn dingkoihna mun a-akizang mahmah ngei nakhat hi in Kawlte muhna ah nahoihsepna [merit] ahihman in mikim in hoihsa in Pasian thu gen namun in zangthei pahhi. Kawl phongyi te’n puansilh pen biakna siate silhsa ahihman in amanzong silha ahizongin Phongyita aisan color hi-in ama a akang color silhhi. Kawlgam thu um mipawlkhat in Judson in Kawlbiakna amuhzia hoihlo hi’ negative luahi’ acih samhangin ama nasepte teltakin ihkan ciangin hibangin kamu hi. Anthropologist leh Christian missionary Paul Hiebert in azattawh kibang method 3 nazanghi.

1) Acceptance of the old practice. Aluingeina te niallo in ahibangzatna pen Judson Kawlte a-avekin sangkhinlo hi. Asan pawlkhat omin anial pawlkhat omhi. 2) Daniel of the old practice. Aluikhempeuh nialna. Judson in ngei nalui khempeuhzong niallo in Laisiangtho tawh kituakte la-in akituaklo te nial hi. Gentehna in dawibiakna a sagawhna leh phuisamna etc. 3) Dealing with the old practice. Aluingeina te zang in athakngeina tawh enkak a ahoihte la-in ahoihlo tepai. Judson in puantual ausan ‘yellow robe’ asilhpen Kawlte ngeina lui Christian upna tawh kituakthei pendingin azat ahihi. Phongyite’ a ahihlam atheihciangin puantual kang ‘white robe’ tawh laih hi. Tulai Christian theologian pawl khatin hih method 3 te ihzat theihding kisam mahmah hi. Ihtheih lohkhatzong hoihkei ci a gensiat thei omlo in’ hoih ihsak khatzong Laisiangtho tawh kituak hiam cih enlo pi a pahtak pahding hilo hi.

JUDSON KHITTEH

Judson pen evangelical mahmah pawlpi ahi’ Congregational’ panin upnatawh akhangkhia khat ahihman in tuikitheh pan tuikiphumna bek alaih hi-a adang a-upna khempeuh pen congregationalist te amah lenkipin Kawlgam ah lungdam nathu hongtangko ahihi. Ahizongin William Carey tawh kithuahtheih nading ngaihsutna tawh tuikiphum in tuiphum kasuak hi’ acih takciangin ABCUSA [American Baptist Churches of USA] in amau mintawh hongkhak in genuh hi. Bektham lo in 1845 ciang southern leh American Baptist hongkikhen ciangin zong alang nihun Judson pen amaumi ahihlam uh gentuak uhhi. Judson upna tatakpen tu a Baptist te upna tawh kibang taknawnlo hi. Judson pen evangelical upna Congregationalist’ apa’ pastor sepna ah akhangkhia ahihman in Laisiangthopen ahibanga asangpawl ahihi.

Tuabek thamlo in 1807 madeuh in Harvard Divinity liberal lua asa’ professor mi 4 khawngin evangelical zawdeuh dingci in 1807 in Andover Theological Seminary hongphuan khia uh a, tua ah first-batch Adoniram Judson hipah hi. Amahpen Baptist te in ka missionary uhhi’ cihhang un upna laigil tatak kibang hetlo hi. Judson sihkhit [1850] ciangin ama tungpan Christian asuak Kawlmi te in ABCUSA akizoppih takciangun Judson honghilh upna paipi tawh kibangtak nawnlo ahih man teltakin kimu hi. Tuate in upna peng’ liberal upna Kawlgam ah honglawh hi. Gentehna in Christian tebek Vangam tungloding’ Kawl Buddhist tezong amau lampiciat ah tungding hi cih upna ahizongin, damdam in ABCUSA te’ thapiak mahmah movementkhat LGBTQ te in honglawh lohding thupi hi. Member dingin asangbek hilo in pastordingin zong ordain piata uh ahihman in ihkizopna te-ah tua Laisiangtho deihloh upnate in hongzoploh ding thupi mahmah hi.

Leitung Christian te omna lakah a liberal pen khat ahi’ Boston ah kum3 sung sangkah in ka omsungin kakikhopna pawlpi ahizongin kasangkah na, Andover Newton leh Harvard te ah Christiante Laisiangtho sangin kiciamteh mahleh Muslim, Hindu, Buddhist, Jewish leh LGBTQ te omzihziah ahihman in kei evangelical upna neikhat adingin katel mahmah hi. Amau lakah kum3 pilsinna nei kahihman in Pasian ompihna leh abeisa kasangkah te Laisiangtho bang a um, sinngekngek te ahihman in honghoi sakzolo hi.

“When God left the Building” Pasian in innpi anutsiat ciang’ cih DVD khui 2016 in kihawm khia a, tuasungah amuhkhiatna uhpen kumkhat sungin American gamsung a Christian pawlpi khempeuh survey akibawlpan angah uhthute in, kumkhat sungin biakinn 4000 kikhakden hi ci hi. Akihong thak aomsam hang 1000 phazolo ahihman in kiam mahmah cihding ahihi. Tua akiam deuhte bangpawlpi hiam ci-a akan ciangun Laisiangtho pan upna apialkhia LGBTQ athapia zawdeuh te hi’ ci uhhi.

Tua ahihman in ABCUSA tawh akipawl/zom khempeuh in ihtheih dingin hih Pasian deihloh Laisiangtho sungah zong muntampi ah adeihloh nate, LGBTQ phawkin thungetpih a, ei upna in amau alawh zoding ahihkei leh amau honglawh ding ahihman in pilvang huai mahmah hi. Judson pastor sepna pawlpi, Congregationalist te in tuni ciangdong hihbang upnate sangvetlo uh a, Laisiangtho bangbang in umlai uhhi. Tuni in Judson in Kawlgam thu-um mite hong etciangin mitampi tak Lasiangtho ahibangin ih upsam hangin pawlkhatte a-etciangin bang acitam maw cih kalungsim sungah hongsuak ahihman in hithulu honggelh kahihi. Pau D.Lian