Sumbawm asuhsak khitciang Motorcycle tawh ataimang guta khat kitaihlum

Sumbawm asuhsak khitciang Motorcycle tawh ataimang guta khat kitaihlum

Malaysia, Selangor sungah zanni in guta khatin University sangnaupang khat ii sumbawm laksak in Motorcycle tawh taivingveng cihi. Tua sangnaupangpa’n zong mawtaw tawh delhpah vingveng in aphak ciangin Motorcycle atuanglai gutapa taihsuk a, sisuakpah cih NST pan kiza hi.

Serdang police chief Assistant Commissioner Megat Aminuddin Megat Alias ii genkhiatna ah zanni zingsanglam 3:30am hunpawl in Seri Kembangan aom Mamak Restaurant khatah University sangnaupang khatin anne in atu cihi.

Tualaitak in guta khatin amuhtang mahin asumbawm suhsak in Motorcycle tawh taivingveng hi. Tua University sangnaupangpa’n zong mawtaw nei ahih manin, mawtaw tungah amanlang in tuangin delhpah vingveng hi.

3km sungkhawng aki delhkhit uhciang in Garden Condominium @ One South geinai aomm lamkabom ah phaphei a, gutapa ii Motorcycle pen taihsuk sakpah hi.

Police Forensics Team te’n gutapa tungpan in asumbawm lakikthei uh a, gutapa ahihleh mawtaw in ataihsuk ciangin atukna tawh alu tatkhagawp ahih manin sisuak cihi.

Tua sumbawm sungah sum RM2050 leh US$500 (RM2141) om cihi.

Police te genna ah tua University sangnaupang pen gamdangmi, Yemen gammi ci uha, kum 20 gualpawl aphapan cihi.

Gutapa simawk ahih manin sangnaupangpa zong palik te’n manpah uh a, ni 7 sung Remand tawh kemphot in, tuakhitciang thusitna neiding uh cihi.

Police te genkhiatna ah gutapa si ahih manin, hihpen Section 304 of the Penal Code “culpable homicide” cihtawh mithat in thu kibawlthei a, mawhna kician hi ci’n aki muhkhiat leh kum 10 bang thong kiatheiding cimawk hi.

Malaysia guta tepen huathuai mahmahmawk hi. Hih thupiang ah sangnaupangpa pen ama khialhna himasa hetlo hi. Asumbawm amuhtang in suhsak himawk ahih manin, takkheh pasal ci’n adelhpah hikha ngelding hi. Guta pa’nzong khawlin asumbawm piatuanlo in Motorcycle tawh taimangsawm ahih manin, acihnading omtuanpaklo in ataihsuk hiding hi. Kamsiatna tawh sisuak citciat hi.

Related: Kuala Lumpur khuasung ah thautawi guta damiah mi 2 kikaplum

Palik thunei te’n hihbangdan Crime khatpeuh aomciang in Public mipi te’n nothu tawh na vaihawm kei un, hong zasak un cipong uhhi. Amau ihzaksak hanginzong ahunlap in hong matsaklo zelmawk uhhi. (Gamdangmi cih atheihman inzong gutapa’n asumbawm amuhtang in asuhsak hikhathei, palik te’nzong gamdangmi himawk ahih manin, athu bangci bangin hong khenmawk diam?) Nungdiak inzong Kuala Lumpur khuasung ah thautawi guta damiah mi 2 te palik te’n kaplum uh cih kiza a, tuate bangci bangin thu aki khenmawkdiam? Sawltak #zomidaily